Ahmedabad News: બહેરામપુરા વિસ્તારમાં રહેતા અબ્દુલ અજીમખાન પઠાણ વ્યવસાયે વકીલ છે. મળતી માહિતી મુજબ, 22 ઓગસ્ટે તેમના પડોશમાં ભાડેથી રહેતા સોહિલ શેખના ઘરે કેટલાક લોકો કેમેરા (Behrampura Camera Dispute) લગાવી રહ્યા હતા. વકીલના જણાવ્યા પ્રમાણે કેમેરા (Behrampura Camera Dispute)ની દિશા તેમના ઘર તરફ રહેતી હોવાથી તેમણે તેનો વિરોધ કર્યો હતો. વાંધો ઉઠાવ્યા બાદ ત્યાં હાજર લોકો ત્યાંથી જતા રહ્યા હતા. જોકે, બીજા દિવસે આ જ મુદ્દાને લઈને વિવાદ ફરી વકર્યો હોવાનો આક્ષેપ કરવામાં આવ્યો છે.

નાસ્તો લેવા નીકળેલા વકીલ સાથે મારામારી

23 ઓગસ્ટની રાત્રે અબ્દુલ અજીમખાન પઠાણ નાસ્તો લેવા માટે ઘરેથી બહાર નીકળ્યા હતા. આ દરમિયાન આરોપીઓએ તેમની સાથે બોલાચાલી કરી હતી અને ત્યારબાદ અપશબ્દો બોલી મારામારી શરૂ કરી હોવાનો ફરિયાદમાં આક્ષેપ કરવામાં આવ્યો છે. વકીલ પોતાનો બચાવ કરવા માટે તેમના ભાઈ સમીરની દુકાનમાં જતા રહ્યા હતા. જોકે, હુમલાખોરોએ ત્યાં પણ તેમનો પીછો કર્યો હતો.

Behrampura Camera Dispute: દુકાનમાં પથ્થરમારો કરી કાચ તોડ્યો

વકીલ દુકાનમાં આશરો લેતાં આરોપીઓએ દુકાન પર પથ્થરમારો કર્યો હોવાનો આક્ષેપ છે. પથ્થરમારાના કારણે દુકાનના કાચ તૂટી ગયા હતા અને નુકસાન થયું હતું. ત્યારબાદ વકીલ ત્યાંથી બહાર નીકળી પોતાના ઘર તરફ જતા હતા ત્યારે સોસાયટીના ગેટ પાસે અન્ય લોકો પણ ભેગા થઈ ગયા હતા. અહીં તેમના પર લાકડીઓ વડે હુમલો કરવામાં આવ્યો હોવાનો ફરિયાદમાં ઉલ્લેખ છે.

Behrampura Camera Dispute: પરિવારજનો વચ્ચે પડતાં પથ્થરમારો

વકીલને બચાવવા માટે તેમના પરિવારજનો વચ્ચે પડ્યા હતા. આ દરમિયાન બંને તરફથી ભારે હોબાળો થયો હતો અને પથ્થરમારાની ઘટના બની હતી. આ ઘટનામાં વકીલના પરિવારના ચાર સભ્યોને ઈજા પહોંચી હોવાનું જણાવાયું છે. ઘટનાને પગલે વિસ્તારમાં તંગદિલીનો માહોલ સર્જાયો હતો.

Behrampura Camera Dispute:દાણીલીમડા પોલીસ ઘટનાસ્થળે પહોંચી

બનાવની જાણ થતાં દાણીલીમડા પોલીસની ટીમ ઘટનાસ્થળે પહોંચી હતી. પોલીસે મામલો થાળે પાડ્યો હતો અને સમગ્ર ઘટનાની તપાસ શરૂ કરી છે. વકીલ તરફથી આ મામલે આઠ શખ્સો સામે નામજોગ ફરિયાદ નોંધાવવામાં આવી છે. પોલીસ દ્વારા ફરિયાદના આધારે આરોપીઓની ભૂમિકા અંગે તપાસ કરવામાં આવી રહી છે.

સામા પક્ષે પણ ફરિયાદની તૈયારી

આ ઘટનામાં વિવાદ માત્ર એક તરફની ફરિયાદ પૂરતો સીમિત રહ્યો નથી. સામા પક્ષ દ્વારા પણ વકીલ અને તેમના પરિવારજનો સામે વળતી ફરિયાદ નોંધાવવાની કવાયત હાથ ધરવામાં આવી હોવાનું સામે આવ્યું છે. હવે પોલીસ બંને પક્ષના આક્ષેપો અને ફરિયાદના આધારે સમગ્ર ઘટનાની તપાસ કરશે. કેમેરો લગાવવાના મુદ્દે શરૂ થયેલો વિવાદ કેવી રીતે મારામારી અને પથ્થરમારા સુધી પહોંચ્યો તેની વિગતો પણ તપાસમાં સામે આવશે.

આ પણ વાંચો:વડોદરામાં ફરી એકવાર શહેરની શાંતિ ડહોડવાનો પ્રયાસ, જૂનીગઢી વિસ્તારમાં પથ્થરમારાની ઘટના

આ પણ વાંચો:સુરતના સલાબતપુરામાં લુખ્ખા તત્વોનો પથ્થરમારા સાથે આતંક, ગાડી પાર્ક કરવા મુદ્દે પિતા-પુત્રને માર્યા, ઘરમાં તોડફોડ કરી

આ પણ વાંચો:સુરતમાં ગણેશ પંડાલ પર પથ્થરમારાની ઘટનામાં યોગીનું બુલડોઝર ચલાવો તેવા સૂત્રોચ્ચાર