Uttarpradesh News : ઉત્તર પ્રદેશમાં 2027ની વિધાનસભા ચૂંટણી પહેલાં રાજકીય સમીકરણો બદલાવા લાગ્યાં છે. અસદુદ્દીન ઓવૈસીની પાર્ટી AIMIM અને ચંદ્રશેખર આઝાદની પાર્ટી વચ્ચે ગઠબંધન (Owaisi Chandrashekhar Alliance)થતાં રાજ્યના રાજકારણમાં નવી ચર્ચા શરૂ થઈ છે. ચંદ્રશેખર આઝાદ (Chandrashekhar Azad)ને મુખ્યમંત્રી પદના ચહેરા તરીકે રજૂ કરવામાં આવ્યા છે. આ નવા ગઠબંધનને લઈને ભાજપ, સમાજવાદી પાર્ટી સહિતના રાજકીય પક્ષોમાં નિવેદનબાજી તેજ બની છે.
આ દરમિયાન ઉત્તર પ્રદેશના નાયબ મુખ્યમંત્રી કેશવ પ્રસાદ મૌર્ય (Keshav Prasad Maurya)એ ઓવૈસી અને ચંદ્રશેખરના ગઠબંધન (Owaisi Chandrashekhar Alliance)પર કટાક્ષ કર્યો છે. તેમણે કહ્યું કે, “જો વિપક્ષ ભાજપ સામે એક થઈ જાય તો પણ 100માંથી 60 અમારા છે અને 40 વહેંચાયેલા છે. આ 40માં પણ ભાગલા પડશે, પરંતુ કમળ ફરી ખીલશે અને ભાજપની સરકાર બનશે.”
મૌર્યના આ નિવેદનને વિપક્ષી ગઠબંધન સામે ભાજપના આત્મવિશ્વાસ તરીકે જોવામાં આવી રહ્યું છે. બીજી તરફ, ઓવૈસીના નવા રાજકીય મોરચાને કારણે ઉત્તર પ્રદેશમાં ખાસ કરીને મુસ્લિમ અને દલિત મતદારોના સમીકરણ અંગે ચર્ચા શરૂ થઈ છે.
ઓવૈસી-ચંદ્રશેખર ગઠબંધનથી UPના રાજકારણમાં નવો વળાંક
અસદુદ્દીન ઓવૈસી અને ચંદ્રશેખર આઝાદે (Chandrashekhar Azad)સાથે મળીને ઉત્તર પ્રદેશમાં રાજકીય મોરચો બનાવવાની જાહેરાત કરી છે. આ ગઠબંધન હેઠળ ચંદ્રશેખર આઝાદ (Chandrashekhar Azad)ને મુખ્યમંત્રી પદના ચહેરા તરીકે રજૂ કરવામાં આવ્યા છે. બંને પક્ષોનો હેતુ રાજ્યમાં નવા રાજકીય વિકલ્પ તરીકે ઉભરી આવવાનો છે.
ઓવૈસીએ ગઠબંધનને સફળ બનાવવા માટે સાથે મળીને કામ કરવાની વાત કરી હતી. તેમણે કહ્યું કે, “અમે બધા સાથે મળીને કામ કરીશું, જેથી આ ગઠબંધન સફળ બને અને ઉત્તર પ્રદેશના લોકોને પણ તેનો લાભ મળે. ચંદ્રશેખર આઝાદ મુખ્યમંત્રી બનશે ત્યારે જ વાસ્તવિક પરિવર્તન આવશે. અમે જનતાને આપેલાં તમામ વચનો પૂર્ણ કરીશું.”
અખિલેશ યાદવે નવા મોરચાનું કર્યું સ્વાગત
ઓવૈસી અને ચંદ્રશેખરના ગઠબંધન પર સમાજવાદી પાર્ટીના અધ્યક્ષ અખિલેશ યાદવે (Akhilesh Yadav) પણ પ્રતિક્રિયા આપી છે. તેમણે ‘સામાજિક પરિવર્તન મોરચા’નું સ્વાગત કરતાં કહ્યું કે, ઉત્તર પ્રદેશમાં માત્ર સામાજિક નહીં, પરંતુ રાજકીય પરિવર્તનની પણ જરૂર છે.
અખિલેશે એવો દાવો પણ કર્યો કે આ નવા મોરચાની રચનાથી ભાજપ (BJP)ના મતહિસ્સામાં 2થી 3 ટકાનો ઘટાડો થઈ શકે છે. તેમના મતે, વિપક્ષમાં નવા રાજકીય મોરચાઓ ઊભા થવાથી ચૂંટણીનાં સમીકરણો બદલાઈ શકે છે અને તેનો ફાયદો વિપક્ષને મળી શકે છે.
‘વોટના સોદાની રાજનીતિનો અંત આવવો જોઈએ’
અખિલેશ યાદવે રાજકારણમાં મતના સોદા અને ગુપ્ત રાજકીય હેતુઓ અંગે પણ ટિપ્પણી કરી હતી. તેમણે કહ્યું કે, જનતા એવા લોકોને ઓળખે છે, જેમનો હેતુ માત્ર નિવેદનો આપીને રાજકીય માહોલ ગરમ કરવાનો હોય છે.
તેમણે ઉમેર્યું કે, જો કોઈ મોરચો પોતાના સમાજના કલ્યાણના હેતુથી બનાવવામાં આવ્યો હોય તો તે લોકશાહીને મજબૂત બનાવે છે. પરંતુ જો કોઈ ત્રીજા પક્ષના ગુપ્ત હેતુ માટે રાજકીય કઠપૂતળી બને તો જનતા તેને સ્વીકારશે નહીં. અખિલેશે આશા વ્યક્ત કરી કે રાજકારણમાં ‘વોટના સોદા’ની પ્રથા બંધ થશે અને દરેક પક્ષ પોતાના સમાજના વાસ્તવિક હિત માટે કામ કરશે.
UP ચૂંટણી પહેલાં ભાજપ અને વિપક્ષ વચ્ચે રાજકીય ખેંચતાણ
ઓવૈસી-ચંદ્રશેખર ગઠબંધન (Owaisi Chandrashekhar Alliance)બાદ ઉત્તર પ્રદેશમાં દલિત અને મુસ્લિમ મતદારોના રાજકીય સમીકરણને લઈને ચર્ચા તેજ બની છે. એક તરફ ભાજપ (BJP)ને વિશ્વાસ છે કે વિપક્ષી પક્ષો એક થાય તો પણ તેને સત્તા સુધી પહોંચતા રોકી શકશે નહીં. બીજી તરફ સમાજવાદી પાર્ટી નવા મોરચાને ભાજપના મતહિસ્સામાં ઘટાડો કરનાર પરિબળ તરીકે જોઈ રહી છે.
હવે જોવાનું એ રહેશે કે ઓવૈસી અને ચંદ્રશેખરનું ગઠબંધન ચૂંટણી સુધી કેટલું મજબૂત રહે છે અને ઉત્તર પ્રદેશના મતદારો વચ્ચે કેટલો પ્રભાવ ઊભો કરી શકે છે.
