Budget 2026 for Election States: નાણામંત્રી નિર્મલા સીતારમણે વર્ષ 2026-27નું બજેટ રજૂ કરતા આગામી સમયમાં જ્યાં ચૂંટણીઓ યોજાવાની છે તેવા રાજ્યો માટે જાહેરાતોનો વરસાદ કર્યો છે. ઓડિશા, તમિલનાડુ, આંધ્રપ્રદેશ અને પશ્ચિમ બંગાળ જેવા રાજ્યો માટે હાઈ-સ્પીડ રેલ, મિનરલ પાર્ક અને ટુરિઝમ સર્કિટ જેવી અનેક ક્રાંતિકારી યોજનાઓની જાહેરાત કરવામાં આવી છે.
તમિલનાડુ અને આંધ્રપ્રદેશ: હાઈ-સ્પીડ રેલ અને મિનરલ પાર્ક
સરકારે દક્ષિણ ભારતના રાજ્યોના સર્વાંગી વિકાસ માટે એક વિશેષ એક્શન પ્લાન તૈયાર કર્યો છે. આ યોજના હેઠળ ચેન્નાઈથી હૈદરાબાદ અને ચેન્નાઈથી બેંગલુરુ વચ્ચે અત્યાધુનિક હાઈ-સ્પીડ રેલ લિંક વિકસાવવામાં આવશે. આ સાથે જ, તમિલનાડુ અને કેરળમાં દુર્લભ ખનિજોના ઉત્ખનન માટે ‘રેર અર્થ કોરિડોર’ સ્થાપિત કરવામાં આવશે, તેમજ ઓડિશા, તમિલનાડુ અને આંધ્રપ્રદેશમાં ઔદ્યોગિક વિકાસને વેગ આપવા માટે ડેડિકેટેડ મિનરલ પાર્ક બનાવવાની મહત્વની જાહેરાત કરવામાં આવી છે.
Budget 2026: દિલ્હી-વારાણસી-સિલીગુડી કનેક્ટિવિટી
પશ્ચિમ બંગાળના મુસાફરો માટે રેલવે દ્વારા મોટી રાહતની જાહેરાત કરવામાં આવી છે, જે અંતર્ગત દિલ્હીથી વારાણસી અને વારાણસીથી સિલીગુડી સુધી નવો હાઈ-સ્પીડ રેલ કોરિડોર બનાવવામાં આવશે. આ પ્રોજેક્ટ સાકાર થવાથી પશ્ચિમ બંગાળ અને દિલ્હી વચ્ચેનું અંતર નોંધપાત્ર રીતે ઘટશે, જેનાથી મુસાફરો અત્યંત ઝડપી અને સુવિધાજનક મુસાફરીનો આનંદ માણી શકશે.
ખેડૂતો અને માછીમારો માટે ખાસ યોજનાઓ
સરકારે કૃષિ અને મત્સ્યપાલન ક્ષેત્રે મહત્વના નિર્ણયો લેતા દક્ષિણ ભારતના નાળિયેર ઉત્પાદકો માટે ખાસ ‘નાળિયેર સંવર્ધન યોજના’ જાહેર કરી છે, જે અંતર્ગત જૂના વૃક્ષોના સ્થાને વધુ ઉત્પાદન આપતી નવી જાતોનું રોપણ કરવામાં આવશે. આ ઉપરાંત, ભારતને કાજુ અને કોકોના ઉત્પાદનમાં આત્મનિર્ભર બનાવી 2030 સુધીમાં તેને ગ્લોબલ બ્રાન્ડ બનાવવા માટે વિશેષ પ્રોગ્રામ શરૂ કરાશે. માછીમારો માટે પણ મોટી રાહતની જાહેરાત કરવામાં આવી છે, જે મુજબ ભારતીય દરિયાઈ સીમા (EEZ) માં માછીમારી કરનારાઓએ હવે પકડેલી માછલી પર કોઈ પણ પ્રકારનો ટેક્સ કે શુલ્ક ચૂકવવો પડશે નહીં.
ટુરિઝમ અને પર્યાવરણ: બર્ડિંગ ટ્રેલ અને બુદ્ધ સર્કિટ
સરકારે પ્રકૃતિ અને પ્રવાસનને વેગ આપવા માટે આંધ્રપ્રદેશ અને તમિલનાડુમાં પુલિકટ સરોવર કિનારે પ્રકૃતિ પ્રેમીઓ માટે ખાસ ‘બર્ડિંગ ટ્રેલ’ બનાવવાની જાહેરાત કરી છે. ઉત્તર-પૂર્વના રાજ્યો જેવા કે અરુણાચલ પ્રદેશ, સિક્કિમ અને આસામ સહિતના વિસ્તારોમાં ભવ્ય ‘બુદ્ધ સર્કિટ’નું નિર્માણ કરવામાં આવશે, જેમાં પ્રાચીન મઠોનું સંરક્ષણ અને પ્રવાસન સુવિધાઓ વધારવામાં આવશે. આ ઉપરાંત, પૂર્વોદય રાજ્યોના વિકાસ માટે દુર્ગાપુરને મુખ્ય કેન્દ્ર બનાવી ‘ઈસ્ટ કોસ્ટ ઇન્ડસ્ટ્રીયલ કોરિડોર’ વિકસાવવામાં આવશે અને પ્રદૂષણ ઘટાડવા 4,000 નવી ઈ-બસ ચલાવવાની પણ મહત્વની જાહેરાત કરવામાં આવી છે.
આ પણ વાંચો: બજેટમાં CNG અને બાયોગેસને વધુ સસ્તા બનાવવા અંગે મહત્વપૂર્ણ જાહેરાત
આ પણ વાંચો: બેન્કિંગ ક્ષેત્રમાં આવશે ક્રાંતિ! ‘વિકસિત ભારત’ માટે હાઈ-લેવલ કમિટીની જાહેરાત, જાણો ગ્રાહકોને શું થશે ફાયદો
આ પણ વાંચો: ભારત બનશે સુપરફાસ્ટ! દિલ્હી-વારાણસી અને મુંબઈ-પુણે સહિત 7 રૂટ પર હાઈ-સ્પીડ રેલને મંજૂરી
