Surat News: સુરતના કતારગામમાં રોંગ સાઇડ રાજુએ એક નિર્દોષનો ભોગ લીધો હતો. સુરતના કતારગામમાં આવતો આ રોંગસાઇડ રાજુ રાઇટ સાઇડ પરથી આવતા હીરાના કારખાનેદાર પર ધસી ગયો હતો. તેના પરિણામે હીરા કારખાનેદાર નિકુંજભાઈ સવાણીએ અથડામણ ટાળવા અચાનક બ્રેક મારતા તેનું બાઇક સ્લીપ થઈ ગયુ હતુ. બાઇક સ્લીપ થવાની સાથે યુવાન અને તેનો મિત્ર નીચે પડ્યા હતા અને પાછળથી આવતી સિટી બસનું ટાયર યુવાન પર ફરી વળતા તેનું ઘટનાસ્થળે જ મોત થયું હતું. આ સમગ્ર ઘટના સીસીટીવીમાં કેદ થઈ હતી.
સુરતમાં મૃતક નિકુંજભાઈ મશીન રિપેર કરાવવા નીકળ્યા હતા
સુરતના ઉત્તરણ વીઆઈપી રોડ પર સિલ્વર લક્ઝરીમાં રહેતા 29 વર્ષીય હીરાના કારખાનાના માલિક નિકુંજભાઈ સુભાષભાઈ સવાણી, તેમના પરિચિત કેતનભાઈ સાથે શેરીન મશીન રિપેર કરાવવા માટે બાઇક પર નીકળ્યા હતા. જ્યારે તેઓ ફૂલપાડા અને રત્નમાલા વચ્ચે આવેલી ‘ખાટુશ્યામ ડિઝાઇનર’ દુકાન પાસેથી પસાર થઈ રહ્યા હતા, ત્યારે સામેથી અચાનક એક બાઇકચાલક ઝડપથી આવ્યો.
બાઇકચાલક સાથેની અથડામણ ટાળવા જતાં કાબુ ગુમાવ્યો
સુરતમાં બાઇક સામેથી આવતા વાહન સાથે અથડામણ ટાળવાનો પ્રયાસ કરતા, નિકુંજભાઈએ પોતાની બાઇક પરનો કાબુ ગુમાવ્યો. ભીના રસ્તાને કારણે અથવા ગભરાટમાં બ્રેક મારવાને કારણે, બાઇક સ્લીપ થઈ ગઈ, અને બંને મિત્રો રસ્તા પર પડી ગયા. કમનસીબે, નિકુંજભાઈ રસ્તા પર પડ્યા તે જ સમયે, બાજુમાંથી એક સિટી બસ ઝડપથી આવી રહી હતી. બસ ડ્રાઈવર બ્રેક લગાવે તે પહેલાં, બસનું ટાયર નિકુંજભાઈ પર ફરી ગયું. અકસ્માત એટલો ગંભીર હતો કે નિકુંજભાઈને ગંભીર ઈજાઓ થઈ. સ્થાનિકો અને રાહદારીઓએ તેમને તાત્કાલિક નજીકની ખાનગી હોસ્પિટલમાં લઈ ગયા, પરંતુ ફરજ પરના ડોક્ટરોએ તેમને મૃત જાહેર કર્યા. દરમિયાન, પાછળ બેઠેલા કેતનભાઈ સદનસીબે નાની ઈજાઓથી બચી ગયા અને હાલમાં આઘાતમાં છે.
29 વર્ષના નિકુંજભાઈના મૃત્યુથી કુટુંબ ઘેરા શોકમાં
સુરતના કતારગામમાં માત્ર 29 વર્ષની ઉંમરે નિકુંજભાઈના મૃત્યુથી સવાણી પરિવારને ઊંડો આઘાત લાગ્યો છે. મહેનતુ અને સફળ વ્યાવસાયિક નિકુંજભાઈના અકાળ મૃત્યુથી ઉત્તરણ અને કતારગામ વિસ્તારના ઝવેરીઓ અને હીરા ઉદ્યોગના અગ્રણીઓમાં શોકની લહેર ફેલાઈ ગઈ છે. ઘટનાની માહિતી મળતાં, કતારગામથી પોલીસ કાફલો ઘટનાસ્થળે પહોંચ્યો. પોલીસે નિકુંજભાઈના મૃતદેહને પોસ્ટમોર્ટમ માટે મોકલી દીધો છે અને વધુ તપાસ કરી રહી છે. સિટી બસ ડ્રાઇવર સામે કેસ દાખલ કરવા ઉપરાંત, રસ્તાની ખોટી બાજુથી આવેલા અને અકસ્માત સર્જનાર બાઇક સવારને શોધવા માટે વિસ્તારના સીસીટીવી ફૂટેજની તપાસ કરવામાં આવી રહી છે.
