જો કે દેશની મોટી હસ્તીઓ સંસદ, સામાજિક કાર્યક્રમો અને અન્ય સ્થળોએ અનૌપચારિક રીતે મળે છે, પરંતુ કેટલીક મીટિંગો યાદગાર બની જાય છે અને તેમને લાઇમલાઇટમાં આવતાં વાર નથી લાગતી. આવી જ ઘટના ઉપરાષ્ટ્રપતિ વેંકૈયા નાયડુના ઘરના લગ્ન સમારોહમાં જોવા મળી હતી. ઉપરાષ્ટ્રપતિ વેંકૈયા નાયડુના ઘરે લગ્ન સમારોહના રિસેપ્શનમાં આરએસએસના વડા મોહન ભાગવત અને સપા સુપ્રીમો મુલાયમ સિંહ યાદવ એક જ સોફામાં સાથે બેઠા જોવા મળ્યા હતા. બંને વચ્ચે વાતચીત પણ થઈ હતી. લગ્ન સમારોહમાં તેમની મુલાકાત સામાન્ય મુલાકાત માનવામાં આવે છે, પરંતુ બંને અલગ અલગ વિચારધારાઓ સાથે જોડાયેલા આ વ્યક્તિત્વની આ મુલાકાતને લઈને ઘણી ચર્ચાઓ પણ થઇ હતી.
નિહારિકાના લગ્ન તાજેતરમાં રવિતેજા સાથે થયા છે. સંરક્ષણ પ્રધાન રાજનાથ સિંહ, ગૃહ પ્રધાન અમિત શાહ, દિલ્હીના મુખ્ય પ્રધાન અરવિંદ કેજરીવાલ ઉપરાંત તમામ કેન્દ્રીય પ્રધાનો, સાંસદો અને સરકારી અધિકારીઓએ પણ સમારોહમાં હાજરી આપી હતી. સમારોહમાં પધારેલા મહેમાનોએ વર-કન્યાને આશીર્વાદ આપ્યા હતા. નિહારિકા ઉપરાષ્ટ્રપતિ વેંકૈયા નાયડુના પુત્ર હર્ષવર્ધન મુપાવરપુની પુત્રી છે.
નોંધનીય છે કે આ સમયે યુપી વિધાનસભા ચૂંટણીને લઈને રાજકીય પારો ગરમાયો છે. યુપીમાં સત્તારૂઢ ભાજપની સરખામણીમાં સપા પ્રમુખ અને પૂર્વ મુખ્યમંત્રી મુલાયમ સિંહ યાદવના પુત્ર આક્રમક વલણ અપનાવી રહ્યા છે. તાજેતરમાં, સપા સુપ્રીમોના નજીકના સંબંધીઓના ઘરો પર દરોડા પડ્યા બાદ બંને પક્ષો વચ્ચે શાબ્દિક યુદ્ધ વધુ તીવ્ર બન્યું છે. સાથે જ પીએમ મોદી પણ સતત યુપીની મુલાકાતે છે અને સપા પર નિશાન સાધવાનું ચૂકતા નથી.
