ઈન્ડિયન પ્રીમિયર લીગ (IPL)ની 15મી સીઝન પર કોરોનાનો ખતરો તોળાઈ રહ્યો છે,ત્યારે ભારતીય ક્રિકેટ કંટ્રોલ બોર્ડ (BCCI) પણ આ અંગે ગંભીર છે. બોર્ડે શનિવારે (22 જાન્યુઆરી) તમામ ફ્રેન્ચાઈઝી સાથે બેઠક યોજી હતી. વર્ચ્યુઅલ મીટિંગમાં એ વાત પર સહમતિ સધાઈ છે કે ટૂર્નામેન્ટની તમામ મેચ મહારાષ્ટ્રના બે શહેરો મુંબઈ અને પૂણેમાં યોજવામાં આવશે. યુએઈને વિકલ્પ તરીકે રાખવામાં આવ્યું છે. બીસીસીઆઈના સચિવ જય શાહે કહ્યું છે કે આઈપીએલની 15મી સીઝન માર્ચના અંતિમ સપ્તાહમાં શરૂ થશે અને મેના અંત સુધી ચાલશે. તેમણે કહ્યું- મોટાભાગના ટીમ માલિકો એ વાત પર સહમત છે કે ટૂર્નામેન્ટ ભારતમાં જ આયોજિત થવી જોઈએ. ખેલાડીઓની હરાજી 12 અને 13 ફેબ્રુઆરીએ જ થશે. તે પહેલા અમે સ્થળની જાહેરાત કરીશું.
જય શાહે વધુમાં કહ્યું- BCCI હંમેશાથી IPLની 2022 સીઝનના આયોજન અંગે ઉત્સુક રહે છે. આ વખતે બે નવી ટીમો અમદાવાદ અને લખનૌ તરીકે દેખાશે. અમે ભારતમાં જ ટૂર્નામેન્ટનું આયોજન કરવામાં કોઈ કસર છોડીશું નહીં. બીસીસીઆઈએ તેના હિતધારકોના સ્વાસ્થ્ય અને સલામતી સાથે ક્યારેય સમાધાન કર્યું નથી. અમે કોવિડ-19ના સંજોગોને ધ્યાનમાં રાખીને પ્લાન-બી પર સતત કામ કરી રહ્યા છીએ.
સમાચાર એજન્સી પીટીઆઈએ બીસીસીઆઈના સૂત્રોને ટાંકીને કહ્યું હતું કે આઈપીએલની 15મી સીઝન 27 માર્ચ (રવિવાર) અથવા 2 એપ્રિલ (શનિવાર)થી શરૂ થઈ શકે છે. લોઢા સમિતિની ભલામણો અનુસાર, આંતરરાષ્ટ્રીય મેચ અને IPL વચ્ચે ઓછામાં ઓછું 14 દિવસનું અંતર હોવું જોઈએ. ભારતીય ટીમ 18 માર્ચે શ્રીલંકા સામે ત્રણ મેચની T20 શ્રેણીની છેલ્લી મેચ રમશે. આવી સ્થિતિમાં ટુર્નામેન્ટનું આયોજન એપ્રિલમાં જ શક્ય છે, પરંતુ જય શાહનું નિવેદન જોતા એવું લાગી રહ્યું છે કે બોર્ડ કોઈ અન્ય રસ્તો કાઢશે.
ટૂર્નામેન્ટનું આયોજન ભારતમાં જ કરાવવા માટે બોર્ડ તમામ પ્રયાસો કરી રહ્યું છે. તેથી જ તેણે મહારાષ્ટ્રની પસંદગી કરી છે. પ્રથમ મેચ મુંબઈમાં યોજાય તેવી શક્યતા છે. ચેન્નાઈ સુપર કિંગ્સના એન. શ્રીનિવાસન, કોલકાતા નાઈટ રાઈડર્સના શાહરૂખ ખાન, પંજાબ કિંગ્સના પ્રીતિ ઝિન્ટા અને દિલ્હી કેપિટલ્સના પાર્થ જિંદાલ સહિત અન્ય ટીમોના માલિકો પણ બેઠકમાં હાજર હતા.
મુંબઈ અને પુણેના ચાર મેદાન એકબીજાની નજીક હોવાથી ત્યાં ઈવેન્ટ્સ સરળતાથી થઈ શકે છે. પુણેમાં મહારાષ્ટ્ર ક્રિકેટ એસોસિએશન સ્ટેડિયમ સિવાય મુંબઈના વાનખેડે સ્ટેડિયમ, ક્રિકેટ ક્લબ ઑફ ઈન્ડિયા (બ્રેબોર્ન સ્ટેડિયમ) અને ડીવાય પાટિલ સ્ટેડિયમમાં મેચો યોજવામાં આવી શકે છે. આ દરમિયાન દર્શકોને સ્ટેડિયમમાં પ્રવેશવા દેવામાં આવશે નહીં. મુંબઈ અને પૂણેમાં રમાનારી મેચ માટે ખેલાડીઓએ એરપોર્ટ જવું પડશે નહીં. તેઓ બસમાં મુસાફરી કરી શકે છે. આવી સ્થિતિમાં બહારના લોકોથી અંતર જાળવવામાં આવશે.
આ પહેલા શનિવારે IPL એ હરાજીમાં ભાગ લેવા માટે રજીસ્ટ્રેશન કરાવનારા ખેલાડીઓ અંગે સત્તાવાર જાહેરાત કરી હતી. IPLની હરાજી 12 અને 13 ફેબ્રુઆરીએ બેંગલુરુમાં થવાની છે. આ અંગે બોર્ડે ફરી એકવાર તમામ ફ્રેન્ચાઈઝીઓને કહ્યું છે કે હરાજીની તારીખોમાં કોઈ ફેરફાર કરવામાં આવશે નહીં. તેમાં ભાગ લેવા માટે વિશ્વભરમાંથી 1214 ખેલાડીઓએ નોંધણી કરાવી છે. આમાંથી 350 થી 400 ખેલાડીઓને શોર્ટલિસ્ટ કરવામાં આવશે. IPL 2022ની હરાજી માટે કુલ 1214 ખેલાડીઓ (896 ભારતીય અને 318 વિદેશી) એ નોંધણી કરાવી છે, એમ IPLએ એક નિવેદનમાં જણાવ્યું હતું.
