દસાડા પોલિસ મથકના પીએસઆઇ સહિતના પોલિસ સ્ટાફે બાતમીના આધારે દસાડા વડગામ હાઇવે પરથી શંકાસ્પદ હાલતમાં નીકળેલી કારનો ફિલ્મી ઢબે પીછો કરી આંતરીને સઘન તલાશી લેતા કારમાંથી વિદેશી દારૂની 522 બોટલો અને કાર મળી કુલ રૂ. 4.79 લાખનો મુદામાલ ઝબ્બે કર્યો હતો. જ્યારે કારચાલક પોલિસને થાપ આપી નાસી છુટવામાં સફળ થયો હતો.
દસાડા પીએસઆઇ એચ.એલ.ઠાકર સહિતના પોલિસ સ્ટાફને હાઇવે પેટ્રોલીંગ દરમિયાન મળેલી બાતમીના આધારે છટકુ ગોઠવ્યું હતુ. ત્યારે હાઇવે પરથી શંકાસ્પદ હાલતમાં નીકળેલી વડગામથી પાનવા તરફ જતા વરના કારને દસાડા પોલિસ દ્વારા આંતરવા છતાં કાર ચાલકે કાર ઉભી રાખી નહોતી આથી દસાડા પોલિસે કારનો ફિલ્મી ઢબે પીછો કરી કારને આંતરીને સઘન તલાશી લેતા કાર ચાલક કાર હાઇવે પર મૂકીને પોલિસને થાપ આપીને નાશી છૂટવામાં સફળ થયો હતો. દસાડા પોલિસે કારમાંથી ગેરકાયદેસર પાસ પરમીટ વગર ભારતીય બનાવટના વિદેશી દારૂની બોટલો નંગ- 426, કિંમત રૂ. 1,70,202 અને બિયર ટીન નંગ- 96, કિંમત રૂ. 9,600 અને વરના કારની કિંમત રૂ. 3,00,000 મળી કુલ રૂ. 4,79,802નો મુદામાલ જપ્ત કરી દારૂ અંગેનો ગુન્હો દાખલ કરી નાસી છુટેલા આરોપીને ઝબ્બે કરવાના ચક્રો ગતિમાન કર્યા છે. દસાડા પોલિસના આ દરોડામાં પીએસઆઇ એચ.એચ.ઠાકર, મનીષભાઇ અઘારા, દાનુભાઇ રંજીયા સહિતનો દસાડા પોલિસ મથકનો સ્ટાફ સાથે હતો.
ઝીંઝુવાડા પીએસઆઇ વી.પી.મલ્હોત્રા, ગનીભાઇ કુરેશી અને ચેતનપુરી ગોસાઇ સહિતના પોલિસ સ્ટાફે પાટડી તાલુકાના મીઠાઘોડા ગામે રહેતા હસમુખસિંહ ઉર્ફે લાલભા ઇસુભા ઝાલાએ પોતાના દાદાનું વાપરવા લીધેલા મકાનમાં બાતમીના આધારે દરોડો પાડી ગેરકાયદેસર પાસ પરમીટ વગર ભારતીય બનાવટનો વિદેશી દારૂની બોટલો નંગ 341, કિંમત રૂ. 37,100નો મુદામાલ ઝબ્બે કરી નાસી છુટેલા આરોપીને ઝબ્બે કરવાના ચક્રો ગતિમાન કર્યા છે.
