Ahmedabad News : અમદાવાદમાં છેતરપિંડીનો ચોંકાવનારો કિસ્સો સામે આવ્યો છે. જેમાં અમદાવાદ મ્યુનિસિપલ કોર્પોરેશનમાં સફાઈ કર્મચારી તરીકે કામ કરતા યુવકના નામથી કોઈ અજાણ્યા શખ્સે ડિજીટલ ખાતુ ખોલાવ્યું હતું. બાદમાં આ શખ્સે તેના આધારે 10 લાખ રૂપિયાની લોન લઈ લીધી હતી. બીજીતરફ લોનની ભરપાઈ તથા હપ્તા માટે સફાઈ કર્મચારીને અવારનવાર ફોન આવવા લાગ્યા હતા. જેને પગલે યુવકે આ અંગે સાઇબર ક્રાઇમમાં લોન લેનાર અજાણ્યા શખ્સ સામે ફરિયાદ નોંધાવતા પોલીસે તપાસ શરૂ કરી છે.
બહેરામપુરામાં રહેતો બીપીન પરમાર નામનો 23 વર્ષીય યુવક અમદાવાદ મ્યુનિસિપલ કોર્પોરેશનમાં સફાઈ કર્મચારી તરીકે નોકરી કરે છે. બીપીન વર્ષ 2021ની સાલમાં પાર્ટટાઈમ તરીકે બહેરામપુરામાં લાઠી બજારમાં આવેલી એક કારખાનામાં નોકરી કરતો હતો. ત્યારે કારખાના માલિકે પગાર માટે બેંક એકાઉન્ટ ખોલાવવું પડશે, તેમ કહીને બીપીનના આધાર કાર્ડ, પાસબુક અને અન્ય ડોક્યુમેન્ટ આપ્યા હતા. પરંતુ તેની જાણમાં કોઈ એકાઉન્ટ ખોલ્યું નહતું.
બીપીને બે મહિના નોકરી કરી તેનો પગાર પણ તેને રોકડેથી ચૂકવવામાં આવ્યો હતો. ત્યારબાદ બીપીને નોકરી છોડી દીધી હતી.26 ઓક્ટોબર, 2024ના રોજ બીપીનના ઘરે એક્સિસ બેંકમાંથી બે માણસો આવ્યા હતા. જેમણે બીપીન જણાવ્યું હતું કે, તમારા નામથી એક્સિસ બેંકમાં 10 લાખની લોન છે, જેના છેલ્લા બે હપ્તા બાઉન્સ થયા છે.
તેથી તમારે 30000 ભરવા પડશે. જોકે બીપીને આ પ્રકારની કોઈ લોન લીધી ન હતી, તેથી તે બેંકમાં જઈને તપાસ કરી તો બેંકમાં તેના નામનું એકાઉન્ટ ખુલી ગયું હતું અને તેમાં રજીસ્ટર મોબાઈલ નંબર પણ હતો. બીપીન આ બધાથી અજાણ હતો, પરંતુ તેના પર અવારનવાર બેંકમાંથી લોનના હપ્તા ભરવા માટેનો ફોન આવતો હતો. જેથી બીપીને આ અંગે સાઇબર ક્રાઇમમાં અજાણ્યા વ્યક્તિ વિરુદ્ધ ફરિયાદ નોંધાવી હતી. જેને આધારે પોલીસે તપાસ હાથ ધરી છે.
આ પણ વાંચો:ભાવનગરમાં ભૂવા પર દુષ્કર્મની ફરિયાદ, પરિવારને મારી નાખવાની ધમકી આપતો
આ પણ વાંચો:નંદેસરીમાં કોંગ્રેસનાં નેતાનાં પુત્ર સામે એટ્રોસિટી અને દુષ્કર્મની ફરિયાદ
