પશ્ચિમ બંગાળમાં પાંચમા તબક્કાના મતદાન પૂર્વે ચૂંટણી પંચે મોટી કાર્યવાહી કરી છે. ભારતીય જનતા પાર્ટીના નેતા અને બંગાળ ભાજપના વડા દિલીપ ઘોષના પ્રચાર ઉપર 24 કલાક પ્રતિબંધ મૂક્યો છે. આ પ્રતિબંધ 15 એપ્રિલના રોજ સાંજે 7 વાગ્યાથી 16 એપ્રિલના રોજ સાંજે 7 વાગ્યા સુધી લાગુ રહેશે. દિલીપ ઘોષ પર આદર્શ આચારસંહિતાનો ભંગ કરવાનો આરોપ લગાવી ચૂંટણી પંચે આ કાર્યવાહી કરી છે.
આદેશમાં જણાવાયું છે કે ચૂંટણી પંચે ઘોષને કડક ચેતવણી આપી છે અને આદર્શ આચારસંહિતા લાગુ હોય ત્યારે જાહેર ટિપ્પણીઓ કરતી વખતે આવા નિવેદનો આપવાનું ટાળવાની સલાહ આપી છે.
જણાવી દઈએ કે 13 એપ્રિલે ચૂંટણી પંચે દિલીપ ઘોષના ઉશ્કેરણીજનક નિવેદન અંગે નોટિસ મોકલી હતી. નિવેદનમાં ઘોષે આક્ષેપ કર્યો હતો કે જો કોઈ કાયદો હાથમાં લે તો સીતાલકુચી જેવી ઘટના ફરી ઘણી જગ્યાએ બની શકે છે. દિલીપ ઘોષે કહ્યું હતું કે સીતાલકુચીમાં છોકરાઓ પર ગોળી ચલાવવામાં આવી હતી, જો કોઈ કાયદો હાથમાં લેવાની સંમતિ આપે તો તેની સાથે પણ તેવું થશે.
ત્યારબાદ કમિશને એક નોટિસ ફટકારીને કહ્યું કે આવા નિવેદનો કાયદો અને વ્યવસ્થામાં ભંગાણ પાડી શકે છે. કૂચ બિહારના સીતાલકુચીમાં કેન્દ્રીય દળોના ગોળીબારમાં ચાર લોકો માર્યા ગયા હતા.
ચૂંટણી પંચે ભાજપના નેતા શાયંતન બાસુને નોટિસ ફટકારી છે
આ પહેલા ચૂંટણી પંચે ભારતીય જનતા પાર્ટીના નેતા શાયંતન બાસુને 24 કલાકમાં જવાબ માંગવા માટે નોટિસ મોકલી હતી. ચૂંટણી પંચની નોટિસમાં શાયંતન બાસુ પર ભડકાઉ ભાષણનો આરોપ મૂકવામાં આવ્યો છે. ચૂંટણી પંચે કહ્યું છે કે બાસુએ તેમના ભાષણ દ્વારા રાજ્યના લોકોને ડરાવવા અને ધમકાવવાનો પ્રયાસ કર્યો છે જે આદર્શ આચારસંહિતાનું ઉલ્લંઘન છે. બાસુને 24 કલાકની અંદર આ મામલે જવાબ આપવા કહેવામાં આવ્યું છે.
પશ્ચિમ બંગાળમાં ચાર તબક્કાનું મતદાન પૂર્ણ થયું
પશ્ચિમ બંગાળમાં સત્તા સંઘર્ષની અર્ધ યાત્રા એટલે કે ચાર તબક્કાના મતદાન પૂર્ણ થઈ ગયું છે. એટલે કે, 295 બેઠકોમાંથી 135 બેઠકો માટે મતદાન યોજાયું છે. આ વખતે ભાજપે શાસક તૃણમૂલ કોંગ્રેસ સમક્ષ ગંભીર પડકાર રજૂ કર્યો છે. નવા સમીકરણમાં બંને પક્ષો વચ્ચે ગાઢ સ્પર્ધા છે. પાંચમા તબક્કામાં શનિવારે રાજ્યના ઉત્તર બંગાળ અને દક્ષિણ બંગાળના 6 જિલ્લાની 45 બેઠકો પર મતદાન યોજાશે. જેમાં 342 ઉમેદવારોનું ભાવિ ઇવીએમમાં કેદ થશે
