ગાંધીનગર,
ભારત દેશમાં સૌ પ્રથમ વાર વિશ્વની સૌ પ્રથમ ગુજરાત ફોરેન્સિક સાયન્સીસ યુનિવર્સિટી, ગાંધીનગર ખાતે 8મી વાર્ષિક ઇન્ટરપા કોન્ફરન્સનું આયોજન તા.11 થી 13 ફેબ્રુઆરી 2019 દરમિયાન કરાયું છે. મુખ્યમંત્રી શ્રી વિજયભાઇ રૂપાણી તા.11મી ફેબ્રુઆરી ૨૦૧૯ના રોજ સવારે 10-00કલાકે આ ઇન્ટરનેશનલ એસોસીએશન ઓફ પોલીસ એકેડમી (ઇન્ટરપા) કોન્ફરન્સને ખુલ્લી મૂકીને પ્રેરક માર્ગદર્શન આપશે. ઉપરાંત ઇન્ટરપાના પ્રમુખ પ્રો. ડૉ. ઇલમાઝ કોલક કી નોટ એડ્રેસ આપશે એમ યુનિવર્સિટીના રજીસ્ટ્રાર દ્વારા જણાવાયું છે.
ફોરેન્સિક સાયન્સીસ યુનિવર્સિટીના ઓડિટોરીયમ હોલ ખાતે યોજાનાર આ ત્રિ-દિવસીય કોન્ફરન્સમાં ૩૬ થી વધુ દેશના ૧૦૦ થી વધુ જેટલા સીનીયર પોલીસ અધિકારીઓ ભાગ લેનાર છે. આ કોન્ફરન્સમાં ‘‘સાયબર સીક્યુરીટી એન્ડ કોમ્બાટીંગ સાયબર ક્રાઇમ’’ થીમ પર ચર્ચા વિચારણા કરવામાં આવશે. સાથે સાથે કોન્ફરન્સ દરમિયાન ઉઝબેકિસ્તાનની એકેડમી ઓફ મીનીસ્ટ્રી ઓફ ઇન્ટીરિયર, મોંગોલીયાની લો એન્ફોર્સમેન્ટ યુનિવર્સિટી અને રિ-પબ્લીક ઓફ કઝાખસ્તાનની અને કારાગાંડી એકેડમી, મીનીસ્ટ્રી ઓફ ઇન્ટરનલ અફેર્સ દ્વારા જી.એફ.એસ.યુ. સાથે એમ.ઓ.યુ. કરાશે.
અત્રે ઉલ્લેખનીય છે કે, ઇન્ટરનેશનલ એસોસીયેશન ઓફ પોલીસ એકેડમી (INTERPA) એ દુનિયામાં આવેલી પોલીસ એકેડમીઝ અને તેને સમકક્ષ, સુરક્ષા ક્ષેત્રે કાર્યરત સંસ્થાઓનું વિશ્વભરનું એસોસીએશન છે. જેની સ્થાપના તા.૨ જુલાઇ, ૨૦૧૧નાં રોજ ઇસ્તંબુલમાં થઇ હતી. જેમાં પુરોપ, એશિયા, આફ્રીકા અને લેટીન અમેરિકાના દેશો જેવા કે ભારત, મલેશીયા, સાઉથ કોરીયા, ઓસ્ટ્રેલીયા, યુ.કે., ઉઝબેકીસ્તાન, વિગેરે કુલ ૫૬ દેશનાં કુલ ૭૨ સભ્યો છે. ગુજરાત ફોરેન્સિક સાયન્સીસ યુનિવર્સિટી (GFSU) આ ઇન્ટરપાની સભ્ય છે. જેનો ઉદેશ પોલીસ તાલીમ અને શિક્ષણ ક્ષેત્રે આંતરરાષ્ટ્રીય કક્ષાએ કોમ્યુનીકેશન એન્ડ કોલોબોરેશનનું પ્લેટફોર્મ પુરુ પાડવાનો છે.
આ ૮મી વાર્ષિક ઇન્ટરપા કોન્ફરન્સમાં સીનીયર પોલીસ અધિકારીશ્રીઓ, પોલીસ એકેડમીના વડાઓ, પોલીસ ટ્રેનીંગ ઇન્સ્ટીટ્યુટના વડાઓ ભાગ લેનાર છે અને આ કોન્ફરન્સમાં ક્રાઇમ સીન ઇન્વેસ્ટીગેશન, ડીજીટલ એવીડન્સ, હેટ ક્રાઇમ ઓન સાયબર સ્પેસ, સીનરજેસ્ટીક ઇફેક્ટ ઓન ટેકનોલોજી ઇન કોમ્બેટીંગ ક્રાઇમસ, મોડર્ન ટેકનીકસ / મેથડ્સ ઓફ કોમ્બેટીંગ સાયબર ક્રાઇમ્સ, ટેકલીંગ ડીસ્ટબીંગ ઇનફોર્મેશન ઓન સોશ્યલ મીડિયા વિગેરે જેવા વિષયો ઉપર તલસ્પર્શી ચર્ચા વિચારણા કરવામાં આવશે.
આજના આ સાયબર વર્લ્ડમાં સાયબર ને લગતા ગુન્હાઓ દેશ અને તેની વિવિધ સંસ્થાઓ માટે ગંભીર પ્રશ્ન બની ગયો છે. ગુજરાત ફોરેન્સિક સાયન્સીસ યુનિવર્સિટી (GFSU) એ ક્રીમીનલ જસ્ટીસ ડીલીવરી સીસ્ટમને સુદ્રઢ બનાવવા, બોર્ડરપોલ, એશીયનપોલ, ઇન્ટરપા વિગેરે સંસ્થાઓ સાથે જોડાણ કરીને વિશ્વભરના પોલીસ અધિકારીઓને સતત તાલીમ આપવાની તેમજ ફોરેન્સિક સુવિધાઓ ઉપલબ્ધ કરવાની કામગીરી કરી રહી છે. જેના કારણે ખુબ જ ટુંકા સમયમાં જી.એફ.એસ.યુ. એ આંતરરાષ્ટ્રીય ખ્યાતી પ્રાપ્ત કરી છે.
