બિહારમાં ઝેરી દારૂના કારણે મૃત્યુઆંક વધીને 36 થઈ ગયો છે. ગોપાલગંજમાં અત્યાર સુધીમાં 20 અને બેતિયામાં 16 લોકોના મોત થયા છે. આ ઘટના બાદ વિપક્ષ નીતીશ સરકાર પર પ્રહારો કરી રહ્યા છે. ઘટના બાદ મુખ્યમંત્રી નીતિશ કુમારે કહ્યું કે તહેવાર પછી અમે દારૂબંધીને લઈને સમીક્ષા બેઠક યોજીશું અને દારૂબંધીને અસરકારક રીતે લાગુ કરવા માટે એક મોટું અભિયાન ચલાવવામાં આવશે.
મુખ્યમંત્રી નીતીશે કહ્યું કે અમે પહેલાથી કહી રહ્યા હતા કે ખોટા લોકોની જાળમાં ન ફસો. પોલીસ અને વહીવટીતંત્ર દ્વારા સતત કાર્યવાહી કરવામાં આવે છે. લોકોની ધરપકડ કરવામાં આવે છે, ગેરકાયદેસર દારૂ જપ્ત કરવામાં આવે છે. લોકોને જાગૃત કરવા ફરી એકવાર વ્યાપક જનજાગૃતિ અભિયાનની જરૂર છે. છઠ પર્વ બાદ 16 નવેમ્બરે દારૂબંધી અંગે વિસ્તૃત સમીક્ષા બેઠક યોજાશે.
બિહારના આબકારી મંત્રી સુનીલ કુમારે કહ્યું કે પોલીસ અધિકારીઓએ ઘટનાસ્થળનું નિરીક્ષણ કર્યું છે. ઘણી જગ્યાએ દરોડા પાડવામાં આવી રહ્યા છે અને કેટલાક લોકોની ધરપકડ પણ કરવામાં આવી છે. હું સ્વીકારું છું કે સ્થાનિક સ્તરે કેટલીક બેદરકારીને કારણે આ ઘટના બની છે. બંને સ્ટેશન ઈન્ચાર્જને સસ્પેન્ડ, 1 ગાર્ડને પણ સસ્પેન્ડ કરવામાં આવ્યો છે. તેમણે કહ્યું કે દારૂબંધી બાદ અમે ઘણા કડક પગલાં લીધા છે. અત્યાર સુધીમાં 187 લાખ લીટરથી વધુ દારૂ ઝડપાયો છે, 3 લાખથી વધુ લોકોની ધરપકડ કરવામાં આવી છે અને 60,000 જેટલા વાહનો જપ્ત કરવામાં આવ્યા છે. અમે સરકારી અધિકારીઓ સહિત દરેક સામે કાર્યવાહી કરી રહ્યા છીએ. અત્યાર સુધીમાં 700થી વધુ અધિકારીઓને સસ્પેન્ડ કરવામાં આવ્યા છે
ગોપાલગંજ ડીએમ નવલ કિશોર ચૌધરીએ કહ્યું કે અત્યાર સુધી જે તથ્યો સામે આવ્યા છે તે દર્શાવે છે કે સ્પિરિટથી દારૂ બનાવવાનો પ્રયાસ કરવામાં આવ્યો હતો. એફએસએલનો રિપોર્ટ આવ્યા બાદ લોકોના નિવેદનના આધારે ચોક્કસ કહી શકાશે કે ઝેરી દારૂ પીવાથી મોત થયા છે, તેની સત્તાવાર પુષ્ટિ થઈ શકે તેમ નથી.
