GSRTC Holi Special Bus 2026: હોળી અને ધૂળેટીના આગામી તહેવારોમાં મુસાફરોની સુવિધામાં વધારો કરવા માટે ગુજરાત રાજ્ય માર્ગ વાહન વ્યવહાર નિગમ (GSRTC) દ્વારા કમર કસવામાં આવી છે. તહેવારો દરમિયાન વતન જતા લોકો અને યાત્રાધામોની મુલાકાતે જતા શ્રદ્ધાળુઓને હાલાકી ન પડે તે માટે નિગમે 1300 વધારાની બસો દોડાવવાનો નિર્ણય કર્યો છે.
કયા વિસ્તારોમાં મળશે વિશેષ સુવિધા?
હોળીના તહેવાર દરમિયાન ખાસ કરીને સૌરાષ્ટ્ર અને ઉત્તર ગુજરાતથી આદિવાસી પટ્ટા તરફ જનારા મુસાફરોનો પ્રવાહ ખૂબ જ વધારે રહેતો હોય છે, જેને ધ્યાનમાં રાખીને એસટી નિગમ દ્વારા આ વિસ્તારોમાં વિશેષ સુવિધાઓ ઉભી કરવામાં આવી છે. અમદાવાદ, રાજકોટ, અમરેલી, જૂનાગઢ, ભાવનગર અને ભુજ જેવા મુખ્ય શહેરોમાંથી મુસાફરોની અવરજવર માટે બસોની સંખ્યામાં નોંધપાત્ર વધારો કરવામાં આવ્યો છે. ખાસ કરીને ગોધરા, દાહોદ, ઝાલોદ અને છોટાઉદેપુર તરફ જનારા શ્રમિકો અને તેમના પરિવારો વતનમાં હોળીની ઉજવણી કરવા સરળતાથી પહોંચી શકે તે માટે વિશેષ પરિવહન સુવિધાનું સચોટ આયોજન કરાયું છે.
7500 ટ્રીપોનું કરાશે સંચાલન
એસ.ટી. નિગમ દ્વારા જાહેર કરવામાં આવેલી વિગતો મુજબ, આ 1300 વધારાની બસો દ્વારા રાજ્યભરમાં કુલ 7500 જેટલી ટ્રીપોનું સંચાલન કરવામાં આવશે. ખાસ કરીને જે રૂટ પર મુસાફરોનો પ્રવાહ વધુ રહે છે, ત્યાં વધારાની ફ્રીક્વન્સી સાથે બસો દોડાવવામાં આવશે. આ વિશેષ સેવાઓ 27 ફેબ્રુઆરીથી 5 માર્ચ દરમિયાન કાર્યરત રહેશે.
દ્વારકા અને ડાકોરના દર્શનાર્થીઓ માટે ખાસ વ્યવસ્થા
હોળીના પર્વ પર ડાકોર અને દ્વારકાના જગત મંદિરના દર્શનનું વિશેષ આધ્યાત્મિક મહત્વ હોય છે, જેને ધ્યાનમાં રાખીને લાખોની સંખ્યામાં ઉમટતા દર્શનાર્થીઓની સુવિધા માટે એસટી નિગમ દ્વારા ખાસ આયોજન કરવામાં આવ્યું છે. ભક્તોની ભીડને પહોંચી વળવા માટે દ્વારકા અને ડાકોર જવા માટે ખાસ 450 વધારાની બસો ફાળવવામાં આવી છે. આ વ્યવસ્થા હેઠળ દર્શનાર્થીઓ સીધા મંદિરો સુધી સરળતાથી પહોંચી શકે તે રીતે ખાસ રૂટનું આયોજન પણ કરવામાં આવ્યું છે, જેથી પદયાત્રીઓ અને અન્ય મુસાફરોને મુસાફરીમાં કોઈ મુશ્કેલી ન પડે.
GSRTC ઓનલાઇન બુકિંગ અને હેલ્પલાઇન
એસટી નિગમ દ્વારા આ વિશેષ બસ સેવાઓ 27 ફેબ્રુઆરીથી 5 માર્ચ 2026 દરમિયાન કાર્યરત કરવામાં આવશે. મુસાફરોની ભીડને ટાળવા અને સરળ મુસાફરી સુનિશ્ચિત કરવા માટે નિગમ દ્વારા તમામ ડેપો પરથી આ વધારાની સર્વિસોની વિસ્તૃત માહિતી અને ટિકિટો ઉપલબ્ધ કરાવવામાં આવશે. વધુમાં, નિગમે મુસાફરોને અગવડતાથી બચવા માટે એડવાન્સ બુકિંગ કરાવવા ખાસ અપીલ કરી છે, જેના માટે મુસાફરો નિગમની અધિકૃત વેબસાઇટ www.gsrtc.in અથવા GSRTC મોબાઈલ એપ્લિકેશનનો ઉપયોગ કરી શકે છે. કોઈપણ પ્રકારની પૂછપરછ કે માહિતી માટે મુસાફરો ટોલ ફ્રી નંબર 1800 233 666666 પર 24 કલાક સંપર્ક કરી શકશે.
