Ahmedabad News:અમદાવાદના મેઘાણીનગર વિસ્તારમાં વધુ એક હત્યાની ઘટના સામે આવી છે. એક સામાન્ય ઝગડામાં ચાર આરોપીઓએ એક યુવાનની તીક્ષ્ણ હથિયાર વડે ઘા મારીને ક્રૂરતાપૂર્વક હત્યા કરી હતી. માહિતી અનુસાર આ ઘટનામાં મેઘાણીનગર પોલીસે હત્યાના મુખ્ય સૂત્રધારની ધરપકડ કરી છે. પોલીસ કસ્ટડીમાં રહેલા આરોપીનું નામ હિતેશ ઉર્ફે બુચિયો પટણી છે. આ આરોપીએ તેના મિત્રો સાથે મળીને હિંમત સિંહની છરી મારીને હત્યા (Murder) કરી હતી. હિતેશ ઉર્ફે બુચિયો પટણી, મેઘાણીનગરના છેલ્લા બસ સ્ટોપ પાસે તેની રિક્ષા સાથે ઉભો હતો ત્યારે હિંમત સિંહ પવાર અને આરોપી વચ્ચે રિક્ષાનો હુડ ફાડવા બાબતે ઝઘડો થયો.
હિતેશ પટણી, તેના ભાઈ પીકાચુ પટણી, અજય પટણી અને નિકુલ ઉર્ફે દતો પટણી સાથે મળીને હિંમત સિંહ પર છરી વડે હુમલો કર્યો હતો. ગંભીર રીતે ઘાયલ હિંમત સિંહને સારવાર માટે સિવિલ હોસ્પિટલમાં દાખલ કરવામાં આવ્યો હતો, જ્યાં સારવાર દરમિયાન તેનું મોત (Death) નીપજ્યું હતું. મૃતકના પિતાએ આરોપ લગાવ્યો છે કે હત્યા હુડ તોડવાના હેતુથી નહીં, પરંતુ લૂંટના હેતુથી કરવામાં આવી હતી. વધુમાં, મૃતકની બહેને આરોપ લગાવ્યો છે કે સિવિલ હોસ્પિટલમાં (Civil Hospital) તેની યોગ્ય સારવાર કરવામાં આવી ન હતી.
પોલીસ તપાસમાં જાણવા મળ્યું છે કે મૃતક હિંમત સિંહના પિતા નિવૃત્ત લશ્કરી સૈનિક છે, જ્યારે તેનો પુત્ર હિંમત સિંહ નાની-મોટી નોકરી કરતો હતો અને આરોપી રિક્ષાચાલક હતો. આરોપી અને મૃતક બંને મેઘાણીનગર વિસ્તારમાં રહેતા હતા અને તેમની સામે અગાઉ ગુનાઓ નોંધાયેલા છે. રિક્ષાચાલકની હત્યા અંગત ઝઘડાથી થઈ છે કે અન્ય કોઈ કારણોસર તે અંગે પોલીસે તપાસ શરૂ કરી છે. હાલમાં, મેઘાણી નગર પોલીસે મુખ્ય આરોપી હિતેશ પટણીની ધરપકડ કરી છે. આરોપી પીકાચુ પટણી, અજય પટણી અને નિકુલ ઉર્ફે દાતો પટણી ફરાર હોવાથી, પોલીસે તેમને શોધવા માટે અલગ-અલગ ટીમો બનાવી છે. હત્યા પાછળનો હેતુ જાણવા માટે તપાસ શરૂ કરવામાં આવી છે.
