Ahmedabad News: ગુજરાત યુનિવર્સિટી (Gujarat University)ના પૂર્વ કુલપતિ ડૉ. નીરજા ગુપ્તા (Nirja Gupta)ના કાર્યકાળ દરમિયાન કરોડો રૂપિયાની ગ્રાન્ટના ઉપયોગને લઈને ઉઠેલા કથિત ગેરરીતિના આક્ષેપો વચ્ચે હવે વિદ્યાર્થી સંગઠન NSUIએ આક્રમક વિરોધ નોંધાવ્યો છે. NSUIના કાર્યકર્તાઓએ ગુજરાત યુનિવર્સિટીના ઈન્ચાર્જ કુલપતિ જગદીશ જોશીની ઓફિસમાં જઈને પ્રતીકાત્મક રીતે નકલી નોટો વરસાવી વિરોધ કર્યો હતો અને ‘નીરજા ગુપ્તા હાય હાય’ના નારા લગાવ્યા હતા. NSUIએ પૂર્વ કુલપતિ નીરજા ગુપ્તા સામે પોલીસ ફરિયાદ નોંધાવવા માટે યુનિવર્સિટી તંત્રને 72 કલાકનું અલ્ટીમેટમ આપ્યું છે. સંગઠનનું કહેવું છે કે જો આ સમયમર્યાદામાં ફરિયાદ નોંધવામાં નહીં આવે તો યુનિવર્સિટી ખાતે મોટાપાયે આંદોલન કરવામાં આવશે.
ઈન્ચાર્જ કુલપતિની ઓફિસમાં નકલી નોટો વરસાવી વિરોધ
પૂર્વ કુલપતિ સામે કથિત નાણાકીય ગેરરીતિના આક્ષેપોને લઈને NSUIના કાર્યકર્તાઓ ઈન્ચાર્જ કુલપતિ જગદીશ જોશીની ઓફિસમાં પહોંચ્યા હતા. અહીં કાર્યકર્તાઓએ પ્રતીકાત્મક રીતે નકલી નોટો વરસાવી હતી. વિરોધ દરમિયાન કાર્યકર્તાઓએ નીરજા ગુપ્તા વિરુદ્ધ સૂત્રોચ્ચાર કર્યા હતા. આ ઘટનાથી યુનિવર્સિટી (Gujarat University) પરિસરમાં થોડા સમય માટે વિરોધનું વાતાવરણ સર્જાયું હતું.
72 કલાકમાં ફરિયાદ નોંધાવવાની માગ
NSUIએ માંગ કરી છે કે પૂર્વ કુલપતિ નીરજા ગુપ્તા સામે કથિત નાણાકીય ગેરરીતિના મામલે પોલીસ ફરિયાદ દાખલ કરવામાં આવે. સંગઠને આ માટે યુનિવર્સિટી તંત્રને 72 કલાકનો સમય આપ્યો છે. NSUIના જણાવ્યા મુજબ, જો 72 કલાકમાં ફરિયાદ નોંધવામાં નહીં આવે તો ગુજરાત યુનિવર્સિટી (Gujarat University) સાથે સંકળાયેલી કોલેજોમાં બંધનું એલાન કરવામાં આવી શકે છે. આ ઉપરાંત કુલપતિનું મોઢું કાળું કરવાની ચીમકી પણ આપવામાં આવી છે.
PMJVKની અંદાજે રૂ.40 કરોડની ગ્રાન્ટને લઈને આક્ષેપ
આ સમગ્ર વિવાદના કેન્દ્રમાં PMJVK હેઠળ ગુજરાત યુનિવર્સિટી (Gujarat University)ને મળેલી અંદાજે રૂ.40 કરોડની ગ્રાન્ટ હોવાનું NSUI અને કોંગ્રેસના નેતાઓનું કહેવું છે. આક્ષેપ મુજબ, પૂર્વ કુલપતિ ડૉ. નીરજા ગુપ્તાએ પોતાને જ આ પ્રોજેક્ટના Principal Investigator (PI) તરીકે નિયુક્ત કર્યા હતા. આ હોદ્દા માટે તેમને કુલપતિ તરીકે મળતા પગાર ઉપરાંત આશરે રૂ.4.20 લાખનું વધારાનું મહેનતાણું મળ્યું હોવાનો દાવો કરવામાં આવ્યો છે. જોકે, આ તમામ આક્ષેપોની સત્તાવાર તપાસ બાદ જ હકીકત સ્પષ્ટ થશે.
પુત્રના બેન્ક ખાતામાં રૂ.9.84 લાખ ટ્રાન્સફર થયાનો દાવો
NSUI અને કોંગ્રેસ તરફથી એવો પણ આક્ષેપ કરવામાં આવ્યો છે કે ગ્રાન્ટની રકમ જે ખાતામાં જમા થઈ હતી, તેમાંથી આશરે રૂ.9.84 લાખ જર્મનીમાં રહેતા નીરજા ગુપ્તાના પુત્રના બેન્ક ખાતામાં ટ્રાન્સફર કરવામાં આવ્યા હતા. આ નાણાકીય વ્યવહાર અંગે પણ તપાસની માંગ કરવામાં આવી છે. આક્ષેપો સાચા છે કે નહીં અને રકમ કયા હેતુસર ટ્રાન્સફર થઈ હતી તે તપાસનો વિષય છે.
રૂ.40 કરોડની ગ્રાન્ટમાંથી મોટાભાગની રકમના ઉપયોગ અંગે સવાલ
વિરોધ કરનારાઓનો વધુ એક ગંભીર આક્ષેપ છે કે અંદાજે રૂ.40 કરોડની ગ્રાન્ટમાંથી 50 ટકાથી વધુ રકમના ઉપયોગનો હિસાબ હજુ સ્પષ્ટ થયો નથી. ગ્રાન્ટનો કેટલો હિસ્સો કયા પ્રોજેક્ટમાં વપરાયો, કોને ચૂકવણી કરવામાં આવી અને બાકીની રકમ ક્યાં છે તે અંગે પારદર્શક માહિતી જાહેર કરવાની માંગ પણ કરવામાં આવી રહી છે.
10 જેટલા હોદ્દા પર નિયમ વિરુદ્ધ નિમણૂકનો આક્ષેપ
પૂર્વ કુલપતિના કાર્યકાળ દરમિયાન કેટલાક વ્યક્તિઓને UGCના નિયમો વિરુદ્ધ મહત્વના પદો સોંપવામાં આવ્યા હોવાનો પણ આક્ષેપ કરવામાં આવ્યો છે. આક્ષેપ મુજબ, આશરે 10 જેટલા વ્યક્તિઓને ડિરેક્ટર સહિતના મહત્વના હોદ્દા આપવામાં આવ્યા હતા અને કેટલાક કર્મચારીઓને કુલપતિના પગાર કરતાં પણ વધુ વેતન ચૂકવાયું હતું. આ મુદ્દે વિવાદ ઊભો થયા બાદ આ 10 કર્મચારીઓને સસ્પેન્ડ કરવામાં આવ્યા હોવાનું જણાવાયું છે. સમગ્ર મામલાની તપાસ માટે એક કમિટીને જવાબદારી સોંપવામાં આવી છે.
સિન્ડિકેટ સભ્યો સામે પણ કાર્યવાહીની માંગ
કોંગ્રેસના કાર્યકારી પ્રમુખ ઈન્દ્રવિજયસિંહ ગોહિલે પણ સમગ્ર મામલે જવાબદારી નક્કી કરવાની માંગ કરી છે. તેમનું કહેવું છે કે જો પૂર્વ કુલપતિને Principal Investigator તરીકે નિયુક્ત કરવાની મંજૂરી સિન્ડિકેટ સભ્યોએ આપી હોય તો આ નિર્ણયમાં સામેલ સિન્ડિકેટ સભ્યોની ભૂમિકા અંગે પણ તપાસ થવી જોઈએ. તેમણે સિન્ડિકેટ સભ્યો સામે પણ જરૂરી કાર્યવાહી કરવાની માંગ કરી છે અને સમગ્ર મામલામાં જવાબદારી નક્કી કરવા પર ભાર મૂક્યો છે.
Gujarat Universityમાં જંતર-મંતર જેવા આંદોલનની ચીમકી
NSUI અને કોંગ્રેસે હવે આ મુદ્દે આંદોલન વધુ ઉગ્ર બનાવવાના સંકેત આપ્યા છે. સંગઠનનું કહેવું છે કે દિલ્હી ખાતેના જંતર-મંતર જેવા આંદોલનની તર્જ પર ગુજરાત યુનિવર્સિટી (Gujarat University) ખાતે વિરોધ પ્રદર્શન કરવામાં આવશે. આંદોલન માટે ગુજરાત યુનિવર્સિટીમાં અગાઉ અભ્યાસ કરી ચૂકેલા અને વિવિધ ક્ષેત્રોમાં હોદ્દા ધરાવતા લોકોને પણ જોડવામાં આવશે તેવી જાહેરાત કરવામાં આવી છે.
તપાસ બાદ જ આક્ષેપોની હકીકત સ્પષ્ટ થશે
નીરજા ગુપ્તાના કાર્યકાળ દરમિયાન ગ્રાન્ટના ઉપયોગ, નિમણૂકો, વધારાના મહેનતાણા અને નાણાકીય વ્યવહારોને લઈને કરવામાં આવેલા આક્ષેપો હાલમાં તપાસનો વિષય છે. બીજી તરફ, યુનિવર્સિટી (Gujarat University) દ્વારા તપાસ કમિટીને સમગ્ર મામલો સોંપવામાં આવ્યો હોવાનું સામે આવ્યું છે. હવે તપાસમાં ગ્રાન્ટના નાણાંનો વાસ્તવિક ઉપયોગ, વિવિધ ચુકવણીઓ, નિમણૂકો અને કથિત નાણાકીય વ્યવહારો અંગે શું હકીકત સામે આવે છે તેના પર સૌની નજર છે. સાથે જ NSUI દ્વારા આપવામાં આવેલા 72 કલાકના અલ્ટીમેટમ બાદ યુનિવર્સિટી તંત્ર શું નિર્ણય લે છે તે પણ મહત્વનું રહેશે.
આ પણ વાંચો:ગુજરાત યુનિવર્સિટીમાં પૂર્વ VC નીરજા ગુપ્તા સામે કરોડોના પગાર ખર્ચનો આક્ષેપ, ABVPએ કરી તપાસની માંગ
આ પણ વાંચો:ગુજરાત યુનિવર્સિટીની સ્થાપનાના 73 વર્ષે મળ્યા પ્રથમ મહિલા કુલપતિ
