Dwarka News: ગુજરાતમાં કમોસમી વરસાદે ખેડૂતોની મુશ્કેલીમાં વધારો કર્યો છે. દેવભૂમિ દ્વારકા જિલ્લાના દુષ્કાળગ્રસ્ત કલ્યાણપુર તાલુકામાં ભાટિયા, કેનેડી અને કલ્યાણપુર સહિતના ગામોમાં ભારે પવન સાથે વરસાદ ખાબક્યો (Dwarka Rain) હતો. બીજી તરફ ગીર સોમનાથના તાલાલા પંથકમાં પણ બપોર બાદ વરસાદ પડ્યો હતો. ખેતરોમાં તૈયાર થયેલો મગફળીનો પાક અને ખુલ્લામાં રાખેલો પશુચારો પલળતાં ખેડૂતોને નુકસાનની ભીતિ છે.
Dwarka Rain : કલ્યાણપુરમાં ભારે પવન સાથે વરસાદ
દેવભૂમિ દ્વારકા જિલ્લામાં વાતાવરણમાં અચાનક પલટો આવતાં કલ્યાણપુર તાલુકાના (Kalyanpur Rain) ગ્રામ્ય વિસ્તારોમાં વરસાદ વરસ્યો હતો. ભાટિયા, કેનેડી અને કલ્યાણપુર સહિતના વિસ્તારોમાં તેજ પવન સાથે માવઠું પડ્યું હતું. જિલ્લામાં પહેલેથી જ દુષ્કાળ જેવી સ્થિતિ હોવાને કારણે ખેડૂતોએ મુશ્કેલીઓ વચ્ચે પાક ઉછેર્યો હતો. ત્યારે અચાનક આવેલા વરસાદથી તેમની ચિંતામાં વધારો થયો છે.
તાલાલામાં અડધા કલાકમાં એક ઇંચ વરસાદ
ગીર સોમનાથ જિલ્લાના તાલાલા પંથકમાં પણ બપોર બાદ વાતાવરણ પલટાયું હતું. માધુપુર, જાંબુર અને જસાધાર સહિતનાં ગામોમાં મીની વાવાઝોડા જેવા ભારે પવન સાથે વરસાદ પડ્યો હતો. સ્થાનિક વિગતો મુજબ, આશરે અડધા કલાકમાં એક ઇંચ જેટલો વરસાદ નોંધાયો હતો. વરસાદને કારણે ખેતરોમાં રહેલો પાક અને ખુલ્લામાં પડેલો પશુચારો પલળવાની ભીતિ (Groundnut Crop Damage) ઊભી થઈ છે.
રાજ્યના 21 તાલુકામાં વરસાદ નોંધાયો
આપેલી વિગતો મુજબ, છેલ્લા 24 કલાક દરમિયાન રાજ્યના 21 તાલુકામાં 1 મિમીથી લઈને સવા બે ઇંચ સુધીનો કમોસમી વરસાદ નોંધાયો છે. વાદળછાયા વાતાવરણને કારણે રાજ્યના તાપમાનમાં પણ ઘટાડો થયો છે. અમદાવાદ સહિતનાં શહેરોમાં સવારે હળવી ઠંડીનો અનુભવ થયો હતો.
આજે પણ દક્ષિણ ગુજરાત અને સૌરાષ્ટ્રમાં વરસાદની આગાહી
હવામાનમાં આવેલા પલટા વચ્ચે વેસ્ટર્ન ડિસ્ટર્બન્સ અને સાયક્લોનિક સર્ક્યુલેશનની અસરને કારણે આજે પણ રાજ્યના કેટલાક વિસ્તારોમાં હળવાથી મધ્યમ વરસાદની આગાહી કરવામાં આવી છે. ખાસ કરીને દક્ષિણ ગુજરાત અને સૌરાષ્ટ્રના વિસ્તારોમાં માવઠાની શક્યતા વ્યક્ત કરવામાં આવી છે. સતત બદલાતા વાતાવરણને પગલે ખેડૂતો પાક અને પશુચારા અંગે ચિંતિત બન્યા છે.
આ પણ વાંચો: ખેતરમાં તૈયાર પાક પર વરસાદનું પાણી ફરી વળ્યું, અમરેલીના ખેડૂતોની મહેનત પર પાણી
આ પણ વાંચો: ગુજરાતમાં હવામાનનો મિજાજ બદલાયો! અમરેલી-ગીર સોમનાથમાં ધોધમાર વરસાદ, પવનથી મકાનનાં પતરા ઊડ્યાં
આ પણ વાંચો: અમદાવાદના SG હાઈવે પર વરસાદી માહોલ! ગુજરાતના અનેક જિલ્લાઓમાં યલો એલર્ટ
