World News : ટ્રમ્પ વહીવટીતંત્ર ૧ ઓક્ટોબરથી ૨૫૦ ડોલર (લગભગ ૨૨,૦૦૦ રૂપિયા) ની વિઝા ઇન્ટિગ્રિટી ફી લાદવા જઈ રહ્યું છે, જેના પછી યુએસ વિઝા ખર્ચ બમણાથી વધુ થઈ જશે.અમેરિકન ટ્રાવેલ એસોસિએશનના મતે, વિઝા મેળવવાનો કુલ ખર્ચ વધીને $૪૪૨ (લગભગ ૪૦,૦૦૦ રૂપિયા) થઈ શકે છે. આનાથી ભારતથી અમેરિકા જતા લોકોની સંખ્યા પર પણ અસર થવાની શક્યતા છે, જેમાં પહેલાથી જ ૨.૫ ટકાનો ઘટાડો જોવા મળ્યો છે.

આ વર્ષે અમેરિકા જતા ભારતીય વિદ્યાર્થીઓની સંખ્યામાં પણ ૧૮ ટકાનો ઘટાડો થયો છે. અમેરિકન કોલેજો પણ આંતરરાષ્ટ્રીય વિદ્યાર્થીઓની સંખ્યામાં ઘટાડા અંગે ચિંતિત છે. રાષ્ટ્રપતિ ડોનાલ્ડ ટ્રમ્પના ઇમિગ્રેશન પરના કડક વલણ અને ઘણા વિદેશી દેશો પ્રત્યેના તેમના પ્રતિકૂળ વલણને કારણે, વિદેશથી આવતા લોકોની સંખ્યામાં સતત ઘટાડો થઈ રહ્યો છે. અમેરિકા જતા લોકોની સંખ્યા દર વર્ષે ઘટી રહી છે.

એવું માનવામાં આવે છે કે નવી વિઝા ઇન્ટિગ્રિટી ફી પહેલાથી જ મુશ્કેલીમાં મુકાયેલા યુએસ ટ્રાવેલ ઉદ્યોગ પર વધુ દબાણ લાવી શકે છે. બીજીતરફ જુલાઈમાં અમેરિકાની મુલાકાત લેનારા વિદેશી નાગરિકોની સંખ્યા વાર્ષિક ધોરણે 3.1 ટકા ઘટીને 19.2 મિલિયન થઈ ગઈ હોવાનું યુએસ સરકારના ડેટા દર્શાવે છે.
2025 માં વાર્ષિક આગમનની સંખ્યા 79.4 મિલિયનના રોગચાળા પહેલાના સ્તરને વટાવી જવાની ધારણા હતી. 1 ઓક્ટોબરથી નવો વિઝા ફી નિયમ અમલમાં આવશે. જેનાથી ભારત, બ્રાઝિલ ,મેક્સિકો, આર્જેન્ટિના, અને ચીન જેવા દેશો સૌથી વધુ પ્રભાવિત થઈ શકે છે.

સભ્ય સંગઠન યુએસ ટ્રાવેલ એસોસિએશન અનુસાર, વધારાની ફી વિઝાની કુલ કિંમત $442 સુધી વધારી દેશે, જે તેને વિશ્વની સૌથી મોંઘી મુસાફરી ફીમાંની એક બનાવશે. વર્લ્ડ ટ્રાવેલ એન્ડ ટુરિઝમ કાઉન્સિલ અનુસાર, વિદેશથી ઓછા લોકો આવશે, જે આવકને અસર કરશે.

આ વર્ષે લોકો ફક્ત $169 બિલિયન ખર્ચ કરશે એવો અંદાજ છે, જ્યારે 2024માં આ આંકડો $181 બિલિયન હતો. આનાથી 2028ના લોસ એન્જલસ ઓલિમ્પિક અને 2026ના FIFA વર્લ્ડ કપ જેવી ઘટનાઓ પર પણ અસર થશે,એવું માનવામાં આવી રહ્યું છે.

બોન્ડ વિઝા પણ બોજ બનશે. ટ્રમ્પ વહીવટીતંત્રે વિઝા સમયગાળો ઘટાડવા માટે તાજેતરમાં વિદ્યાર્થીઓ, સાંસ્કૃતિક આદાનપ્રદાન માટે આવતા મુલાકાતીઓ અને મીડિયા કર્મીઓ માટે $15,000 ની બોન્ડ યોજના શરૂ કરી છે.

પ્રવાસી અને વ્યવસાયિક વિઝા ધારકોને પણ $15,000 ના બોન્ડ ચૂકવવા પડી શકે છે. 20 ઓગસ્ટથી આ સંદર્ભમાં એક પાયલોટ પ્રોજેક્ટ શરૂ કરવામાં આવ્યો છે. તેનો હેતુ તેમના વિઝા કરતાં વધુ સમય રોકાતા લોકો પર કડક કાર્યવાહી કરવાનો છે.

ટ્રમ્પની નીતિઓએ કોલેજો માટે નાણાકીય કટોકટી ઉભી કરી છે. ટ્રમ્પની મનસ્વી નીતિઓની અસર અમેરિકાની પ્રતિષ્ઠિત કોલેજો પર થવા લાગી છે. અમેરિકન કોલેજો આંતરરાષ્ટ્રીય વિદ્યાર્થીઓની સંખ્યામાં ઘટાડાના સંકેતોથી ચિંતિત છે. આ ઘટાડાની અસર એટલી બધી છે કે આ વર્ષે નવા આંતરરાષ્ટ્રીય સ્નાતક વિદ્યાર્થીઓની સંખ્યા ગયા વર્ષના મુકાબલે માત્ર અડધી છે.

એક અહેવાલ મુજબ, અમેરિકામાં 100 થી વધુ કોલેજોમાં નોંધાયેલા વિદ્યાર્થીઓમાંથી લગભગ 20 ટકા આંતરરાષ્ટ્રીય વિદ્યાર્થીઓ છે. એવો અંદાજ છે કે ટ્રમ્પની નીતિઓને કારણે, આ સંખ્યામાં 40 ટકાનો ઘટાડો થઈ શકે છે. આનાથી કોલેજોના અર્થતંત્ર પર બોજ વધશે. કોલેજો જરૂરિયાતમંદ મેરિટોરિયસ વિદ્યાર્થીઓને શિષ્યવૃત્તિ આપી શકશે નહીં.

આ પણ વાંચો:શું ભારતને બદનામ કરવા માંગે છે ટ્રમ્પ? USએ યુદ્ધ વિશે કર્યો નવો દાવો, PM મોદીને ઘેર્યા દબાણમાં!

આ પણ વાંચો:ડોનાલ્ડ ટ્રમ્પે જ્યોર્જ સોરોસને ફોજદારીના આરોપોનો સામનો કરવા આપી ચીમકી

આ પણ વાંચો:ડોનાલ્ડ ટ્રમ્પ ભારતીય દવાઓ સામે ઝૂક્યા, આ મહત્વપૂર્ણ નિર્ણય લીધો