Ahmedabad Nikol Youth Attack: અમદાવાદ શહેરના નિકોલ વિસ્તારમાં અસામાજિક તત્વોનો આતંક સતત વધી રહ્યો છે. નિકોલની પારંતી આવાસ યોજનાના ગેટ પાસે ગત રાત્રે મિત્રના જન્મદિવસની ઉજવણી કરીને ઘરે પરત ફરી રહેલા યુવાનોને રસ્તામાં રોકી ત્રણ શખ્સોએ ઘાતક હથિયારો વડે હુમલો કર્યો હતો. આ હુમલામાં બે યુવકોને ગંભીર ઈજાઓ પહોંચતા તેમને સિવિલ હોસ્પિટલ ખસેડવામાં આવ્યા છે.
શું હતી સમગ્ર ઘટના?
મળતી માહિતી મુજબ, ભોગ બનનાર યુવકો પોતાના મિત્રના જન્મદિવસની પાર્ટી પતાવીને ઘરે જઈ રહ્યા હતા. ત્યારે નિકોલની પારંતી આવાસ યોજના પાસે ત્રણ શખ્સોએ તેમનો રસ્તો રોક્યો હતો. કોઈ પણ કારણ વગર બોલાચાલી કરી મોન્ટુ ગોહિલ નામના શખ્સે છરી વડે યુવક પર હુમલો કર્યો હતો, જ્યારે અન્ય સાગરીતોએ લાકડીઓ વડે બેફામ માર માર્યો હતો.
જાનથી મારી નાખવાની ધમકી
હુમલાખોરો એટલા બેફામ બન્યા હતા કે તેમણે યુવાનો પર હુમલો કરવાની સાથે જાતિ વિષયક અપમાનજનક શબ્દો બોલી માનસિક રીતે પણ પીડા આપી હતી. હુમલો કર્યા બાદ ‘જાનથી મારી નાખીશું’ તેવી ધમકી આપીને ત્રણેય આરોપીઓ ઘટનાસ્થળેથી ફરાર થઈ ગયા હતા. ઘટનાની જાણ થતા જ 108 એમ્બ્યુલન્સ મારફતે ઇજાગ્રસ્તોને તાત્કાલિક સિવિલ હોસ્પિટલ સારવાર અર્થે લઈ જવામાં આવ્યા હતા.
બૂટલેગરોનો આતંક? સ્થાનિકોમાં રોષ
સ્થાનિક લોકોના જણાવ્યા અનુસાર, હુમલો કરનાર શખ્સો આ વિસ્તારમાં બૂટલેગર તરીકે જાણીતા છે અને અવારનવાર આવી દાદાગીરી કરતા હોય છે. નિકોલ જેવા વિકસતા વિસ્તારમાં ધોળા દિવસે કે જાહેર રસ્તા પર થતા આવા હુમલાઓને કારણે પોલીસની પેટ્રોલિંગ અને કાયદો-વ્યવસ્થા સામે અનેક સવાલો ઉભા થયા છે.
Nikol પોલીસની કાર્યવાહી
પીડિત યુવકો અને તેમના પરિવારજનોએ હિંમત દાખવીને નિકોલ પોલીસ સ્ટેશનમાં ફરિયાદ નોંધાવી છે. પોલીસે આ મામલે રાયોટિંગ, હુમલો અને એટ્રોસિટી એક્ટની વિવિધ કલમો હેઠળ ગુનો નોંધી આરોપીઓને પકડવા માટે ચક્રો ગતિમાન કર્યા છે.
