પાકિસ્તાન અધિકૃત કાશ્મીર (PoK)ની રાજધાની મુઝફ્ફરાબાદમાં પોલીસ કાર્યવાહીના વિરોધમાં બોલાવવામાં આવેલી હડતાળ દરમિયાન વેપારી સંસ્થાઓ બંધ રહી હતી, જેના કારણે સામાન્ય લોકોને મુશ્કેલીનો સામનો કરવો પડ્યો હતો. આ દરમિયાન સુરક્ષા દળો અને પ્રદર્શનકારીઓ વચ્ચે ઘર્ષણ પણ જોવા મળ્યું હતું. તે જ સમયે, પથ્થરબાજી પછી, પોલીસે પ્રદર્શનકારીઓને કાબૂમાં લેવા માટે ટીયર ગેસના શેલ પણ છોડ્યા.
માહિતી અનુસાર, જમ્મુ અને કાશ્મીર જોઈન્ટ અવામી એક્શન કમિટી (JKJAAC)ના આહ્વાન પર શુક્રવારે પાકિસ્તાન અધિકૃત કાશ્મીર (PoK)ના મુઝફ્ફરાબાદમાં શટર ડાઉન અને ચક્કા જામ હડતાળનું એલાન કરવામાં આવ્યું હતું. આ દરમિયાન પ્રદર્શનકારીઓએ પોલીસ પર પથ્થરમારો કર્યો હતો, જેના કારણે ઘર અને મસ્જિદમાં રહેતા લોકોને ભારે હાલાકીનો સામનો કરવો પડ્યો હતો. આ પછી, પોલીસે જવાબી કાર્યવાહી કરી અને પ્રદર્શનકારીઓને કાબૂમાં લેવા માટે ટીયર ગેસના શેલ છોડ્યા.
પીઓકેના સમહાની, સેહંસા, મીરપુર, રાવલકોટ, ખુઇરત્તા, તત્તાપાની, હટ્ટિયન બાલામાં વિરોધ પ્રદર્શનો થયા. મુઝફ્ફરાબાદ અને મીરપુર વિભાગના જુદા જુદા ભાગોમાં રાતોરાત દરોડામાં પોલીસ દ્વારા તેના ઘણા નેતાઓ અને કાર્યકરોની ધરપકડ કરવામાં આવ્યા બાદ JKJAC એ શુક્રવારે હડતાળનું આહ્વાન કર્યું હતું.
વચન પાળ્યું નથી : આંદોલનકારીઓ
ડોને જણાવ્યું હતું કે, JKJAC ચળવળમાં માંગ કરવામાં આવી છે કે રાજ્યમાં વીજળીના ઉત્પાદન ખર્ચ પછી ગ્રાહકોને વીજળી મળવી જોઈએ. ગયા વર્ષે ડિસેમ્બરમાં સત્તાવાર સમાધાન સમિતિ દ્વારા આ મામલાને ઉકેલવામાં આવ્યો હતો. જે બાદ સરકાર દ્વારા 4 ફેબ્રુઆરીએ એક નોટિફિકેશન પણ બહાર પાડવામાં આવ્યું હતું. જો કે, એપ્રિલમાં સમિતિએ સરકાર દ્વારા તેની લેખિત પ્રતિબદ્ધતાઓ પૂરી ન કરવાના વિરોધમાં 11 મેના રોજ લોંગ માર્ચની જાહેરાત કરી હતી.તેમણે કહ્યું કે સમિતિએ ગયા મહિને જાહેરાત કરી હતી કે રાજ્યભરમાંથી લોકો 11 મેના રોજ મુઝફ્ફરાબાદ તરફ કૂચ કરશે.
59 પોલીસકર્મી ઘાયલ
એસએસપી યાસીન બેગે જણાવ્યું હતું કે રેહાન ગલીમાં નાયબ પોલીસ અધિક્ષક ઇલ્યાસ જંજુઆ અને મહેસૂલ વિભાગના બે અધિકારીઓ સહિત 59 પોલીસકર્મીઓ ઘાયલ થયા હતા, જ્યારે સહંસા બારોઇયાનમાં 19 અન્ય પોલીસકર્મીઓ ઘાયલ થયા હતા. આ સાથે જ એક પોલીસકર્મીનું પણ મોત થયું છે.
લોકો રસ્તા પર ઉતરી આવ્યા
આ જાહેર કાર્ય સમિતિઓ વીજળીના બિલ પર લાદવામાં આવેલા કર અને લોટના સતત વધતા ભાવ સામે વિરોધ કરી રહી છે. ગયા વર્ષે ઓગસ્ટમાં પણ આવું જ આંદોલન થયું હતું. દરમિયાન, તે પ્રકાશમાં આવ્યું છે કે PoKના મુખ્ય સચિવે ઇસ્લામાબાદમાં આંતરિક વિભાગના સચિવને પત્ર લખીને 11 મેની હડતાલને કારણે સુરક્ષા માટે 6 સિવિલ આર્મ્ડ ફોર્સિસ (CAF) પ્લાટૂનની માંગણી કરી હતી.
સૂત્રોએ જણાવ્યું કે હડતાળના ડરને કારણે સરકારે સમગ્ર પીઓકેમાં કલમ 144 લાગુ કરી હતી અને 10 અને 11 મેના રોજ તમામ શૈક્ષણિક સંસ્થાઓમાં રજા જાહેર કરી હતી. જોકે, પીઓકેના તમામ જિલ્લાઓમાં હજારો લોકો રસ્તા પર ઉતરી આવ્યા હતા.
આ પણ વાંચોઃબે દાયકામાં સૌથી શક્તિશાળી સૌર વાવાઝોડું પૃથ્વી પર ટકરાયુ
