Ahmedabad News: ગુજરાત પોલીસના સાયબર ક્રાઈમ વિરોધી અભિયાન દરમિયાન આનંદનગર પોલીસે બેંક એકાઉન્ટ ભાડે (Bank Account Rental Scam) આપવાના કથિત રેકેટનો પર્દાફાશ કરતાં પાલડીના એક યુવકની ધરપકડ કરી છે. પોલીસ તપાસમાં આરોપીના બેંક ખાતામાં ટૂંકા ગાળામાં ₹1.50 કરોડથી વધુના નાણાકીય વ્યવહારો નોંધાયા હોવાનું સામે આવ્યું છે.
સાયબર ફ્રોડની તપાસ દરમિયાન મળ્યો મહત્વનો સૂત્ર
આનંદનગર પોલીસ સ્ટેશનના PI આર.એસ. પરમારના માર્ગદર્શન હેઠળ સાયબર ગુનાઓમાં ઉપયોગ થતા બેંક એકાઉન્ટ અંગે વિશેષ તપાસ હાથ ધરવામાં આવી હતી. તપાસ દરમિયાન એક શંકાસ્પદ બેંક ખાતાની માહિતી મળી હતી, જેમાં સાયબર છેતરપિંડીના નાણાં ટ્રાન્સફર થયા હોવાની શંકા હતી. તેના આધારે પોલીસે પાલડીના વિકાસ ગૃહ રોડ વિસ્તારમાં રહેતા પ્રશમ મુનીરભાઈ શાહની અટકાયત કરી પૂછપરછ શરૂ કરી.
Bank Account Rental Scam: ₹50 હજારમાં બેંક એકાઉન્ટ ભાડે આપ્યાની કબૂલાત
પોલીસ પૂછપરછ દરમિયાન આરોપીએ પોતાનું બેંક એકાઉન્ટ ₹50 હજારના બદલામાં વાસણા વિસ્તારમાં રહેતા ‘બિટ્ટુ’ નામના વ્યક્તિને આપ્યાની કબૂલાત કરી હોવાનું પોલીસે જણાવ્યું છે. તપાસમાં સામે આવ્યું કે આરોપીએ બેંક એકાઉન્ટ સાથે ATM કાર્ડ, ચેક કિટ, મોબાઇલ ફોન અને પોતાના નામે ચાલુ SIM કાર્ડ પણ સોંપી દીધા હતા.પોલીસના જણાવ્યા મુજબ, ત્યારબાદ આરોપીના નામે વધુ બે SIM કાર્ડ પણ મેળવવામાં આવ્યા હતા, જેનો ઉપયોગ કથિત રીતે સાયબર છેતરપિંડીમાં થતો હતો.
ખાતામાં ₹1.50 કરોડથી વધુના ટ્રાન્ઝેક્શન
પોલીસે બેંક રેકોર્ડની તપાસ કરતાં આરોપીના ખાતામાં છેલ્લા અંદાજે છ મહિનામાં ₹1.50 કરોડથી વધુના ટ્રાન્ઝેક્શન નોંધાયા હોવાનું જાણવા મળ્યું છે.હાલ આ તમામ નાણાકીય વ્યવહારોની તપાસ ચાલી રહી છે અને તેમાં અન્ય કેટલા લોકો સંડોવાયેલા છે તેની પણ તપાસ કરવામાં આવી રહી છે.
મુખ્ય સૂત્રધારની શોધખોળ
આનંદનગર પોલીસે આરોપીની ધરપકડ કરી વધુ પૂછપરછ શરૂ કરી છે. સાથે જ ‘બિટ્ટુ’ સહિત આ સમગ્ર નેટવર્ક સાથે જોડાયેલા અન્ય શખ્સોને શોધવા માટે કાર્યવાહી તેજ કરવામાં આવી છે.
સાયબર ગેંગ સામે પોલીસની ખાસ ઝુંબેશ
પોલીસના પ્રાથમિક તારણ મુજબ, શહેરમાં કેટલાક લોકો જરૂરિયાતમંદોને નાણાકીય મદદ અથવા કમાણીની લાલચ આપી તેમના બેંક એકાઉન્ટ અને SIM કાર્ડ ભાડે (Bank Account Rental Scam) મેળવી સાયબર ગુનાઓમાં તેનો ઉપયોગ કરતા હોવાની શંકા છે. પોલીસ આવા નેટવર્ક સામે વિશેષ અભિયાન ચલાવી રહી છે અને લોકોને પોતાનું બેંક એકાઉન્ટ, ATM કાર્ડ અથવા SIM કાર્ડ કોઈને પણ ભાડે (Bank Account Rental Scam) કે ઉપયોગ માટે ન આપવાની અપીલ કરી છે.
આ પણ વાંચો:મહેસાણા જિલ્લામાં સાયબર ફ્રોડનો વધતો કહેર, મ્યુલ બેંક એકાઉન્ટ્સ ભાડે આપનારાઓ સામે પોલીસની લાલ આંખ
આ પણ વાંચો:અમદાવાદમાં મ્યુલ એકાઉન્ટ કૌભાંડનો પર્દાફાશ, બાપુનગર પોલીસે એક આરોપીને કરી ધરપકડ
