Dr Anil Patel BJP: ગુજરાતમાં સ્થાનિક સ્વરાજ્યની ચૂંટણીમાં ફોર્મ ખેંચાઈ જવાના અને ‘ઓપરેશન લોટસ’ ના ડરથી કોંગ્રેસે પોતાના ઉમેદવારોને અજ્ઞાત સ્થળે (સેફ હાઉસમાં) સંતાડવાનું શરૂ કર્યું છે. કોંગ્રેસની આ રણનીતિ પર હવે ભારતીય જનતા પાર્ટીએ (BJP) આકરા પ્રહાર કર્યા છે. પ્રદેશ ભાજપના મુખ્ય પ્રવક્તા ડૉ. અનિલ પટેલે કોંગ્રેસના ‘રિસોર્ટ પોલિટિક્સ’ ની આકરી ઝાટકણી કાઢતા જણાવ્યું છે કે કોંગ્રેસને પોતાના જ ઉમેદવારો પર કોઈ વિશ્વાસ રહ્યો નથી.
ભાજપનો કટાક્ષ: કોંગ્રેસના ત્રણ ‘અભિયાન’
કોંગ્રેસના ઉમેદવારોને અંડરગ્રાઉન્ડ કરવાના મુદ્દે મીડિયા સમક્ષ પ્રતિક્રિયા આપતા ડૉ. અનિલ પટેલે એક પછી એક શાબ્દિક બાણ છોડ્યા હતા. તેમણે કોંગ્રેસની મજાક ઉડાવતા કહ્યું કે,
“કોંગ્રેસે ચૂંટણી જાહેર થઈ ત્યારે સૌથી પહેલા ‘ઉમેદવાર શોધો અભિયાન’ ચલાવવું પડ્યું હતું
“હવે, ફોર્મ ભરાયા બાદ કોંગ્રેસે ‘ઉમેદવાર સંતાડો અભિયાન’ શરૂ કર્યું છે.”
“અને જ્યારે ચૂંટણીના પરિણામ આવશે, ત્યારે કોંગ્રેસનું ‘મોં સંતાડો અભિયાન’ ચાલશે!”
‘કોંગી નેતાએ જ કબૂલ્યું કે ટિકિટ માટે પૈસા મંગાય છે’
ઉમેદવારો પર અવિશ્વાસના મુદ્દે વાત કરતા ડૉ. અનિલ પટેલે કોંગ્રેસની આંતરિક જૂથબંધી અને ભ્રષ્ટાચાર પર નિશાન સાધ્યું હતું. તેમણે એક ગંભીર આક્ષેપ કરતા જણાવ્યું કે, “કોંગ્રેસના જ એક નેતાએ જાહેરમાં કબૂલ્યું છે કે તેમની પાર્ટીમાં ચૂંટણીની ટિકિટ આપવા માટે પૈસા માંગવામાં આવે છે. આવી સ્થિતિમાં પાર્ટીને પોતાના કાર્યકરો કે ઉમેદવારો પર ક્યાંથી વિશ્વાસ હોય?”
28મી તારીખે કોંગ્રેસને વાસ્તવિકતા સમજાશે: Dr Anil Patel
ડૉ. અનિલ પટેલે અંતમાં દાવો કર્યો હતો કે કોંગ્રેસ ગમે તેટલા ઉમેદવારોને અજ્ઞાત સ્થળે છુપાવી દે, પરંતુ પ્રજાનું સમર્થન માત્ર વિકાસ અને ભાજપની સાથે જ છે. તેમણે કોંગ્રેસને પડકાર ફેંકતા કહ્યું કે, “આવનારી 28મી તારીખે (મતદાન/પરિણામના દિવસે) કોંગ્રેસને તેમની વાસ્તવિક સ્થિતિ શું છે તેની બરાબર ખબર પડી જશે.” અત્રે ઉલ્લેખનીય છે કે, સુરત, કલોલ, રાજકોટ અને નવસારીમાં ભાજપ દ્વારા કેટલીક બેઠકો બિનહરીફ જીતી લેવાયા બાદ ડઘાઈ ગયેલી કોંગ્રેસે પોતાના 170 થી વધુ ઉમેદવારોને અજ્ઞાત સ્થળે ખસેડી દીધા છે, જેને લઈને હવે રાજકારણ ગરમાયું છે.
આ પણ વાંચો:સ્થાનિક સ્વરાજ્યની ચૂંટણીઃ ભરૂચમાં સ્થાનિકો સાથે ચા-નાસ્તાની મજા માણતા નાયબ મુખ્યમંત્રી હર્ષ સંઘવી
આ પણ વાંચો:વડોદરામાં પોસ્ટર વોરથી ચૂંટણી પહેલા રાજકીય ગરમાવો, ગોત્રી-ભાયલી વિસ્તારમાં વિરોધનાં પોસ્ટર
આ પણ વાંચો: સ્થાનિક સ્વરાજ્યની ચૂંટણી માટે ભાજપના વલસાડ જિલ્લા-તાલુકા પંચાયત અને નપાના ઉમેદવાર જાહેર
