Gujarat Collector Conference Gandhinagar: ગુજરાતના મુખ્યમંત્રી ભૂપેન્દ્ર પટેલે આજે રાજ્યના પાટનગર ગાંધીનગર ખાતે એકદિવસીય ‘કલેક્ટર કોન્ફરન્સ’ (Collector Conference) નો શુભારંભ કરાવ્યો છે. આ મહત્વપૂર્ણ બેઠકમાં રાજ્યના તમામ જિલ્લાના કલેક્ટરો, મહેસૂલ વિભાગના ઉચ્ચ અધિકારીઓ અને મુખ્ય સચિવ ઉપસ્થિત રહ્યા હતા. આ Collector Conferenceનો મુખ્ય ઉદ્દેશ્ય મહેસૂલી કામગીરીમાં પારદર્શિતા લાવવા અને સામાન્ય જનતાના જમીન સંબંધિત પ્રશ્નોનો ઝડપી નિકાલ કરવાનો છે.
મહેસૂલી કામગીરી અને i-ORA પોર્ટલની સમીક્ષા
કોન્ફરન્સ દરમિયાન i-ORA અને ઈ-ધરા જેવી ઓનલાઇન સિસ્ટમ દ્વારા થતી કામગીરીની ઝીણવટભરી સમીક્ષા કરવામાં આવી રહી છે. ટેકનોલોજીના માધ્યમથી મહેસૂલી સેવાઓ વધુ સુદ્રઢ કેવી રીતે બનાવી શકાય અને ખેડૂતો તેમજ નાગરિકોને કચેરીઓના ધક્કા ન ખાવા પડે તે દિશામાં વિગતવાર ચર્ચા કરવામાં આવી હતી.
પડતર કેસો અને કાયદાકીય જટિલતાઓ પર ચર્ચા
આ બેઠકમાં જમીન મહેસૂલ હેઠળના વિવિધ પ્રગતિ હેઠળના કામો અને ભવિષ્યના આયોજન અંગે રોડમેપ તૈયાર કરવામાં આવશે. ખાસ કરીને જિલ્લા કક્ષાએ પડતર રહેલા જમીનના કેસોની પણ વિગતવાર ચર્ચા થશે આ ઉપરાંત, જમીનને લગતા સંકલિત કાયદાઓ અને નવા ઠરાવો પર પણ કલેક્ટરો સાથે પરામર્શ કરવામાં આવશે.
વહીવટી તંત્રને ગતિશીલ બનાવવા આયોજન
વહીવટી તંત્ર વધુ ગતિશીલ અને જનહિતલક્ષી બને તે માટે આ કોન્ફરન્સ ખૂબ મહત્વની માનવામાં આવી રહી છે. રાજ્યમાં મહેસૂલી વહીવટમાં એકરૂપતા લાવવા માટે પણ આ મંચ પરથી મહત્વના નિર્ણયો લેવામાં આવી શકે છે.
