Ahmedabad Vadodara Highway Accident: અમદાવાદ-વડોદરા નેશનલ હાઈવે પર રવિવારે એક અત્યંત ગમખ્વાર અને રૂંવાડા ઊભા કરી દે તેવો અકસ્માત સર્જાયો હતો. ખેડા ટોલ પ્લાઝા નજીક પૂરપાટ ઝડપે દોડતી એક થાર ગાડીના ચાલકે આગળ જઈ રહેલી ઈકો ગાડીને પાછળથી એટલી જોરદાર ટક્કર મારી હતી કે ઈકો હાઈવે પર જ હવામાં ફંગોળાઈને પલટી ખાઈ ગઈ હતી. આ ગોઝારા અકસ્માતમાં ઈકોમાં સવાર 10 મુસાફરો ઘાયલ થયા છે, જેમાંથી 3 ની હાલત અત્યંત નાજુક હોવાનું જાણવા મળ્યું છે. અકસ્માત સર્જ્યા બાદ થારનો ચાલક ઉભો રહેવાને બદલે અમાનવીય રીતે ડિવાઈડર કૂદાવીને ફરાર થઈ ગયો હતો.

બેકાબૂ થારે સંતુલન ગુમાવ્યું અને સર્જાયો અકસ્માત

પ્રાપ્ત વિગતો અનુસાર, રવિવારે એક ઈકો ગાડી હાઈવેની પ્રથમ લેનમાં પોતાની નિર્ધારિત ઝડપે જઈ રહી હતી. આ દરમિયાન પાછળથી કાળ બનીને પૂરપાટ ઝડપે આવી રહેલી એક થાર ગાડીના ચાલકે અચાનક સ્ટીયરિંગ પરથી સંતુલન ગુમાવ્યું હતું. થારે ઈકો ગાડીના પાછળના ભાગે પ્રચંડ ટક્કર મારી હતી. ટક્કર એટલી ભયાનક હતી કે ઈકો ગાડી હવામાં ફંગોળાઈને માર્ગ પર જ ગોથું ખાઈ ગઈ હતી. અકસ્માતને પગલે હાઈવે પર મુસાફરોની ચીચીયારીઓ ગુંજી ઉઠી હતી અને ભારે અફરાતફરીનો માહોલ સર્જાયો હતો.

10 મુસાફરો ઘાયલ, 3 ની હાલત ગંભીર

આ ગોઝારા અકસ્માતમાં ઈકો ગાડીમાં સવાર તમામ 10 મુસાફરોને નાની-મોટી ઈજાઓ પહોંચી હતી. ઘટનાસ્થળે હાજર સ્થાનિક લોકો અને અન્ય વાહનચાલકોએ તાત્કાલિક દોડી આવીને બચાવ કામગીરી શરૂ કરી હતી. તમામ ઇજાગ્રસ્તોને 108 એમ્બ્યુલન્સ મારફતે તાત્કાલિક ખેડા સિવિલ હોસ્પિટલ ખાતે ખસેડવામાં આવ્યા હતા. તબીબી સૂત્રોના જણાવ્યા અનુસાર, 10 પૈકી 7 મુસાફરોને સામાન્ય ઈજા પહોંચી છે, જ્યારે 3 મુસાફરોની હાલત ગંભીર હોવાથી તેમની સઘન સારવાર ચાલી રહી છે.

થાર ચાલકની માનવતા નેવે

આ અકસ્માતમાં સૌથી ચોંકાવનારી બાબત થાર ચાલકની માનવતાહીનતા હતી. અકસ્માત સર્જ્યા બાદ ઈજાગ્રસ્તોને મદદ કરવાને બદલે તે ફરાર થઈ ગયો હતો. તેણે પોતાની બેફામ થાર ગાડી ડિવાઈડર પર ચડાવી દઈ સામેના ટ્રેક પર કૂદાવી હતી અને નડિયાદ તરફ અત્યંત ઝડપે હંકારી મૂકી હતી. જોકે, અકસ્માત એટલો ભયાનક હતો કે થાર ગાડીના બમ્પરનો કેટલોક ભાગ ઘટનાસ્થળે જ તૂટીને પડી ગયો હતો, જે પોલીસ માટે મહત્વનો પુરાવો બની શકે છે.

પોલીસની સઘન તપાસ શરૂ

આ અકસ્માતને કારણે નેશનલ હાઈવે પર વાહનોની લાંબી કતારો લાગી ગઈ હતી અને ભારે ટ્રાફિક જામ સર્જાયો હતો. ઘટનાની જાણ થતા જ ખેડા પોલીસનો કાફલો તાત્કાલિક ઘટનાસ્થળે પહોંચી ગયો હતો. પોલીસે ક્રેનની મદદથી પલટી ખાયેલી ઈકો ગાડીને રસ્તા પરથી હટાવીને ટ્રાફિક ક્લિયર કરાવ્યો હતો. હાલમાં પોલીસે ફરાર થાર ચાલક વિરુદ્ધ ગુનો નોંધી, ગાડીના નંબર અને સ્થળ પરથી મળેલા બમ્પર સહિતના પુરાવાઓના આધારે તેની સઘન શોધખોળ હાથ ધરી છે.

આ પણ વાંચો:ખેડા-અમદાવાદ હાઈવે પર કરૂણ અકસ્માત, એક જ પરિવારના 3 સભ્યોનાં મોત

આ પણ વાંચો:અમદાવાદ સીટીએમ નજીક BRTS ટ્રેકમાં ગંભીર અકસ્માત, મોપેડ ચાલક 60 ફૂટ ઢસડાયો

આ પણ વાંચો:અમદાવાદ-મુંબઈ નેશનલ હાઈવે પર અકસ્માત: ટ્રકે બાઈકને કચડતાં 2ના મોત