Ahmedabad News: અમદાવાદની ખ્યાતિ મલ્ટિસ્પેશિયાલિટી હોસ્પિટલમાં કૌભાંડ થયાને બે સપ્તાહ વીતી ગયા છે. આ સમગ્ર મામલે ગુજરાત મેડિકલ કાઉન્સિલની ભૂમિકા ‘દાંત વગરના વાઘ’ જેવી સાબિત થઈ છે. ખોટી સર્જરીઓ અને દર્દીઓના મૃત્યુના ભયાનક બનાવો છતાં બે અઠવાડિયાથી ગુજરાત મેડિકલ કાઉન્સિલ ખ્યાતિ હોસ્પિટલને માત્ર નોટિસ ફટકારીને સંતોષ માની રહી છે. બે સપ્તાહ બાદ પણ ગુજરાત મેડિકલ કાઉન્સિલ ખ્યાતી હોસ્પિટલ પાસેથી વિગતો મેળવી શકી નથી.
ગુજરાત મેડિકલ કાઉન્સિલે સૌપ્રથમ 13 નવેમ્બરે જ્યારે આ ઘટના બની ત્યારે ખ્યાતિ હોસ્પિટલમાં દર્દીઓના ઓપરેશનમાં સામેલ પાંચ મેડિકલ અને નોન-મેડિકલ સ્ટાફને નોટિસ પાઠવી હતી. ગુજરાત મેડિકલ કાઉન્સિલ દ્વારા બે અઠવાડિયામાં બહાર પાડવામાં આવેલી તમામ નોટિસોમાંથી હજુ સુધી એક પણ જવાબ આપવામાં આવ્યો નથી. આ કૌભાંડમાં સંડોવાયેલા કેટલાક લોકોની ધરપકડ કરવામાં આવી છે, જ્યારે કેટલાક મોટા લોકો હજુ ભૂગર્ભમાં છે, જેના કારણે તેઓ ગુજરાત મેડિકલ કાઉન્સિલને લેખિત અથવા મૌખિક રીતે જવાબ આપવા માટે હાજર રહે તેવી શક્યતા નથી.
સૂત્રોના જણાવ્યા અનુસાર હજુ સુધી નોટિસનો જવાબ આપવામાં આવ્યો ન હોવાથી આ કૌભાંડમાં સંડોવાયેલા લોકો સામે શું પગલાં લઈ શકાય તે અંગે આગામી સપ્તાહે ગુજરાત મેડિકલ કાઉન્સિલની બોર્ડ પેનલની બેઠક મળશે. પરંતુ આ સમગ્ર મામલે ગુજરાત મેડિકલ કાઉન્સિલની ભૂમિકા નિરાશાજનક રહી છે.
આ મુદ્દે તેમના અધિકારીઓનો સંપર્ક કરવામાં આવે તો જાણે કે તેઓ આ અંગે વાત કરવા તૈયાર નથી. માત્ર નોટિસો ફટકારીને આવા મોટા બનાવોમાં ઉદાસીન વલણ દાખવનાર ગુજરાત મેડિકલ કાઉન્સીલ સામે ભારે રોષ જોવા મળી રહ્યો છે. વિગતો બહાર આવી છે કે કાઉન્સિલ છેલ્લા બે વર્ષમાં કેટલા ડોકટરો અને હોસ્પિટલો સામે કાર્યવાહી કરી છે તેનો કોઈ ડેટા તૈયાર કરી રહી નથી.
આ પણ વાંચો:ખ્યાતિ હોસ્પિટલનું વધુ એક કૌભાંડ, ધોળકાના રૂપાલ ગામમાં ત્રણ લોકોએ જીવ ગુમાવ્યા
આ પણ વાંચો:સર્જરીમાં મૃત્યુઆંક વધ્યો 2 નહીં પરંતુ 5 લોકોના મોત,ખ્યાતિ હોસ્પિટલ કાંડમા મોટો ખુલાસો
આ પણ વાંચો:ખ્યાતિ હોસ્પિટલે ગાંધીનગર જિલ્લાના શેરથા ગામમાં પણ બોરીસણા જેવો જ કાંડ કર્યો
