Udaipur-Ahmedabad News: રાજસ્થાન ATS એ ઉદયપુર-અમદાવાદ રેલ માર્ગ પર કેવડા કી નાળ પર સ્થિત ઓઢા બ્રિજ પર ટ્રેક બ્લાસ્ટના સંબંધમાં કાર્યવાહી કરતી વખતે એક સગીર સહિત 3 લોકોની ધરપકડ કરી છે. હાલ ત્રણેય આરોપીઓની ધરપકડ કર્યા બાદ તેમને ઉદયપુરમાં રાખવામાં આવ્યા છે અને તેમની પૂછપરછ કરવામાં આવી રહી છે. ATS દ્વારા ધરપકડ કરાયેલા ત્રણેય આરોપીઓ એકલિંગપુરા પોલીસ સ્ટેશન જવાર માઈન્સના રહેવાસી છે. ADG SOG/ATS અશોક રાઠોડે જણાવ્યું કે ધરપકડ કરાયેલા આરોપીઓ વિસ્ફોટકો તૈયાર કરવામાં અને તેને પ્લાન્ટ કરવામાં નિષ્ણાત છે. જો કે, હજુ સુધી ત્રણેય આરોપીઓના કોઈ આતંકવાદી સંગઠન કે અન્ય કોઈ સંગઠન સાથે સંબંધ હોવાનું જાણવા મળ્યું નથી. આરોપીની પ્રાથમિક પૂછપરછમાં એવી હકીકતો સામે આવી છે કે, એક આરોપીની જમીન રેલવે અને હિન્દુસ્તાન ઝિંક દ્વારા સંપાદિત કરવામાં આવી હતી, જેનું વળતર તેમને મળ્યું નથી. જેનાથી કંટાળીને તેમણે આ પગલું ભર્યું હતું.
એડીજી અશોક રાઠોડે જણાવ્યું કે, રેલ્વે ટ્રેક પર થયેલા વિસ્ફોટના સંબંધમાં 32 વર્ષીય ધૂલચંદ મીણા સહિત તેના બે સાથીઓની ધરપકડ કરવામાં આવી છે. 1974-75 અને 1980માં ધુલચંદ મીણાની જમીન રેલવે અને હિન્દુસ્તાન ઝિંક દ્વારા હસ્તગત કરવામાં આવી હતી. આ માટે તેને ન તો વળતર મળ્યું કે ન નોકરી. આ માટે ધુલચંદ છેલ્લા ઘણા સમયથી સતત પ્રયાસ કરી રહ્યા હતા, પરંતુ ક્યાંયથી મદદ મળી ન હતી. ત્યારબાદ તેણે ગુસ્સામાં આ ઘટનાને અંજામ આપ્યો હતો. ઘટનાના દિવસે પ્રકાશ મીણા તેના સાથીદારો સાથે બાઇક પર સ્થળ પર પહોંચ્યા હતા. રેલ્વે ટ્રેક પરથી ટ્રેન પસાર થયા બાદ આરોપીઓએ બંને ટ્રેક પર બોમ્બના બંડલ રાખ્યા હતા અને તેને આગ ચાંપી દીધી હતી. જેના કારણે જોરદાર વિસ્ફોટ થયો અને રેલવે ટ્રેકને નુકસાન થયું. તેમજ અનેક પ્લેટો અને નટ બોલ્ટ ઉખડી ગયા હતા.
પ્રાથમિક પૂછપરછમાં એવું બહાર આવ્યું છે કે તેમણે આ વિસ્ફોટક અંકુશ સુવાલકા નામના વ્યક્તિ પાસેથી ખરીદ્યો હતો. આ પછી સુવાલકાને પણ કસ્ટડીમાં લેવામાં આવ્યો છે, જેની પૂછપરછ કરવામાં આવી રહી છે. ADG અશોક રાઠોડે જણાવ્યું કે માત્ર ગુસ્સામાં આટલી મોટી ઘટનાને અંજામ આપવો ખૂબ જ સંવેદનશીલ ઘટના છે. હાલ આ કેસમાં ATSની તપાસ ચાલી રહી છે. નવી હકીકતો બહાર આવતાં તેના આધારે તપાસ આગળ ધપાવવામાં આવશે.
આ પણ વાંચો: નિર્ણય/હવે સ્વતંત્રતા સેનાનીઓને હવે 10ને બદલે 20 હજાર પેન્શન મળશે,જાણો
