Ganga Expressway Accident: ઉત્તર પ્રદેશના ગંગા એક્સપ્રેસવે પર અકસ્માતોનો સિલસિલો અટકવાનું નામ નથી લઈ રહ્યો. આજે વહેલી સવારે એક ભયાનક અકસ્માત સર્જાયો છે, જેમાં લુધિયાણાથી હરદોઈ જઈ રહેલી એક મુસાફરોથી ભરેલી ડબલ ડેકર બસ રસ્તા પર ઉભેલા ટ્રક સાથે જોરદાર ટકરાઈ હતી. આ કરુણ દુર્ઘટનામાં 30 થી 35 મુસાફરો ઘાયલ થયા છે, જે પૈકી કેટલાકની હાલત અત્યંત નાજુક હોવાનું જાણવા મળી રહ્યું છે.
ચીસાચીસ અને અફરાતફરીનો માહોલ
અકસ્માત એટલો જોરદાર હતો કે બસનો આગળનો ભાગ કચ્ચરઘાણ વળી ગયો હતો. વહેલી સવારે જ્યારે મુસાફરો ગાઢ નિદ્રામાં હતા, ત્યારે અચાનક થયેલા ધડાકા સાથે બસમાં ચીસાચીસ મચી ગઈ હતી. ઘટનાની જાણ થતા જ સ્થાનિક પોલીસ અને રાહત ટીમો ઘટનાસ્થળે પહોંચી હતી અને બસમાં ફસાયેલા મુસાફરોને બહાર કાઢવાની કામગીરી હાથ ધરી હતી. તમામ ઘાયલોને તાત્કાલિક સંભલ જિલ્લાના બહુજોઈ CHC ખાતે સારવાર માટે ખસેડવામાં આવ્યા છે, જ્યારે ગંભીર રીતે ઈજાગ્રસ્તોને વધુ સારવાર માટે બદાયૂં જિલ્લા હોસ્પિટલમાં રેફર કરાયા છે.
ડ્રાઈવરની બેદરકારી કે નશો?
પ્રાથમિક માહિતી અને ચર્ચાઓ મુજબ, આ અકસ્માત પાછળ બસ ડ્રાઈવરની ગંભીર બેદરકારી સામે આવી રહી છે. એવું કહેવામાં આવી રહ્યું છે કે ડ્રાઈવર નશાની હાલતમાં હતો, જેના કારણે તેણે વાહન પરનું નિયંત્રણ ગુમાવ્યું અને બસ સીધી ઉભેલા ટ્રક પાછળ ઘૂસી ગઈ. જોકે, પોલીસ આ અંગે સત્તાવાર તપાસ કરી રહી છે અને ડ્રાઈવરના બ્લડ સેમ્પલની રિપોર્ટ બાદ જ સત્ય સામે આવશે.
Expressway પર અકસ્માતોનું કેન્દ્ર
છેલ્લા કેટલાક દિવસોથી ગંગા એક્સપ્રેસવે પર અકસ્માતોની હારમાળા સર્જાઈ છે. અગાઉ પાપડ વિસ્તાર પાસે કાર સામે બળદ આવી જતાં બે મહિલાઓ ઘાયલ થઈ હતી, તો અન્ય એક ઘટનામાં કારનું ટાયર ફાટતા મોટી જાનહાનિ ટળી હતી. વારંવાર બનતી આવી ઘટનાઓ એક્સપ્રેસવે પર સુરક્ષા અને ડ્રાઈવિંગ શિસ્ત સામે ગંભીર સવાલો ઉભા કરે છે.
