India News: ચાર ધામ યાત્રા (Char Dham Yatra) પર જવા ઈચ્છતા લાખો શ્રદ્ધાળુઓ માટે મહત્વનું અપડેટ સામે આવ્યું છે. ઉત્તરાખંડમાં ભારે વરસાદ, ભૂસ્ખલન અને હવામાન વિભાગના એલર્ટને ધ્યાનમાં રાખીને પ્રશાસને ચારધામ યાત્રા આગામી બે દિવસ માટે સ્થગિત કરવાનો નિર્ણય લીધો છે. યાત્રીઓની સુરક્ષાને સર્વોચ્ચ પ્રાથમિકતા આપતા હવામાન અનુકૂળ બન્યા બાદ જ યાત્રા ફરી શરૂ કરવામાં આવશે.

ચાર ધામ યાત્રા (Char Dham Yatra) 2 દિવસ માટે સ્થગિત

ગઢવાલ મંડળના કમિશનરે જણાવ્યું કે ચારધામ યાત્રાના વિવિધ માર્ગો પર અનેક સ્થળોએ ભૂસ્ખલન થયું છે, જેના કારણે રસ્તાઓ અવરોધિત બન્યા છે. ઉપરાંત આગામી કલાકોમાં ભારેથી અતિભારે વરસાદની આગાહીને ધ્યાનમાં રાખીને મંગળવાર અને બુધવાર માટે યાત્રા સ્થગિત કરવાનો નિર્ણય લેવામાં આવ્યો છે. પ્રશાસને સ્પષ્ટ કર્યું છે કે યાત્રીઓની સુરક્ષા પ્રથમ પ્રાથમિકતા છે. હવામાનમાં સુધારો થયા બાદ માર્ગોની સમીક્ષા કરીને યાત્રા ફરી શરૂ કરવામાં આવશે.

આગામી 15 કલાક માટે ભારે વરસાદનું એલર્ટ

હવામાન વિભાગે ગંગોત્રી, કેદારનાથ, બદ્રીનાથ અને આસપાસના વિસ્તારોમાં વીજળીના કડાકા સાથે ભારેથી અતિભારે વરસાદની આગાહી કરી છે. કેટલાક વિસ્તારોમાં આંધી-તોફાન અને વધુ ભૂસ્ખલન (Landslide)ની પણ શક્યતા વ્યક્ત કરવામાં આવી છે. પ્રશાસને લોકોને બિનજરૂરી મુસાફરી ટાળવાની અને સુરક્ષિત સ્થળોએ રહેવાની સલાહ આપી છે. યાત્રીઓને સત્તાવાર સૂચનાઓનું પાલન કરવાની પણ અપીલ કરવામાં આવી છે.

રજિસ્ટ્રેશન વ્યવસ્થામાં પણ ફેરફાર

આ પહેલાં ફેબ્રુઆરી 2026માં ચારધામ યાત્રાના ઓનલાઈન રજિસ્ટ્રેશન નિયમોમાં પણ ફેરફાર કરવામાં આવ્યો હતો. હવે યાત્રીઓએ રજિસ્ટ્રેશન માટે ફી ચૂકવવી પડશે. આ અંગે ગઢવાલ ડિવિઝનના એડિશનલ કમિશનરની અધ્યક્ષતામાં સમિતિ રચવામાં આવી હતી, જે ફીની માળખાકીય વ્યવસ્થા નક્કી કરી રહી છે.

ચારધામ યાત્રાનું શું મહત્વ છે?

ચારધામ યાત્રાની શરૂઆત સામાન્ય રીતે હરિદ્વાર અથવા ઋષિકેશથી થાય છે. યાત્રા દરમિયાન શ્રદ્ધાળુઓ યમુનોત્રી, ગંગોત્રી, કેદારનાથ (Kedarnath)અને બદ્રીનાથ ધામના દર્શન કરે છે. સનાતન ધર્મમાં ચારધામ યાત્રાને અત્યંત પવિત્ર માનવામાં આવે છે. ધાર્મિક માન્યતા મુજબ આ યાત્રા કરવાથી આત્મિક શાંતિ, પુણ્ય અને મોક્ષની પ્રાપ્તિ થાય છે. દર વર્ષે દેશ-વિદેશમાંથી લાખો શ્રદ્ધાળુઓ ઉત્તરાખંડ પહોંચે છે.

આ પણ વાંચો: ચારધામ યાત્રામાં 25 દિવસમાં 40 શ્રદ્ધાળુઓના મોત, જાણો શું છે કારણ?

આ પણ વાંચો: ભારે વરસાદને કારણે પહાડી રાજ્યોની સ્થિતિ ખરાબ, ઉત્તરાખંડમાં ચારધામ યાત્રા સતત ખોરવાઈ

આ પણ વાંચો: ઉત્તરાખંડમાં ભારે વરસાદની ચેતવણી, ચારધામ યાત્રા 24 કલાક માટે બંધ