National News : લોકઆસ્થા અને સૂર્ય ઉપાસનાના મહાપર્વ છઠનો આજથી (શુક્રવાર) પ્રારંભ (Chhath Mahaparv)થયો છે. ચાર દિવસ સુધી ચાલનારા આ પવિત્ર તહેવારની શરૂઆત આજે નહાય-ખાયની પરંપરા સાથે થઈ છે. દેશભરમાં છઠ પૂજા (Chhath Puja)ને લઈને ભક્તોમાં ભારે ઉત્સાહ જોવા મળી રહ્યો છે. બિહાર, ઉત્તર પ્રદેશ, દિલ્હી સહિત અનેક રાજ્યોમાં ઘાટની સફાઈ, સજાવટ અને અન્ય તૈયારીઓ પૂર્ણ કરવામાં આવી રહી છે. આ દરમિયાન વડાપ્રધાન નરેન્દ્ર મોદી (PM Narendra Modi)એ પણ દેશવાસીઓને છઠ મહાપર્વની શુભેચ્છા પાઠવી છે.
PM Modi એ છઠ મહાપર્વની શરૂઆત પર પાઠવી શુભેચ્છા
વડાપ્રધાન નરેન્દ્ર મોદીએ (PM Narendra Modi) પોતાના સત્તાવાર સોશિયલ મીડિયા પ્લેટફોર્મ X પર પોસ્ટ કરીને દેશવાસીઓને છઠ મહાપર્વની (Chhath Mahaparv)શુભકામનાઓ આપી હતી. તેમણે લખ્યું કે લોકશ્રદ્ધા અને સૂર્ય ઉપાસનાના ચાર દિવસીય પવિત્ર અનુષ્ઠાન મહાપર્વ છઠના પ્રારંભ પર તમામ દેશવાસીઓને હાર્દિક શુભેચ્છાઓ. વધુમાં તેમણે કહ્યું કે આજે નહાય-ખાય (Nahaye Khaye)નો દિવસ છે. તમામ વ્રતધારીઓને મારા વંદન. હું ઈચ્છું છું કે દરેકને છઠી મૈયાના આશીર્વાદ મળે.
ચાર દિવસ સુધી ચાલશે છઠ પૂજાનું આયોજન
છઠ મહાપર્વ ચાર દિવસ સુધી અલગ-અલગ ધાર્મિક પરંપરાઓ સાથે ઉજવવામાં આવે છે. પ્રથમ દિવસે નહાય-ખાય (Nahaye Khaye)ની વિધિ કરવામાં આવે છે. આ દિવસે વ્રતધારીઓ સ્નાન કરીને શુદ્ધ ભોજન ગ્રહણ કરે છે અને પૂજાની શરૂઆત કરે છે.
બીજા દિવસે એટલે કે શનિવારે ખરના (ખાર્ના)ની વિધિ થશે. આ દિવસે વ્રતધારીઓ આખો દિવસ ઉપવાસ રાખ્યા બાદ સાંજે પૂજા કરીને પ્રસાદ ગ્રહણ કરશે. ત્યારબાદ 36 કલાકના નિર્જળ ઉપવાસની શરૂઆત થશે.
રવિવારે ત્રીજા દિવસે વ્રતધારીઓ અસ્ત થતા સૂર્યને અર્ઘ્ય (Surya Arghya)અર્પણ કરશે. જ્યારે ચોથા અને અંતિમ દિવસે સોમવારે ઉગતા સૂર્યને અર્ઘ્ય આપીને છઠ મહાપર્વની પૂર્ણાહુતિ કરવામાં આવશે.
બિહારથી દિલ્હી સુધી ઘાટ પર તૈયારીઓ તેજ
છઠ મહાપર્વને લઈને દેશના અનેક રાજ્યોમાં તૈયારીઓ પૂરજોશમાં ચાલી રહી છે. બિહાર, ઉત્તર પ્રદેશ અને દિલ્હીમાં નદી કિનારે આવેલા ઘાટોની સફાઈ, રંગકામ અને સજાવટ કરવામાં આવી રહી છે. ભક્તોની સુવિધા માટે વહીવટીતંત્ર દ્વારા પણ વિશેષ વ્યવસ્થાઓ કરવામાં આવી છે.
ઘાટો ઉપરાંત બજારોમાં પણ છઠ પૂજાને (Chhath Puja)લગતી ખરીદીનો માહોલ જોવા મળી રહ્યો છે. પૂજામાં ઉપયોગમાં લેવાતી સામગ્રી, ફળો અને અન્ય વસ્તુઓની ખરીદી માટે બજારોમાં લોકોની અવરજવર વધી છે.
મુંબઈમાં છઠ પૂજાને લઈને રાજકીય વિવાદ
મહારાષ્ટ્રમાં પણ છઠ મહાપર્વ (Chhath Mahaparv)ની તૈયારીઓ વચ્ચે રાજકીય વિવાદ સામે આવ્યો છે. મુંબઈના રેલવે સ્ટેશનો પર છઠ પૂજાને લગતાં ગીતો વગાડવા અને જુહુ બીચ પર પૂજાના આયોજનને લઈને ઉદ્ધવ ઠાકરેની શિવસેના અને મહારાષ્ટ્ર નવનિર્માણ સેના (MNS) દ્વારા વિરોધ કરવામાં આવ્યો છે.
બીજી તરફ રેલવે પ્રશાસનનું કહેવું છે કે રેલવે બોર્ડની સૂચના મુજબ ઉત્તર ભારતીય મુસાફરોની સુવિધા માટે સ્ટેશનો પર લાઉડસ્પીકર દ્વારા જાહેરાતો કરવામાં આવી રહી છે. CSMT અને લોકમાન્ય તિલક ટર્મિનસ પર મુસાફરોને જરૂરી માહિતી આપવા માટે સમયાંતરે છઠ પૂજા (Chhath Puja)નાં ગીતો પણ વગાડવામાં આવી રહ્યાં છે.
રેલવે સ્ટેશનો પર વતન જવા મુસાફરોની ભીડ
છઠ મહાપર્વની શરૂઆત થતાં જ પોતાના વતન જઈને તહેવાર ઉજવવા માંગતા લોકોની સંખ્યામાં વધારો થયો છે. પરિણામે મુંબઈ સહિત અનેક શહેરોનાં રેલવે સ્ટેશનો પર મુસાફરોની ભારે ભીડ જોવા મળી રહી છે.
મુસાફરોની વધતી સંખ્યાને ધ્યાનમાં રાખીને રેલવે દ્વારા વિશેષ વ્યવસ્થાઓ કરવામાં આવી છે. તહેવાર દરમિયાન મુસાફરોને અવરજવરમાં મુશ્કેલી ન પડે તે માટે વધારાની વ્યવસ્થા અને ભીડ નિયંત્રણ પર ધ્યાન આપવામાં આવી રહ્યું છે.
