જમ્મુ અને કાશ્મીરના પુલવામા જિલ્લામાં ગુરુવારે સુરક્ષા દળો સાથેની અથડામણમાં લશ્કર-એ-તૈયબાના બે આતંકવાદીઓ માર્યા ગયા હતા જ્યારે સેનાના બે જવાન ઘાયલ થયા હતા. પોલીસે આ માહિતી આપી હતી. પોલીસ પ્રવક્તાએ જણાવ્યું કે આતંકવાદીઓની હાજરી અંગે ગુપ્ત માહિતી મળ્યા બાદ સુરક્ષા દળોએ દક્ષિણ કાશ્મીર જિલ્લાના નૈના બાટપોરા વિસ્તારને ઘેરી લીધો અને ત્યાં સર્ચ ઓપરેશન શરૂ કર્યું.
આતંકવાદીએ પહેલા કર્યો ગોળીબાર
જમ્મુ અને કાશ્મીર પોલીસના પ્રવક્તાએ જણાવ્યું હતું કે સર્ચ ઓપરેશન દરમિયાન, સ્થાનિક મસ્જિદની નજીક એક અલગ ઇમારતમાં છુપાયેલા આતંકવાદીઓની હાજરી મળી આવી હતી અને તેમને આત્મસમર્પણ કરવા માટે વારંવાર અપીલ કરવામાં આવી હતી. પ્રવક્તાએ કહ્યું કે આતંકવાદીઓએ સુરક્ષા દળો પર ગોળીબાર કર્યા બાદ ઓપરેશન એન્કાઉન્ટરમાં ફેરવાઈ ગયું. તેમણે કહ્યું કે સુરક્ષા દળોએ પણ ગોળીબારનો જડબાતોડ જવાબ આપ્યો.
સેનાના બે જવાન ઘાયલ
પ્રવક્તાએ કહ્યું કે મસ્જિદ એક પવિત્ર સ્થળ છે તે હકીકતને ધ્યાનમાં રાખીને સંયુક્ત ટીમે મહત્તમ સંયમનો ઉપયોગ કર્યો જેથી તેને કોઈ નુકસાન ન થાય. એન્કાઉન્ટર દરમિયાન સેનાના બે જવાન ઘાયલ થયા હતા. બંને ઈજાગ્રસ્તોને હોસ્પિટલમાં લઈ જવામાં આવ્યા હતા જ્યાં તેમની હાલત સ્થિર હોવાનું કહેવાય છે.
આતંકવાદીઓ લશ્કર-એ-તૈયબા સાથે સંકળાયેલા હતા
તેમણે કહ્યું કે માર્યા ગયેલા બંને આતંકવાદીઓ લશ્કર-એ-તૈયબા સાથે સંકળાયેલા હતા અને સ્થળ પરથી તેમના મૃતદેહ મળી આવ્યા હતા. પ્રવક્તાએ કહ્યું કે તેમની ઓળખ પુલવામાના બાટપોરાના રહેવાસી શાહિદ અહેમદ ખાન અને ગાંદરબલના શાહપોરાના રહેવાસી ફયાઝ શેખ તરીકે થઈ છે.
