Lucknow Kasmandi Fort Mosque: ઉત્તર પ્રદેશના લખનઉના કસમંડી વિસ્તારમાં આવેલા કિલ્લા-મસ્જિદ વિવાદે મોટું સ્વરૂપ ધારણ કર્યું છે. બકરીઈદના તહેવાર પહેલા પ્રશાસને એક મોટું પગલું ભરતા વિવાદિત સ્થળ પર નમાઝ અદા કરવા પર સંપૂર્ણ પ્રતિબંધ લગાવી દીધો છે. પ્રશાસનનું કહેવું છે કે આ નિર્ણય કાયદો અને વ્યવસ્થા જાળવી રાખવા તેમજ કોઈપણ સંભવિત તણાવને રોકવાના ઉદ્દેશ્યથી લેવામાં આવ્યો છે. આ નિર્ણય બાદ સમગ્ર વિસ્તારમાં સુરક્ષા વ્યવસ્થા અત્યંત કડક કરી દેવામાં આવી છે.
શું છે સમગ્ર વિવાદ?(Fort Mosque)
પ્રશાસનિક અધિકારીઓના જણાવ્યા અનુસાર, વિવાદિત સ્થળને લઈને છેલ્લા કેટલાક દિવસોથી બે પક્ષો વચ્ચે મતભેદો વધી રહ્યા હતા. એક તરફ મુસ્લિમ પક્ષ આ સ્થળને મસ્જિદ ગણાવી રહ્યો છે, જ્યારે બીજી તરફ પાસી સમાજના લોકો આ સ્થાનને રાજા કંસનો ઐતિહાસિક કિલ્લો હોવાનો દાવો કરી રહ્યા છે. પાસી સમાજના અનેક સંગઠનોએ આ સ્થળને પુરાતત્વીય મહત્વ ધરાવતું સંરક્ષિત સ્થળ જાહેર કરવાની માંગ પણ ઉઠાવી છે. તેમનું કહેવું છે કે આ સ્થળ તેમના ઇતિહાસ અને સાંસ્કૃતિક વારસા સાથે જોડાયેલું છે.
વિસ્તારમાં ડ્રોન અને CCTVથી કડક નજર
વિવાદની સંવેદનશીલતાને જોતા જિલ્લા પ્રશાસન સતત બંને પક્ષોના પ્રતિનિધિઓ સાથે વાતચીત કરી રહ્યું છે. બકરીઈદને(Fort Mosque) ધ્યાનમાં રાખીને વિવાદિત સ્થળની આસપાસ પોલીસ અને સ્પેશિયલ પોલીસ ફોર્સ (PAC) ના જવાનોનો મોટો કાફલો તૈનાત કરવામાં આવ્યો છે. આ સાથે જ ડ્રોન અને CCTV કેમેરા દ્વારા સમગ્ર વિસ્તારનું સખત મોનિટરિંગ કરવામાં આવી રહ્યું છે. સોશિયલ મીડિયા પર કોઈ ભડકાઉ પોસ્ટ કે અફવા ન ફેલાય તે માટે સાયબર ટીમને પણ એક્ટિવ કરવામાં આવી છે. સ્થાનિક પ્રશાસનના મતે સ્થિતિ સંપૂર્ણ નિયંત્રણમાં છે અને ઐતિહાસિક પાસાઓની તપાસ કર્યા બાદ આગળની કાનૂની કાર્યવાહી નક્કી કરવામાં આવશે.
આ પણ વાંચો: અમદાવાદમાં જમાલપુર કાચની મસ્જિદમાં અસામાજિક તત્વોનો આતંક
આ પણ વાંચો: કેલિફોર્નિયાની સાન ડિએગો મસ્જિદમાં ગોળીબાર, સુરક્ષા ગાર્ડ સહિત 3ના મોત
આ પણ વાંચો: બાબર કે બાબરીના નામ પર મસ્જિદનું નામ ન રાખવાની માંગ કરતી અરજી પર સુપ્રીમ કોર્ટે આપ્યો ચુકાદો
