Union Cabinet Meeting: મંગળવાર, 19 ઓગસ્ટ 2025ના રોજ કેન્દ્રીય કેબિનેટની બેઠકમાં પ્રધાનમંત્રી નરેન્દ્ર મોદીની અધ્યક્ષતામાં દેશના ઈન્ફ્રાસ્ટ્રક્ચરને મજબૂત કરવા માટે બે મહત્વપૂર્ણ નિર્ણયો લેવામાં આવ્યા. રાજસ્થાનના કોટા-બૂંદીમાં 1507 કરોડ રૂપિયાના ખર્ચે નવું ગ્રીનફીલ્ડ એરપોર્ટ અને ઓડિશાના ભુવનેશ્વર-કટકમાં 8307 કરોડ રૂપિયાના ખર્ચે 6-લેન એક્સેસ-કંટ્રોલ્ડ રિંગ રોડ બનાવવાની મંજૂરી આપવામાં આવી છે. આ પ્રોજેક્ટ્સ ભારતના વિકાસને નવી ગતિ આપશે.
કોટા-બૂંદી ગ્રીનફીલ્ડ એરપોર્ટ:
કેન્દ્રીય મંત્રી અશ્વિની વૈષ્ણવે જણાવ્યું કે, કોટા-બૂંદીમાં 1507 કરોડ રૂપિયાના ખર્ચે નવું ગ્રીનફીલ્ડ એરપોર્ટ બનાવવામાં આવશે. આ એરપોર્ટ 20,000 ચોરસ મીટરના વિસ્તારમાં ફેલાયેલું હશે, જેમાં 3200 મીટર લાંબો રનવે હશે. આ એરપોર્ટ વાર્ષિક 20 લાખ મુસાફરોને સેવા આપવાની ક્ષમતા ધરાવશે. આ પ્રોજેક્ટને 2 વર્ષમાં પૂર્ણ કરવાનું લક્ષ્ય છે.
કોટા એક મહત્વનું ઔદ્યોગિક અને શૈક્ષણિક કેન્દ્ર છે, જ્યાં શિક્ષણ માટે દેશભરમાંથી વિદ્યાર્થીઓ આવે છે. અશ્વિની વૈષ્ણવે જણાવ્યું, “કોટામાં લાંબા સમયથી નવા એરપોર્ટની માંગ હતી. હાલનું એરપોર્ટ જૂનું છે અને તેને આધુનિકીકરણની જરૂર છે.” નોંધનીય છે કે, 2014માં ભારતમાં માત્ર 74 એરપોર્ટ હતા, જે હવે 11 વર્ષમાં વધીને 162 થઈ ગયા છે. આ નવું એરપોર્ટ રાજસ્થાનના વિકાસને વેગ આપશે.
ઓડિશામાં 6-લેન રિંગ રોડ:
ઓડિશાના ભુવનેશ્વર, કટક અને ખોરધા શહેરોને જોડતા 110.875 કિલોમીટર લાંબા 6-લેન એક્સેસ-કંટ્રોલ્ડ રિંગ રોડના નિર્માણને પણ મંજૂરી આપવામાં આવી છે. આ પ્રોજેક્ટની અંદાજિત કિંમત 8307.74 કરોડ રૂપિયા છે અને તે હાઈબ્રિડ એન્યુઈટી મોડ (HAM) હેઠળ વિકસાવવામાં આવશે. આ ગ્રીનફીલ્ડ હાઈવે ઓડિશાના આ વિસ્તારોમાં ટ્રાફિકની સમસ્યાને ઘટાડશે અને આર્થિક વિકાસને વેગ આપશે.
કેન્દ્રીય મંત્રીએ જણાવ્યું, “આ રિંગ રોડથી ભુવનેશ્વર, કટક અને ખોરધાના રહેવાસીઓને મોટો ફાયદો થશે. આ પ્રોજેક્ટથી શહેરોમાં ટ્રાફિકનું દબાણ ઘટશે અને કનેક્ટિવિટી સુધરશે.”
આ પણ વાંચો:કેન્દ્રીય કેબિનેટની બેઠકઃ મોદી સરકારે વિદ્યાલક્ષ્મી યોજનાને આપી મંજૂરી, જાણો શું થશે ફાયદો
આ પણ વાંચો:કેન્દ્રીય કેબિનેટનો રક્ષાબંધન પર મોટો નિર્ણય, PM ઉજ્જવલા યોજના હેઠળ 12000 કરોડ રૂપિયા મંજૂર
આ પણ વાંચો:રાષ્ટ્રીય સહકારી વિકાસ નિગમને 2000 કરોડ રૂપિયાની નાણાકીય સહાય મળશે, કેબિનેટ દ્વારા મંજૂરી
