Gujarat High Court Child Custody: પતિ-પત્ની વચ્ચેના અણબનાવ અને છૂટાછેડાની લડાઈમાં જ્યારે માસૂમ બાળકોને મોહરો બનાવવામાં આવે છે, ત્યારે કોર્ટ મૌન રહી શકતી નથી. ગુજરાત હાઈકોર્ટે તાજેતરમાં એક દંપતીને ફટકાર લગાવતા સ્પષ્ટ શબ્દોમાં કહ્યું છે કે, વૈવાહિક વિવાદોમાં પોતાના પક્ષમાં ચુકાદો મેળવવા માટે બાળકોની કસ્ટડીને હથિયાર કે દબાણના સાધન તરીકે ઉપયોગ કરવો એ અત્યંત ખોટું અને દુઃખદ છે.
“બાળક આઘાતમાં સરી પડે છે”: Gujarat High Court
જસ્ટિસ એન. એસ. સંજય ગૌડા અને ડી. એમ. વ્યાસની ખંડપીઠે એક કેસની સુનાવણી દરમિયાન અવલોકન કર્યું કે, ઘણા કિસ્સામાં માતા કે પિતામાંથી કોઈ એક એવી રીતે બાળકની કસ્ટડી મેળવવાનો પ્રયાસ કરે છે કે જેથી સામેના પાત્રને બાળકના અધિકારથી વંચિત રાખી શકાય.
હાઈકોર્ટે ઉમેર્યું કે, “માતા-પિતાના ઝઘડામાં નાનું બાળક બિનજરૂરી માનસિક આઘાત ભોગવે છે. ઘણીવાર તો બાળકને એ પણ ખબર નથી હોતી કે આ કાનૂની લડાઈ શું છે અને તે તેના ભલા માટે છે કે નહીં. બાળકોને દબાણ લાવવાના મોહરા તરીકે વાપરવાની પદ્ધતિ ખોટી છે.”
શું હતો પાલનપુરના દંપતીનો મામલો?
આ વિવાદ પાલનપુરના એક દંપતીનો હતો, જેમના લગ્ન વર્ષ ૨૦૨૦માં થયા હતા અને ત્યારબાદ મે 2024માં તેમના છૂટાછેડા થયા હતા. વિવાદની મુખ્ય બાબત એ હતી કે પત્ની પોતાની ત્રણ વર્ષની દીકરીને લઈને પિયર જતી રહી હતી, જેના જવાબમાં પતિએ એવો દાવો કર્યો હતો કે ‘તલાકનામા’ની શરતો મુજબ બાળકીની કસ્ટડી તેને સોંપવામાં આવી છે. જોકે, પત્નીએ આ મામલે હાઈકોર્ટના દ્વાર ખખડાવતા ગંભીર આક્ષેપ કર્યો હતો કે તેની પાસે દબાણ હેઠળ અને છેતરપિંડી આચરીને આ દસ્તાવેજ પર સહી કરાવવામાં આવી હતી.
માતાને મળી દીકરીની કસ્ટડી
બંને પક્ષોની દલીલો સાંભળ્યા બાદ હાઈકોર્ટે તલાકનામાની વિશ્વસનીયતા પર શંકા વ્યક્ત કરી હતી. કોર્ટે અવલોકન કર્યું કે દંપતીએ પહેલેથી જ કોર્ટમાંથી છૂટાછેડાની ડિક્રી મેળવી લીધી હતી, તો પછી અલગથી આવા દસ્તાવેજની જરૂર શું હતી? અંતે, હાઈકોર્ટે પતિને આદેશ આપ્યો કે તે દીકરીની કસ્ટડી માતાને સોંપી દે. જો પતિને કસ્ટડી જોઈતી હોય, તો તેણે કાયદેસર રીતે ફેમિલી કોર્ટમાં ‘ગાર્ડિયન એન્ડ વોર્ડ એક્ટ’ હેઠળ અરજી કરવી પડશે.
