ઈન્ડિયન રેલ્વે કેટરિંગ એન્ડ ટુરિઝમ કોર્પોરેશન (IRCTC) ની વેબસાઈટ દ્વારા આરક્ષિત સીટોના કથિત ગેરકાયદે વેચાણની ચાલી રહેલી તપાસના સંદર્ભમાં સેન્ટ્રલ બ્યુરો ઓફ ઈન્વેસ્ટિગેશન (CBI) એ વિવિધ રાજ્યોમાં 12 સ્થળો પર સર્ચ હાથ ધર્યું છે. અધિકારીઓએ ગુરુવારે આ માહિતી આપી. અધિકારીઓએ જણાવ્યું કે આ અભિયાન ઉત્તર પ્રદેશ, બિહાર, ગુજરાત, મધ્યપ્રદેશ અને દિલ્હીમાં ચલાવવામાં આવ્યું હતું. સીબીઆઈના પ્રવક્તાએ જણાવ્યું હતું કે, “સર્ચ દરમિયાન, ડિજીટલ ઉપકરણો, ગેરકાયદે સોફ્ટવેરવાળા મોબાઈલ ફોન, ગુનાહિત દસ્તાવેજો અને ગેરકાયદે સોફ્ટવેરનો ઉપયોગ કરીને અગાઉ બુક કરાયેલી ટિકિટ સહિતની અન્ય વિગતો મળી આવી હતી.
સીબીઆઈએ 2 માર્ચ, 2021ના રોજ અજાણ્યા લોકો સામે કેસ નોંધ્યો હતો, જેઓ સોફ્ટવેર અને મોબાઈલ એપ્લિકેશનનો ઉપયોગ કરીને કન્ફર્મ ‘તત્કાલ’ ટિકિટ આપવાનો દાવો કરી રહ્યા હતા. પ્રવક્તાએ જણાવ્યું હતું કે, “તે જાણવા મળ્યું હતું કે એજન્ટો કથિત રીતે ટિકિટ ખરીદવા માટે મેન્યુઅલ એન્ટ્રી પ્રક્રિયાને બાયપાસ કરવા માટે ગેરકાયદેસર સોફ્ટવેરનો ઉપયોગ કરી રહ્યા હતા, જે મુસાફરોને ઊંચા દરે વેચવામાં આવી હતી.” સીબીઆઈએ આ ગેરકાયદેસર પ્રવૃત્તિમાં સંડોવાયેલા વિવિધ એજન્ટોને ઓળખી કાઢ્યા હતા અને એક સાથે દરોડા પાડ્યા હતા.” આ માટે વિવિધ એજન્ટોને ગેરકાયદે સોફ્ટવેરનું વેચાણ અને વિતરણ કરનાર વ્યક્તિની પણ ઓળખ કરવામાં આવી હતી.
