Gandhinagar news: રાજ્યના પાટનગર ગાંધીનગરને નવા મહિલા મેયર મળશે. નવા મહિલા મેયરની સત્તાવાર જાહેરાત થશે. તેની સાથે સ્ટેન્ડિંગ કમિટીના ચેરમેનની પણ જાહેરાત કરવામાં આવશે. વર્તમાન મેયર હિતેશ મકવાણાની મુદત પૂરી થઈ છે. આજે નવા મેયરના નામની જાહેરાત થશે. મહિલા મેયરની ટર્મ આવતા રાજકારણ ગરમ થઈ ગયું છે.
નવા મેયરની નિમણૂક થવાની હોઈ તેને લઈને અત્યારથી અટકળોનું બજાર ગરમ થઈ ગયું છે. કોના પર રાજધાનીના સંચાલનનો તાજ ઢોળાશે તેને લઈને સત્તાધારી પક્ષના વર્તુળોમાં ચર્ચા ચાલી રહી છે. શાસક પક્ષની અંદર અનેક નામો ચર્ચામાં હતા, નામ તો ફાઇનલ થઈ જ ગયું હશે, પરંતુ અત્યાર સુધી તેઓને નામ છૂપુ રાખવામાં સફળતા મળી છે. આમ પણ શાસક પક્ષ ચોંકાવવા માટે જાણીતો છે. તેથી ગમે ત્યારે કોથળામાથું બિલાડુ જ નહીં બીજું કશું પણ કાઢી શકે તો નવાઈ નહીં લાગે.
આમ તો ગાંધીનગરને નવા મહિલા મેયર એપ્રિલ મહિનામાં જ મળી જવાના હતા પરંતુ લોકસભાની ચૂંટણી અને ત્યારબાદ નવી સરકારની શપથવિધિના કારણે નવા મહિલા મેયર મળવામાં બે મહિના જેટલો લાંબો સમય વીતી ગયો છે. ગત 10 જૂનના રોજ સામાન્ય સભામાં નવા મહિલા મેયર નક્કી થવાના હતા પરંતુ કેન્દ્રીય ગૃહ મંત્રી અને ગાંધીનગરના સાંસદ અમિત શાહ વ્યસ્ત હોવાથી નામો નક્કી થઈ શક્યા ન હતા અને તેને કારણે સામાન્ય સભા મુલતવી રાખવામાં આવી હતી. હવે ગાંધીનગર મહાનગરપાલિકાની સામાન્ય સભામાં નવા મહિલા મેયર,સ્ટેન્ડિંગ કમિટીના ચેરમેન અને ડેપ્યુટી મેયરની નિમણૂક થવાની છે તે પહેલા મુખ્યમંત્રી, પ્રદેશ ભાજપના પ્રભારી અને પ્રદેશ પ્રમુખ વચ્ચે બેઠક યોજવામાં આવી હતી અને તેમાં નિરીક્ષકો દ્વારા તૈયાર કરવામાં આવેલી પેનલ અંતર્ગત ચર્ચા કરવામાં આવી હતી અને નામ નક્કી કરવામાં આવ્યા હતા.
જોકે ગાંધીનગરના સાંસદને પણ આ નામો અંગે વાકેફ કરી દેવામાં આવ્યા છે. સવારે 11થી કલાકે પક્ષ દ્વારા સામાન્ય સભામાં મેન્ડેટ આપવામાં આવશે અને તેના આધારે નવા મેયર અને પદાધિકારીઓની નિમણૂક ઉપર મતદાન પ્રક્રિયા હાથ ધરવામાં આવશે. છેલ્લી ઘડી સુધી કોર્પોરેટરો દ્વારા પદ મેળવવા માટે મથામણો કરવામાં આવી હતી સ્થાનિક સંગઠન દ્વારા પણ આખરે આ મામલો પ્રદેશ કક્ષા ઉપર છોડી દેવામાં આવ્યો હતો અને કોઈ ચોક્કસ પેનલના નામ આપવામાં આવ્યા ન હતા. પક્ષ દ્વારા જે નિર્ણય લેવામાં આવે તેને વધાવી લેવાનું નક્કી કરવામાં આવ્યું હતું. બીજી બાજુ હજી સુધી સમિતિઓ અંગે સરકારમાંથી કોઈ નિર્ણય લેવામાં આવ્યો નહીં હોવાથી હાલ સાત સમિતિના ચેરમેન અંગે પણ સસ્પેન્સ યથાવત રહેશે તે નક્કી છે.
આ પણ વાંચો: અમરેલી: ત્રીજા દિવસે વાતાવરણ પલટાયું, વરસાદ પડતા ખેડૂતોમાં ખુશીની લહેર
આ પણ વાંચો: રાજકોટની સ્કૂલો ફરી વિવાદમાં, બકરી ઈદના દિવસે પણ ચાલુ રાખતા સર્જાયો વિવાદ
આ પણ વાંચો: સૌરાષ્ટ્ર-કચ્છના દરિયાકાંઠેથી સપ્તાહમાં 150 કરોડથી વધુના ચરસ-ડ્રગ્સ મળ્યાં
