ભારતભરની સાથે સાથે ગુજરાતમાં પણ કોરોના વાયરસના કેસો ઘટ્યા છે, પરંતુ દેશના લોકોને કોરોના મહામાંરીમાંથી છુટકારો મળવો હજી પણ દુર છે. આ સમયે સરકારે પણ દિવાળી, નવરાત્રી સહિતના તહેવારો મનાવવા પર પ્રતિબંધ મુક્યો છે, જેના કારણે મોટા ભાગના લોકોને આર્થિક તંગીનો ઓન સામનો કરવો પડ્યો છે.
આ સમયમાં સરકારે દશેરાના દિવસે રાવણદહનની ઉજવણી પર પણ પ્રતિબંધ લગાવી દીધો છે. એવામાં દશેરા પહેલા મળતા ફાફડા-જલેબીના ઓર્ડર પર પણ માઠી અસર પડી છે. મોંઘવારી અને કોરોનાને કારણે વેપારીઓની ઘરાકી પર પણ મોટી અસર પડી છે.
નવરાત્રિમાં ગરબા રમવા પર પ્રતિબંધ મૂકાયા હતો, ત્યારબાદ હવે સરકારે આ દશેરાએ દુકાનોની બહાર જાહેરમાં ફાફડા અને જલેબી ખાવા પર પ્રતિબંધ મૂકી દીધો છે. સરકારની સૂચના બાદ ફૂડ એન્ડ ડ્રગ વિભાગે આ અંગે મીઠાઇ અને ફરસાણ એસોસિએશનને ગાઇડલાઇનનું પાલન કરવા સુચના આપી છે અને આ સમયે સાવચેતી રાખવા દુકાનો પર થતી ભીડને રોકવા અને સોશિયલ ડિસ્ટન્સિંગના પાલન કરાવવા આ નિર્ણય લેવાયો છે.
કોરોનાના કારણે 400 કરોડના ફાફડા-જલેબીના વેપાર પર થશે અસર
રાજ્યમાં દશેરા દિવસે ફાફડા-જલેબીના વેપારની મોટી આશાઓ વેપારીઓને હોય છે, પરંતુ હાલમાં ચાલી રહેલી કોરોના મહામારીના કારણે આ વેપાર પર પણ કોરોના ગ્રહણ લાગ્યું છે. એક અંદાજ મુજબ, દર વર્ષે દશેરા પર ગુજરાતમાં લોકો 400થી 500 કરોડના ફાફડા-જલેબી અને ચોળાફળી આરોગી જતા હતા. પરંતુ આ વખતે કોરોનાકાળ અને નિયમો ઉપરાંત આર્થિક તંગીને કારણે ધંધો 200 કરોડની આસપાસ રહેવાની આશંકા છે. કોરોનાના ડરથી ઘણા લોકો બહાર નીકળવાના નથી. તેથી 50 ટકા ધંધો થાય તેવી શક્યતા નથી.
