માર્વેલ્સની એવેન્જર્સ હાલમાં વિશ્વભરના બોક્સઓફિસમાં ધૂમ મચાવી રહી હોવાની સાથોસાથ અઢણક કમાણી પણ કરી રહી છે. આ ફિલ્મે જાણે કે બોક્સિ ઓફિસ પર ટંકશાળ પાડી હોય તેમ રિલીઝના બીજા જ સપ્તાહમાં વર્લ્ડવાઇડ રૂ.12,590 કરોડની કમાણી કરી છે. ફિલ્મની અધધ…કમાણી જોતા આ ફિલ્મ ટૂંકમાં જ અવતાર અને સ્ટાર વોર્સ – ધ ફોર્સ અવેકન્સનો સૌથી વધુ કમાણીનો રેકોર્ડ તોડે તેવી પૂરી સંભાવના છે. અવતારે વિશ્વભરમાં રૂ.19,321 કરોડ જ્યારે સ્ટાર વોર્સે રૂ.14,319 કરોડની કમાણી કરી હતી. એવેન્જર્સ એન્ડગેમની લોકપ્રિયતા હાલમાં આકાશ આંબી રહી છે અને બોક્સ ઓફિસ પર ફૂલ જઇ રહ્યા છે ત્યારે આ મૂવિ સૌથી વધુ કમાણીનો રેકોર્ડ બનાવશે તેવી ચર્ચાએ જોર પકડ્યું છે.
ફિલ્મ વધુ કમાણી કરશે તે પાછળ પણ કારણ છે. એ વિશે વાત કરીએ તો છેલ્લા 10 વર્ષમાં ફિલ્મની ટિકિટના ભાવ બમણા થયા છે. આ રીતે જોઇએ તો આ સમયમાં રિલીઝ થયલી અવતાર વર્લ્ડવાઇડ રૂ,20,000 કરોડનો વકરો કરત તે ચોક્કસ છે. એન્ડગેમ કરતા અવતારને ઓછી સ્ક્રીન મળી હતી.
ભારતમાં પણ હોલિવૂડ ફિલ્મનું એક મોટું માર્કેટ તૈયાર થઇ ચૂક્યું છે જ્યાં હોલિવૂડ ફિલ્મને પસંદ કરનારા લોકોનો એક ખાસ વર્ગ છે. ભારતમાં રિલીઝ થયેલી જંગલબુકએ 26 અરબ રૂપિયાની કમાણી કરી હતી.
નોંધનીય છે કે એવેન્જર્સ એન્ડગેમ એ ઇન્ફિનિટી વોરની સીકવલ અને માર્વેલ સીરિઝની અંતિમ ફિલ્મ છે. અત્યારસુધી ભારતીય બજારમાં મૂવિએ 300 કરોડની તગડી કમાણી કરી છે. ફિલ્મમાં રોબર્ટ ડાઉન જૂનિયર, ક્રિસ ઇવાન્સ, ક્રિસ હેમ્સવર્થ, માર્ક રફેલો, સ્કારલેટ જોહનસન જેવા ટોચના કલાકારોએ કામ કર્યુ છે. ફિલ્મનું નિર્દેશન રૂસો બ્રદર્ષ દ્વારા કરવામાં આવ્યું છે.
