સુરક્ષા એજન્સીઓએ ભાજપના મુખ્યાલય, સરકારી કચેરીઓ, પરિવહન કેન્દ્રો, મુખ્ય બજારો અને ભીડભાડવાળા વિસ્તારોમાં વધારાની પોલીસ ફોર્સ તૈનાત કરી છે. આત્મઘાતી હુમલા અને આઇઇડી ખતરાને ધ્યાનમાં રાખીને બોમ્બ નિરોધક દળો તેમજ વિશેષ સુરક્ષા ટીમોને પણ સક્રિય કરવામાં આવી છે.

દિલ્હી પોલીસ દ્વારા શહેરના સંવેદનશીલ વિસ્તારોમાં સઘન ચેકિંગ અભિયાન હાથ ધરવામાં આવ્યું છે. અનેક જગ્યાએ બેરિકેડ ગોઠવી વાહનોની તપાસ કરવામાં આવી રહી છે, જ્યારે શંકાસ્પદ વ્યક્તિઓ અને પ્રવૃત્તિઓ પર સતત નજર રાખવામાં આવી રહી છે.

સૂત્રોના જણાવ્યા અનુસાર દીનદયાલ ઉપાધ્યાય માર્ગ પર આવેલ ભાજપ મુખ્યાલય અને આસપાસના સરકારી વિસ્તારોમાં ખાસ સુરક્ષા ગોઠવણ કરવામાં આવી છે. અહીં વધારાના સશસ્ત્ર જવાનોની તૈનાતી સાથે પ્રવેશ-નિયંત્રણ વધુ કડક બનાવાયું છે.

સુરક્ષા એજન્સીઓએ નાગરિકોને પણ સતર્ક રહેવાની અપીલ કરી છે અને કોઈ શંકાસ્પદ વસ્તુ કે વ્યક્તિ જોવા મળે તો તાત્કાલિક પોલીસને જાણ કરવા જણાવ્યું છે.