Usa News : અમેરિકામાં ગ્રીનલેન્ડ (Greenland) ને પોતાના કબજામાં લઈ તેને 51મું રાજ્ય બનાવવા માટેનું વિવાદાસ્પદ બિલ રજૂ કરવામાં આવ્યું છે. અમેરિકન સાંસદ રેન્ડી ફાઇને સોમવારે ‘ગ્રીનલેન્ડ એનેક્સેશન એન્ડ સ્ટેટહુડ એક્ટ’ નામે આ બિલ રજૂ કર્યું છે. બિલનો હેતુ અમેરિકી સરકારને ગ્રીનલેન્ડને હસ્તગત કરીને બાદમાં તેને અમેરિકાનું રાજ્ય બનાવવાનો કાનૂની અધિકાર આપવાનો છે.
સાંસદ રેન્ડી ફાઇને સોશિયલ મીડિયા મારફતે આ બિલ અંગે માહિતી આપતા જણાવ્યું હતું કે ગ્રીનલેન્ડ (Greenland) પર રશિયા અને ચીનના વધતા પ્રભાવને અટકાવવા માટે આ પગલું જરૂરી છે. બિલ અનુસાર, જો ગ્રીનલેન્ડ અમેરિકાનું ક્ષેત્ર બને તો તેના સ્ટેટહુડ માટે જરૂરી તમામ કાનૂની અને બંધારણીય ફેરફારો અંગે રાષ્ટ્રપતિ દ્વારા કોંગ્રેસને વિગતવાર રિપોર્ટ સોંપવામાં આવશે.
હાલ આ બિલ માત્ર રજૂ થયું છે અને તેને હાઉસ ઓફ રિપ્રેઝન્ટેટિવ્સ તથા સેનેટ બંનેમાં પાસ થવું આવશ્યક છે. નિષ્ણાતોનું માનવું છે કે આ બિલ પાસ થવું અત્યંત મુશ્કેલ છે, કારણ કે તે આંતરરાષ્ટ્રીય કાયદા અને સંપ્રભુતાના સિદ્ધાંતોના વિરોધમાં જાય છે. ગ્રીનલેન્ડ (Greenland) છેલ્લા લગભગ 300 વર્ષથી ડેનમાર્કના નિયંત્રણ હેઠળ છે.
ટ્રમ્પનું ખુલ્લું સમર્થન
અમેરિકાના રાષ્ટ્રપતિ ડોનાલ્ડ ટ્રમ્પે આ બિલને ખુલ્લેઆમ સમર્થન આપ્યું છે. ટ્રમ્પે જણાવ્યું કે ગ્રીનલેન્ડ (Greenland) અમેરિકાની રાષ્ટ્રીય સુરક્ષા માટે અત્યંત મહત્વપૂર્ણ છે. તેમના કહેવા પ્રમાણે, જો અમેરિકા ગ્રીનલેન્ડ પર કાબૂ નહીં મેળવે તો રશિયા અને ચીન ત્યાં પોતાનો પ્રભાવ વધારી દેશે, જે અમેરિકાની સુરક્ષા માટે ખતરો બની શકે છે.
ટ્રમ્પ પ્રશાસન દ્વારા ગ્રીનલેન્ડના લોકોને આકર્ષવા માટે આર્થિક પ્રોત્સાહન આપવાની સંભાવનાઓ પર પણ ચર્ચા કરવામાં આવી છે. જોકે, ડેનમાર્ક અને ગ્રીનલેન્ડના અધિકારીઓએ આ વિચારને અપમાનજનક ગણાવી તેની કડક ટીકા કરી છે.
બિલ પાસ થશે તો શું બદલાશે?
જો આ બિલ કાયદામાં રૂપાંતરિત થાય તો અમેરિકાના રાષ્ટ્રપતિને ગ્રીનલેન્ડ (Greenland) ને અમેરિકી ક્ષેત્રમાં સામેલ કરવા માટે વિશેષ અધિકાર મળશે. તેમાં ડેનમાર્ક સાથે વાટાઘાટો કરવી કે અન્ય કાનૂની પગલાં લેવાનું સામેલ રહેશે.
કબજો સફળ થયા બાદ ગ્રીનલેન્ડ પહેલા અમેરિકી ટેરિટરી બનશે અને ત્યારબાદ તેને રાજ્ય બનાવવાની પ્રક્રિયા શરૂ થશે. આ માટે ગ્રીનલેન્ડને અમેરિકી બંધારણ અનુસાર પોતાનું બંધારણ તૈયાર કરવું પડશે. કોંગ્રેસની મંજૂરી બાદ તે અમેરિકાનું પૂર્ણ રાજ્ય બની શકે છે, જેમ કે ભૂતકાળમાં અલાસ્કા બન્યું હતું.
સૈન્ય વિકલ્પોની ચર્ચા
આ પહેલા ટ્રમ્પે ગ્રીનલેન્ડ પર કબજો મેળવવા માટે સૈન્ય યોજના તૈયાર કરવા અંગે પણ સૂચના આપી હોવાનું અહેવાલોમાં જણાવાયું હતું. જોકે, અમેરિકન સૈન્ય અધિકારીઓ આ વિચારને કાનૂની રીતે ખોટો અને જોખમી ગણાવી રહ્યા છે. વિશ્લેષકોનું માનવું છે કે ટ્રમ્પ આ મુદ્દાનો ઉપયોગ ઘરેલું રાજકારણમાં પણ કરી રહ્યા છે, કારણ કે આગામી મિડ-ટર્મ ચૂંટણી પહેલાં આ મુદ્દો રાષ્ટ્રવાદી ભાવનાઓ ઉશ્કેરવા માટે ઉપયોગી બની શકે છે.
Greenland નો સ્પષ્ટ ઇનકાર
ગ્રીનલેન્ડના વડાપ્રધાન જેન્સ-ફ્રેડરિક નીલ્સને સ્પષ્ટ શબ્દોમાં કહ્યું છે કે ગ્રીનલેન્ડ કોઈ વેચાવાનો દેશ નથી. તેમણે અમેરિકાની આ પ્રકારની ચર્ચાને ગ્રીનલેન્ડના લોકો માટે અપમાનજનક ગણાવી છે અને જણાવ્યું છે કે ગ્રીનલેન્ડ પોતાનું ભવિષ્ય પોતે નક્કી કરશે.
અમેરિકાને Greenland માં રસ કેમ?
ગ્રીનલેન્ડની ભૌગોલિક સ્થિતિ તેને વ્યૂહાત્મક રીતે અત્યંત મહત્વપૂર્ણ બનાવે છે. ઉત્તર અમેરિકા અને યુરોપની વચ્ચે આવેલા આ વિસ્તારમાં અમેરિકાનો પહેલેથી જ થુલે એર બેઝ છે, જે મિસાઇલ ચેતવણી અને રશિયા-ચીનની ગતિવિધિઓ પર નજર રાખવામાં મહત્વની ભૂમિકા ભજવે છે.
ઉપરાંત, ગ્રીનલેન્ડમાં દુર્લભ ખનિજ, તેલ, ગેસ અને રેર અર્થ એલિમેન્ટ્સના મોટા ભંડાર હોવાની શક્યતા છે. આર્કટિક વિસ્તારમાં બરફ પીગળવાથી નવા શિપિંગ રૂટ્સ ખુલતા હોવાથી પણ ગ્રીનલેન્ડનું વ્યૂહાત્મક મહત્વ વધ્યું છે.
