Ahmedabad News: અમદાવાદના નવા વાડજ વિસ્તારમાં રખડતાં ઢોર પકડવાની કામગીરી દરમિયાન મ્યુનિસિપલ કોર્પોરેશનની CNCD ટીમ અને પોલીસ સાથે દાદાગીરીનો બનાવ સામે આવ્યો છે. ઢોર પકડવા ગયેલી ટીમ સાથે બોલાચાલી બાદ એક યુવકે PSI પર લાકડીથી હુમલો (PSI Attack Attempt) કરવાનો પ્રયાસ કર્યો હોવાનો આક્ષેપ છે. PSIએ સમયસૂચકતા દાખવી લાકડી આડી કરી દેતાં તેઓ હુમલામાંથી બચી ગયા હતા. સમગ્ર ઘટનાને પગલે વાડજ પોલીસ સ્ટેશનમાં બે શખસો સામે ફરિયાદ નોંધાવવામાં આવી છે અને પોલીસે આગળની કાર્યવાહી હાથ ધરી છે.
નવા વાડજમાં ઢોર પકડવા ટીમ પહોંચી
અમદાવાદ શહેરમાં રખડતાં ઢોરની સમસ્યાને નિયંત્રણમાં લેવા માટે મ્યુનિસિપલ કોર્પોરેશન દ્વારા કામગીરી કરવામાં આવી રહી છે. પશ્ચિમ ઝોનના CNCD વિભાગના અધિકારીઓ, કર્મચારીઓ અને પોલીસકર્મીઓની ટીમ નવા વાડજ વિસ્તારમાં ઢોર પકડવા માટે પેટ્રોલિંગમાં નીકળી હતી. આ દરમિયાન આકાશદીપ એપાર્ટમેન્ટ નજીક રોડ પર એક ગાય જોવા મળતાં ટીમે તેને પકડવાની કામગીરી શરૂ કરી હતી. ગાયને ટ્રેલરમાં ચઢાવવાની કાર્યવાહી ચાલી રહી હતી ત્યારે બે શખસો ત્યાં આવી પહોંચ્યા હતા.
PSI Attack Attempt: ‘ઢોર ટ્રેલરમાં નહીં ભરવા દઈએ’ કહી બોલાચાલી
ફરિયાદ મુજબ પારસ ભરવાડ અને પીન્ટુ ભરવાડ નામના બે શખસોએ ટીમ સાથે બોલાચાલી શરૂ કરી હતી. બંનેએ ગાળાગાળી કરી ઢોરને ટ્રેલરમાં નહીં ભરવા દેવાની ધમકી આપી હોવાનું ફરિયાદમાં જણાવાયું છે. ટીમના જણાવ્યા મુજબ, બંને શખસો ગાયને ટ્રેલરમાં ચઢાવવામાં અડચણ ઊભી કરી રહ્યા હતા. આ દરમિયાન ગાય સાથે મારપીટ કરવામાં આવતી હોવાનો આક્ષેપ થતાં હાજર PSI એસ.એમ. શેખે ગાયને માર મારવાની મનાઈ કરી હતી.
PSI Attack Attempt: PSI પર લાકડીથી હુમલાનો પ્રયાસ
ગાયને મારવાની ના પાડતાં મામલો વધુ ઉગ્ર બન્યો હોવાનો આક્ષેપ છે. તે દરમિયાન એક શખસે PSI એસ.એમ. શેખ તરફ લાકડી ઉગાવી હુમલો (PSI Attack Attempt) કરવાનો પ્રયાસ કર્યો હતો. PSIએ સમયસર લાકડી આડી કરી દેતાં હુમલો (PSI Attack Attempt) તેમના શરીર પર વાગ્યો નહોતો અને તેઓ બચી ગયા હતા. આ ઘટનાથી સ્થળ પર હાજર ટીમમાં પણ અફરાતફરીનો માહોલ સર્જાયો હતો.
‘આજે બચી ગયા, હવે ગાયો પકડવા આવતા નહીં’
ઘટના બાદ પોલીસ કંટ્રોલ રૂમમાં જાણ કરવામાં આવી હતી. ત્યારબાદ વાડજ પોલીસની ટીમ ઘટનાસ્થળે પહોંચી હતી. ફરિયાદ મુજબ, બંને શખસોએ વધુ બોલાચાલી દરમિયાન પોલીસ અને CNCD ટીમને ધમકી આપી હતી. ‘આજે બચી ગયા, હવે અહીં ગાયો પકડવા આવતા નહીં’ અને ફરીથી આવ્યા તો ગંભીર પરિણામ ભોગવવાની ધમકી આપી બંને ત્યાંથી નીકળી ગયા હોવાનો આક્ષેપ છે.
PSI Attack Attempt: બે શખસો સામે પોલીસ ફરિયાદ
સમગ્ર મામલે CNCD વિભાગના કર્મચારી દ્વારા વાડજ પોલીસ સ્ટેશનમાં પારસ ભરવાડ અને પીન્ટુ ભરવાડ સામે ફરિયાદ નોંધાવવામાં આવી છે. પોલીસે ફરિયાદના આધારે ગુનો નોંધી બંને શખસો સામે તપાસ અને કાયદેસરની કાર્યવાહી શરૂ કરી છે. પોલીસ હવે ઘટનાના સાક્ષીઓ અને ઉપલબ્ધ પુરાવાના આધારે સમગ્ર બનાવની તપાસ કરી રહી છે.
ફરી રસ્તા પર રખડતાં ઢોરનો મુદ્દો ચર્ચામાં
આ ઘટનાની સાથે અમદાવાદમાં રખડતાં ઢોરની સમસ્યા ફરી ચર્ચામાં આવી છે. ગુજરાત હાઇકોર્ટ દ્વારા રખડતાં ઢોર મામલે કડક અમલવારી અંગે વારંવાર ટકોર કરવામાં આવ્યા બાદ રાજ્યમાં ઢોર નિયંત્રણ માટેની નીતિ અમલમાં મૂકવામાં આવી હતી. નીતિના અમલ બાદ અમદાવાદમાં રખડતાં ઢોર સામે કાર્યવાહી તેજ કરવામાં આવી હતી. જોકે સ્થાનિક સ્તરે ફરી રસ્તાઓ પર રખડતાં ઢોર જોવા મળતાં કામગીરી અંગે સવાલો ઊભા થયા છે. ખાસ કરીને સાંજ અને રાત્રિના સમયે રસ્તાઓ પર ઢોર ખુલ્લા છોડી દેવામાં આવતા વાહનચાલકો માટે અકસ્માતનું જોખમ ઊભું થવાની ચિંતા વ્યક્ત કરવામાં આવી રહી છે.
PSI Attack Attempt: ઢોરની સાથે કર્મચારીઓની સુરક્ષાનો પણ સવાલ
રખડતાં ઢોર પકડવાની કામગીરી દરમિયાન કોર્પોરેશનની ટીમો અને પોલીસકર્મીઓને ઘણી વખત વિરોધનો સામનો કરવો પડે છે. નવા વાડજની ઘટનામાં તો પોલીસ અધિકારી પર જ લાકડીથી હુમલાનો પ્રયાસ થયો હોવાના આક્ષેપથી કામગીરી સાથે જોડાયેલા કર્મચારીઓની સુરક્ષાનો મુદ્દો પણ સામે આવ્યો છે. હાલ વાડજ પોલીસે ફરિયાદના આધારે તપાસ શરૂ કરી છે. બીજી તરફ, અમદાવાદમાં રખડતાં ઢોરની સમસ્યા પર કાબૂ મેળવવા માટે કોર્પોરેશનની કાર્યવાહી કેટલી અસરકારક રહે છે તે જોવું મહત્વનું રહેશે.
આ પણ વાંચો:પોલીસ પર હુમલો કરનાર કુખ્યાત બુટલેગર રાજસ્થાનથી ઝડપાયો
આ પણ વાંચો:બેડલા ગામે બુડલેગરને પકડવા ગયેલી પોલીસ પર હુમલો કરાયો
