બોલિવૂડ અભિનેત્રી સેલિના જેટલી (Celina Jaitley) આગામી પ્રોજેક્ટ ‘સિસ્ટર નિવેદિતા’ દ્વારા રૂપેરી પડદે પુનઃઆગમન કરવા જઈ રહી છે. જીવનના અનેક ઉતાર-ચઢાવ અને કૌટુંબિક પડકારોનો સામનો કર્યા બાદ સેલિનાએ આ ફિલ્મને માત્ર કમબેક નહીં પરંતુ પોતાની ‘ઘરવાપસી’ ગણાવી છે. તેણે સોશિયલ મીડિયા પર ચાહકોનો આભાર માનતા જણાવ્યું કે સિનેમા હંમેશાં તેની વાસ્તવિક શક્તિ રહ્યું છે અને આ મુશ્કેલ સમયમાં તમામ પ્રશંસકોના સાથ-સહકારની તેને આશા છે.
રામ કમલ મુખરજીના નિર્દેશનમાં આઇરિશ શિક્ષિકાની ગાથા દર્શાવાશે
જાણીતા દિગ્દર્શક રામ કમલ મુખરજીના માર્ગદર્શન હેઠળ બનનારી આ બાયોપિક સ્વામી વિવેકાનંદના શિષ્યા અને ભારતીય શિક્ષણ તેમજ આધ્યાત્મિક ક્ષેત્રે અભૂતપૂર્વ યોગદાન આપનાર આઇરિશ મહિલા માર્ગારેટ એલિઝાબેથ નોબલ (સિસ્ટર નિવેદિતા)ના જીવન પર આધારિત હશે. સેલિના આ ઐતિહાસિક અને પ્રેરણાદાયી પાત્રને જીવંત કરતી જોવા મળશે.
અંગત જીવનની વિષમતાઓ વચ્ચે અભિનયનો નવો અધ્યાય
વર્ષ 2011માં ઓસ્ટ્રિયન બિઝનેસમેન પીટર હાગ સાથે લગ્નગ્રંથિથી જોડાયેલી ચાર બાળકોની માતા સેલિના હાલમાં અત્યંત કઠિન તબક્કામાંથી પસાર થઈ રહી છે. ગંભીર પારિવારિક સમસ્યાઓ, ઘરેલુ હિંસાના આક્ષેપો અને બાળકોની કસ્ટડી અંગેના કાનૂની જંગ વચ્ચે સેલિના પોતાની અભિનય કારકિર્દી દ્વારા નવી શરૂઆત કરવા અને આત્મવિશ્વાસ પુનઃ પ્રાપ્ત કરવા સજ્જ થઈ છે.
આ પણ વાંચો:સલમાન ખાન અને રોહિત શેટ્ટી બાદ હવે આમિર ખાનના ઘરે કડક પોલીસ બંદોબસ્ત
આ પણ વાંચો:આલિયા અને શર્વરીની એક્શન ફિલ્મ ‘આલ્ફા’નું બોક્સ ઓફિસ પર ધબડકો, કરોડોનું નુકસાન
