Ahmedabad Airport Drugs Raid: ગુજરાતમાં ડ્રગ્સ અને નશીલા પદાર્થોની હેરાફેરી રોકવા માટે સુરક્ષા એજન્સીઓ અને પોલીસ વિભાગ સંપૂર્ણ એક્શન મોડમાં છે. તાજેતરમાં જ રાજ્યમાં બે અલગ-અલગ મોટા ઓપરેશનમાં લાખો-કરોડો રૂપિયાનો ગાંજો ઝડપાયો છે. અમદાવાદ ઇન્ટરનેશનલ એરપોર્ટ પર કસ્ટમ્સ વિભાગે અને સુરતમાં ક્રાઈમ બ્રાન્ચે સપાટો બોલાવીને બે મોટા શખ્સોની ધરપકડ કરી છે.
Ahmedabad એરપોર્ટ પર પકડાયો 1 કરોડનો ‘હાઈબ્રિડ ગાંજો’
અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પર ચેકિંગ દરમિયાન કસ્ટમ્સ વિભાગને મોટી સફળતા મળી છે. બેંગકોકથી અમદાવાદ આવેલી ફ્લાઇટમાં એક મુસાફર શંકાસ્પદ જણાતા કસ્ટમ્સ અધિકારીઓએ તેની સઘન તલાશી લીધી હતી. તપાસ દરમિયાન મુસાફરની હેન્ડ બેગેજમાંથી 1.107 કિલો હાઈબ્રિડ ગાંજો મળી આવ્યો હતો, જેની આંતરરાષ્ટ્રીય બજારમાં કિંમત અંદાજે ૧ કરોડ રૂપિયા આંકવામાં આવી રહી છે. મહારાષ્ટ્ર કનેક્શનની વાત કરીએ તો, પકડાયેલો મુસાફર મહારાષ્ટ્રનો હોવાનું સામે આવ્યું છે. હાલ કસ્ટમ્સ વિભાગે ગાંજાનો જથ્થો કબજે કરી મુસાફરની ધરપકડ કરી છે અને આ આંતરરાષ્ટ્રીય સિન્ડિકેટના મૂળ સુધી પહોંચવા વધુ તપાસ હાથ ધરી છે.
સુરતમાં ઓડિશાથી લવાયેલો 15 કિલો ગાંજો ઝડપાયો
બીજી તરફ સુરત શહેરમાં પણ નશાના વેપલા પર ક્રાઈમ બ્રાન્ચે તવાઈ બોલાવી છે. બાતમીના આધારે સુરત ક્રાઈમ બ્રાન્ચે સચિન વિસ્તારમાં આવેલી શ્રી રામ નગર સોસાયટીમાં દરોડા પાડીને સુરેન્દ્ર ઉર્ફે ગોલ્ડન નામના શખ્સની ધરપકડ કરી છે. પોલીસે આ આરોપી પાસેથી 15.930 કિલો ગાંજો જપ્ત કર્યો છે, જેની કિંમત 7 લાખ રૂપિયાથી વધુ થવા જાય છે. પોલીસ પૂછપરછમાં એવો ખુલાસો થયો છે કે આરોપી રાતોરાત અમીર બનવાના શોર્ટકટ તરીકે, ટૂંક સમયમાં વધુ પૈસા કમાવવાની લાલચમાં ઓડિશાથી આ નશીલો પદાર્થ લાવીને સુરતમાં તેનો છૂટક વેપાર કરતો હતો.
ગુજરાત પોલીસ અને કસ્ટમ્સ વિભાગની આ સતર્કતા દર્શાવે છે કે રાજ્યમાં યુવાધનને બરબાદ કરતા નશાના સોદાગરોને કોઈપણ કાળે બક્ષવામાં આવશે નહીં.
આ પણ વાંચો: અરવલ્લી પોલીસે રાજસ્થાનથી આવતી ટ્રકમાંથી ઝડપ્યો 9 કિલો ગાંજો
આ પણ વાંચો: રાજકોટ એસઓજીએ 51 કિલોથી વધુનો ગાંજો ઝડપ્યો
આ પણ વાંચો: અમદાવાદની વટવા પોલીસને મળી મોટી સફળતા, 3.60 કરોડનો હાઈબ્રિડ ગાંજો ઝડપ્યો
