Hyderabad News: યૂટ્યૂબ પર વીડિયો જોઈને કોઈ ખાવાનું બનાવવાનું શીખે છે, તો કોઈ નવી ટેકનિક શીખે છે, પણ તેલંગણાના હૈદરાબાદમાં એક શખ્સે એ જ પ્લેટફોર્મના વીડિયો જોઈ નકલી નોટ(Fake Note Factory) છાપવાની રીત શીખી લીધી. ત્યારબાદ તેણે સાથીઓ સાથે મળીને ભાડાના મકાનમાં નકલી નોટ છાપવાનું આખું સેટઅપ ઊભું કર્યું. પોલીસે આ ટોળકીનો ભાંડાફોડ કરીને ચાર લોકોની ધરપકડ કરી છે. આરોપીઓના કબજામાંથી 6.78 કરોડ રૂપિયાની કિંમતની નકલી 500 રૂપિયાની નોટો જપ્ત કરવામાં આવી છે.

Fake Note Factory: નેશનલ હાઈવે પર કાર રોકીને તપાસ કરતા ભાંડો ફૂટ્યો

તેલંગણા પોલીસ(Telangana Police) અનુસાર, આ ટોળકી હૈદરાબાદના બહારના વિસ્તારમાં સક્રિય હતી. પોલીસે 1 નવેમ્બરના રોજ રામોજી ફિલ્મ સિટી નજીક નેશનલ હાઈવે 65 પર એક કારને રોકી તપાસ કરી હતી. અબ્દુલ્લાપુરમેટ પોલીસ અને શાદનગર સ્પેશિયલ ઓપરેશંસ ટીમની સંયુક્ત કાર્યવાહીમાં કારમાં સવાર ચાર લોકોને પકડી લેવાયા હતા. તલાશી દરમિયાન ગાડીમાંથી 8 લાખ રૂપિયા અને નકલી 500 રૂપિયાની નોટો મળી આવી હતી. પૂછપરછમાં નકલી નોટના કારોબારનો મોટો ભાંડો ફૂટ્યો હતો.

ભાડાના મકાનમાં બનાવી હતી નકલી નોટોની ફેક્ટરી

પોલીસની તપાસ આરોપીઓને હૈદરાબાદના બહારી વિસ્તાર કુંટલૂર(Kuntloor) સ્થિત એક ભાડાના મકાન સુધી લઈ ગઈ. અહીં કથિત રીતે નકલી નોટ છાપવાનું આખું યૂનિટ ચાલી રહ્યું હતું. પોલીસે મકાનની તલાશી લીધી ત્યારે 500 રૂપિયાની નકલી નોટોના 134 બંડલ મળ્યા, જેની અનુમાનિત કિંમત લગભગ 6.70 કરોડ રૂપિયા હોવાનું કહેવાય છે. દરોડા દરમિયાન કલર પ્રિન્ટર, સ્કેનર, લેપટોપ, લેમિનેશન મશીન અને નોટો કાપવાનાં સાધનો પણ જપ્ત કરાયાં હતાં. કારમાંથી મળેલા 8 લાખ સહિત જપ્ત કરાયેલી નકલી કરન્સી(Fake Currency)ની કુલ કિંમત 6.78 કરોડ રૂપિયા જણાવાઈ છે.

YouTube વીડિયો જોઈને નકલી નોટ બનાવવાની રીત શીખી

ફ્યુચર સિટી પોલીસ કમિશનર ડૉ. તરુણ જોશીના જણાવ્યા અનુસાર, ગેંગનો મુખ્ય આરોપી મધુપોજુ કર્ણાકર કથિત રીતે YouTube વીડિયો અને સોશિયલ મીડિયા પરના અન્ય કન્ટેન્ટની મદદથી નકલી નોટ બનાવવાની પ્રક્રિયા શીખતો હતો. તપાસકર્તાઓ મુજબ, આરોપીઓ અસલી 500ની નોટો સ્કેન કરી, ઇમેજ એડિટિંગ સોફ્ટવેરથી ફેરફાર કરીને નકલી નોટો તૈયાર કરતા હતા. છાપ્યા બાદ લેમિનેશન અને કટિંગથી નોટોને અસલી જેવી બનાવવાનો પ્રયાસ કરાતો હતો.

એક લાખના બદલામાં 3થી 4 લાખની નકલી નોટોની ઓફર

પોલીસના જણાવ્યા અનુસાર, ગેંગ ગ્રાહકોને એક લાખ રૂપિયાની અસલી કરન્સીના બદલામાં ત્રણથી ચાર લાખ રૂપિયાની નકલી નોટો આપવાની ઓફર કરતી હતી. જોકે, આ રીતથી ખરીદદારોને આકર્ષવામાં સફળતા ન મળતાં ગેંગે છેતરપિંડીનો બીજો રસ્તો અપનાવ્યો હતો. આરોપીઓ નકલી નોટો ખરીદવા ઇચ્છતા લોકોને પહેલાં અસલી કરન્સી બતાવીને વિશ્વાસમાં લેતા અને પછી પોતાને પોલીસકર્મી તરીકે ઓળખાવી તેમના પૈસા લઈને ફરાર થઈ જતા હતા.

નકલી પોલીસ બનીને છેતરપિંડી

તપાસ અનુસાર, નકલી પોલીસ ગેંગ(Fake Police Gang) કથિત રીતે નકલી પોલીસ ઓળખપત્રો, વૉકી-ટૉકી અને નકલી પિસ્તોલનો ઉપયોગ કરતી હતી. તેઓ નકલી નંબર પ્લેટ લગાવેલી ગાડીઓમાં પણ ફરતા હતા. પોલીસનો આરોપ છે કે આ રીતે ગેંગે બે અલગ-અલગ ઘટનાઓમાં નકલી નોટો ખરીદવા આવેલા લોકો પાસેથી અનુક્રમે 2 લાખ અને 3 લાખ રૂપિયાની અસલી રકમની છેતરપિંડી કરી હતી.

ચાર આરોપીઓની ધરપકડ, ત્રણ હજુ ફરાર

પોલીસે આ કેસમાં મધુપોજુ કર્ણાકર, ચિનોલ્લા માણિક્ય રેડ્ડી, ચેરુકુપલ્લી રત્નાકર રેડ્ડી અને કરણમ અજય કુમારની ધરપકડ કરી છે. ગેંગના અન્ય ત્રણ આરોપીઓ હજુ ફરાર છે અને પોલીસ તેમની શોધખોળ કરી રહી છે. પોલીસ એ જાણવાનો પ્રયાસ કરી રહી છે કે ગેંગ કેટલા સમયથી નેટવર્ક ચલાવતી હતી, નકલી નોટો ક્યાં-ક્યાં ચલાવાઈ હતી અને તેમાં અન્ય કોણ સંકળાયેલું હતું.

આ પણ વાંચો: ગુજરાત યુનિવર્સિટીમાં NSUIનો હલ્લાબોલ, ઈન્ચાર્જ કુલપતિ પર નકલી નોટોનો વરસાદ
આ પણ વાંચો: અમદાવાદમાં નકલી નોટોના આંતરરાજ્ય રેકેટનો પર્દાફાશ: ₹28.94 લાખની ફેક કરન્સી સાથે 6 આરોપી ઝડપાયા
આ પણ વાંચો: અમદાવાદ ક્રાઈમ બ્રાન્ચનો મોટો ભાંડાફોડ, ₹2.48 કરોડની નકલી નોટો, AI, ચીન કનેક્શન આવ્યું બહાર