Bhuj Smritivan Water Pipeline Leakage: એકતરફ ઉનાળાની કાળઝાળ ગરમીમાં સમગ્ર કચ્છ પંથક સળગી રહ્યો છે અને અનેક વિસ્તારોમાં પીવાના પાણી માટે ત્રાહિમામ પોકાર જોવા મળી રહ્યો છે, ત્યારે ભુજ શહેરમાંથી નગરપાલિકા અને પાણી પુરવઠા તંત્રની ઘોર બેદરકારી ઉઘાડી પાડતા ચોંકાવનારા દ્રશ્યો સામે આવ્યા છે. ભુજના પ્રખ્યાત પ્રવાસન સ્થળ સ્મૃતિવન નજીકથી પસાર થતી મુખ્ય પાઇપલાઇનના એરવાલ્વમાં મોટું લીકેજ સર્જાતા લાખો લીટર કિંમતી પીવાનું પાણી રસ્તા પર નદીની જેમ વહી ગયું હતું. પાણીની તીવ્ર અછત વચ્ચે તંત્રની આ લાપરવાહીને પગલે સ્થાનિક નાગરિકોમાં ભારે આક્રોશ જોવા મળી રહ્યો છે.
Bhuj : હાઈ પ્રેશર સાથે રસ્તા પર ઉડ્યા પાણીના ફુવારા
પ્રાપ્ત વિગતો અનુસાર, ભુજ શહેરમાં સ્મૃતિવન જવાના મુખ્ય માર્ગ પાસે આવેલી પાણીની મુખ્ય લાઇનના એરવાલ્વમાં અચાનક મોટો ભંગાણ પડતાં પાણી ભારે પ્રેશર સાથે બહાર ફેંકાવા લાગ્યું હતું. લાઈનમાં પાણીનું પ્રેશર એટલું વધારે હતું કે રસ્તા પર પાણીના ઊંચા-ઊંચા ફુવારા ઉડતા જોવા મળ્યા હતા. જોતજોતામાં લાખો લીટર શુદ્ધ અને પીવાનું ચોખ્ખું પાણી રસ્તા પર વહી જતાં આખો રોડ પાણી-પાણી થઈ ગયો હતો, જેના કારણે ત્યાંથી પસાર થતા ટુ-વ્હીલર અને ફોર-વ્હીલર ચાલકોને પણ ભારે મુશ્કેલીનો સામનો કરવો પડ્યો હતો.
રસ્તા પર મફતના પાણીથી લોકો કાર-બાઈક ધોવા લાગ્યા!
એકબાજુ નગરપાલિકા તંત્ર લોકોને પાણી બચાવવાની અને તેનો સદ્ઉપયોગ કરવાની મોટી-મોટી સલાહ આપે છે, પરંતુ આ મુખ્ય લાઈનના લીકેજની જાણ હોવા છતાં તંત્ર કલાકો સુધી કુંભકર્ણ નિદ્રામાં પોઢી રહ્યું હતું. તંત્રની આ ઢીલી નીતિનો લાભ ઉઠાવવા માટે સ્થાનિક કાર ચાલકો અને બાઇક સવારો રસ્તા પર લાઈન લગાવીને ઊભા રહી ગયા હતા. ધોળા દિવસે જાહેર રસ્તા પર ફુવારાની જેમ વહી રહેલા આ સરકારી પાણીથી અનેક લોકો પોતાની મોંઘીદાટ ગાડીઓ ધોતા કેમેરામાં કેદ થયા હતા, જે દ્રશ્યો સોશિયલ મીડિયા પર ભારે વાયરલ થઈ રહ્યા છે.
એક તરફ પાણીની તંગી અને બીજી તરફ લાપરવાહી
ભુજના અનેક પછાત અને છેવાડાના વિસ્તારોમાં લોકોને પૂરતું અને નિયમિત પીવાનું પાણી ન મળવાની ફરિયાદો દરરોજ ઉઠી રહી છે, ત્યારે તંત્રની આવી બેદરકારીને કારણે લાખો લીટર પાણી ગટરો અને રસ્તાઓ પર વેડફાઈ ગયું છે. સ્થાનિક રહીશોમાં આ દ્રશ્યો જોઈને નગરપાલિકાના સત્તાધીશો સામે ભારે રોષ ફાટી નીકળ્યો છે. જનતા દ્વારા માંગ કરવામાં આવી રહી છે કે જવાબદાર અધિકારીઓ સામે કડક પગલાં લેવાય અને વહેલી તકે આ એરવાલ્વનું કાયમી સમારકામ કરવામાં આવે.
આ પણ વાંચો: ભુજ નગરપાલિકામાં AIMIMની એન્ટ્રી, વોર્ડ-1માં આખી પેનલ જીતી
આ પણ વાંચો: ભુજ નગરપાલિકાની ખુલી પોલ, સ્ટેશન વિસ્તારમાં બે ફૂટથી વધુ પાણી ભરાયા
આ પણ વાંચો: ભુજમાં નગરપાલિકાના કર્મચારીએ દિવાલ પર લોહીથી સુસાઇડ નોટ લખી ટુંકાવ્યું જીવન
