Gujarat Rain News: ગુજરાતમાં ચાલુ ચોમાસા દરમિયાન ભારે વરસાદે (Gujarat Heavy Rain) અનેક વિસ્તારોમાં જનજીવન અસ્તવ્યસ્ત કરી દીધું છે. રાજ્યના પૂર્વથી પશ્ચિમ અને ઉત્તરથી દક્ષિણ સુધીના અનેક જિલ્લાઓમાં સતત વરસી રહેલા વરસાદને કારણે નદીઓમાં ઘોડાપૂર આવ્યું છે અને અનેક નીચાણવાળા વિસ્તારોમાં પાણી ભરાઈ જતાં લોકોને ભારે હાલાકીનો સામનો કરવો પડી રહ્યો છે.
Gujarat Heavy Rain: છેલ્લા ચાર દિવસમાં 31 લોકોના મોત
સરકારી માહિતી મુજબ રાજ્યમાં વરસાદ અને પૂરની વિવિધ ઘટનાઓમાં અત્યાર સુધી કુલ 56 લોકોના મોત નોંધાયા છે. ચિંતાજનક બાબત એ છે કે માત્ર 21 જુલાઈથી 25 જુલાઈ દરમિયાન જ 31 લોકોના જીવ ગયા છે, જે વરસાદી આફતની ગંભીરતા દર્શાવે છે.
સૌથી વધુ અસર દક્ષિણ ગુજરાતના નવસારી, વલસાડ, તાપી અને આસપાસના વિસ્તારોમાં જોવા મળી છે. પૂર્ણા, અંબિકા, કાવેરી અને ઓરંગા જેવી નદીઓમાં આવેલા ઘોડાપૂરને કારણે અનેક લોકો પાણીમાં તણાઈ ગયા હતા. કેટલાક વિસ્તારોમાં વીજળી પડવાની ઘટનાઓ તેમજ કાચાં મકાનો અને દિવાલો ધરાશાયી થતાં પણ જાનહાનિ નોંધાઈ છે.
આ પહેલાં સુરત શહેર અને જિલ્લામાં ભારે વરસાદ (Gujarat Heavy Rain) અને પૂરની સ્થિતિ દરમિયાન 25 લોકોના મોત થયા હતા. ત્યારબાદ છેલ્લા ચાર દિવસમાં નોંધાયેલા 31 મોત સાથે રાજ્યનો કુલ વરસાદી મૃત્યુઆંક વધીને 56 થયો છે.
પરિસ્થિતિને ધ્યાનમાં રાખીને રાજ્ય સરકાર દ્વારા અસરગ્રસ્ત જિલ્લાઓમાં બચાવ અને રાહત કામગીરી સતત ચાલુ રાખવામાં આવી છે. NDRF અને SDRFની ટીમો વિવિધ સ્થળોએ તૈનાત છે અને પૂરગ્રસ્ત વિસ્તારોમાંથી લોકોને સુરક્ષિત સ્થળોએ ખસેડવાની કામગીરી હાથ ધરવામાં આવી રહી છે. રાજ્ય સરકાર દ્વારા અસરગ્રસ્ત પરિવારોને જરૂરી સહાય પહોંચાડવા તેમજ મૃતકોના પરિવારજનોને નિયમો અનુસાર આર્થિક સહાય આપવાની પ્રક્રિયા પણ શરૂ કરવામાં આવી છે.
હવામાન વિભાગે આગામી દિવસોમાં પણ કેટલાક વિસ્તારોમાં ભારે વરસાદ (Gujarat Heavy Rain)ની શક્યતા વ્યક્ત કરી હોવાથી લોકોને નદી-નાળા નજીક ન જવાની અને સ્થાનિક તંત્રની સૂચનાઓનું પાલન કરવાની અપીલ કરવામાં આવી છે.
આ પણ વાંચો:12 કલાકથી અમદાવાદ-રાજકોટ હાઈવે બંધ,સાંતલપુરમાં 8 લોકોનું રેસ્ક્યૂ
આ પણ વાંચો:વરસાદી ઋતુમાં સોળે કળાએ ખીલ્યો પાવાગઢ, હજારો પ્રવાસીઓ ઉમટ્યા
