Nitish Kumar Resignation: બિહારના રાજકારણમાં આજે એક ઐતિહાસિક પરિવર્તનની શરૂઆત થઈ છે. બિહારના વિકાસ પુરુષ ગણાતા નીતિશ કુમારે મંગળવારે (14 એપ્રિલ, 2026) મુખ્યમંત્રી પદ પરથી રાજીનામું આપી દીધું છે. સવારે પોતાની સરકારની છેલ્લી કેબિનેટ બેઠક બોલાવ્યા બાદ નીતિશ કુમાર સીધા રાજભવન પહોંચ્યા હતા અને રાજ્યપાલ સૈયદ અતા હસનૈનને પોતાનું રાજીનામું સુપરત કર્યું હતું. આ સાથે જ બિહારમાં છેલ્લા બે દાયકાથી ચાલતા ‘નીતિશ યુગ’ પર વિરામ મુકાયો છે.

અંતિમ કેબિનેટ બેઠકમાં ‘સુશાસન બાબુ’ થયા ભાવુક

રાજીનામું આપતા પહેલા મળેલી કેબિનેટ બેઠકમાં અત્યંત ભાવુક દ્રશ્યો જોવા મળ્યા હતા. વર્ષ 2005થી બિહારની કાયાપલટ કરનાર નીતિશ કુમાર પોતાના જૂના દિવસો યાદ કરીને ભાવુક થઈ ગયા હતા. તેમણે ગદગદિત હૃદયે કહ્યું કે, “જ્યારથી હું સત્તામાં આવ્યો, ત્યારથી મારાથી બનતા તમામ પ્રયાસો મેં બિહારના વિકાસ માટે કર્યા છે.” નીતિશ કુમારને ભાવુક થતા જોઈ બેઠકમાં હાજર રહેલા જેડીયુ અને ભાજપના અનેક મંત્રીઓની આંખો પણ ભીની થઈ ગઈ હતી.

સોશિયલ મીડિયા પર ભાવુક પોસ્ટ

રાજીનામું આપ્યા બાદ નીતિશ કુમારે સોશિયલ મીડિયા પ્લેટફોર્મ ‘X’ પર એક વિસ્તૃત પોસ્ટ કરી હતી. તેમણે લખ્યું કે, “24 નવેમ્બર 2005ના રોજ રાજ્યમાં પ્રથમ વખત NDA સરકાર બની ત્યારથી અમે ‘ન્યાય સાથે વિકાસ’ના મંત્રને આત્મસાત કર્યો છે. હિન્દુ, મુસ્લિમ, પછાત, દલિત કે મહિલાઓ- અમે તમામ વર્ગો માટે કામ કર્યું છે. હવે અમે મુખ્યમંત્રી પદ છોડવાનો નિર્ણય કર્યો છે.” તેમણે બિહારના વિકાસમાં સહયોગ આપવા બદલ વડાપ્રધાન નરેન્દ્ર મોદીનો પણ ખાસ આભાર માન્યો હતો.

Nitish Kumarની રાજકીય સફર

નીતિશ કુમાર ભારતીય રાજનીતિના એવા દિગ્ગજ નેતા છે જેમણે ગઠબંધન બદલવા છતાં પણ મુખ્યમંત્રીની ખુરશી પર પોતાની પકડ જાળવી રાખી હતી. તેમની સફર પર એક નજર:

1985: પહેલીવાર હરનોત બેઠક પરથી ધારાસભ્ય બન્યા.

1998-2004: અટલ બિહારી વાજપેયીની સરકારમાં રેલવે અને કૃષિ મંત્રી તરીકે દેશમાં નામના મેળવી.

2000: પહેલીવાર CM બન્યા, પણ માત્ર 7 દિવસમાં રાજીનામું આપ્યું.

2005: ભાજપ સાથે મળીને પૂર્ણ બહુમતી સાથે બિહારની કમાન સંભાળી.

2025: બિહાર વિધાનસભામાં ઐતિહાસિક વિજય મેળવી 10મી વખત મુખ્યમંત્રી બનીને ભારતના રાજકારણમાં નવો રેકોર્ડ બનાવ્યો.

નવી સરકારને માર્ગદર્શન આપવાની ખાતરી

નીતિશ કુમારે રાજીનામું ભલે આપ્યું હોય, પરંતુ તેમણે સ્પષ્ટ કર્યું છે કે બિહારનો વિકાસ અટકવો જોઈએ નહીં. તેમણે નવી બનનારી સરકારને શુભેચ્છાઓ પાઠવતા કહ્યું કે, જ્યારે પણ જરૂર પડશે ત્યારે તેમનું માર્ગદર્શન અને સહયોગ નવી સરકારને મળતો રહેશે. જેડીયુના નેતા લેશી સિંહ અને ભાજપના ધારાસભ્ય લાખેન્દ્ર કુમારે નીતિશ કુમારને ‘વડીલ અને માર્ગદર્શક’ ગણાવીને તેમને શ્રદ્ધાંજલિ સમાન સન્માન આપ્યું હતું.

આ પણ વાંચો:બિહારમાં નવી સરકાર બનાવવાનો દાવો નીતિશ કુમાર રજૂ કરશે

આ પણ વાંચો:શું નીતિશ કુમાર CM બનશે કે બિહારને આ વખતે નવો મુખ્યમંત્રી મળશે?

આ પણ વાંચો:નીતિશ કુમારે બોલાવી કટોકટીની બેઠક,ધર્મેન્દ્ર પ્રધાને કહ્યું 99%