હાર્દિક પટેલની કથીત CD બહાર આવ્યા બાદ રાજકારણ ક્ષેત્રે ભૂકંપ આવ્યો છે. આ સીડી અંગે સોશિયલ મીડિયા પર લોકો પોતાની પ્રતિક્રિયા આપી રહ્યાં છે. જાણીતા દલીત નેતા જીગ્નેશ મેવાણીએ પત્ર લખીને હાર્દિકને નૈતિક ટેકો આપ્યો છે. જાણો શું લખ્યું છે જીગ્નેશ મેવાણીએ આ પત્રમાં,

હાર્દિક પટેલે ઘણાં સમય અગાઉ કહેલું એમ એક ષડયંત્રના ભાગરુપ તેની એકપછી એક કહેવાતી સેક્સ સીડીઓ બહાર આવી રહી છે. આજે ગુજરાત ભાજપની જે પ્રકારે ઘેટી ભરાઈ છે તે જોતાં આ પ્રકારની સેક્સ-સીડી બહાર આવે તો આપણને કોઈ આશ્ચર્ય થવું જોઈએ નહીં. અને સારું જ  છે કે ભાજપ ધારતું હતું એટલો હોબાળો ના થયો. પટેલ સમાજ હાર્દિક સાથે અધિખમ છે. પરંતુ, રાજનીતિ કઈ હદે નીચલા સ્તર ઉપર જઇ શકે છે એનો આ એક આંખ ઉઘાડી દેનારો દાખલો છે. ફકત 24 વર્ષના યુવાનના અવાજને દબાવી દેવા આખું તંત્ર કામે લાગે અને તેને રાજદ્રોહનો આરોપી બનાવવાથી લઈને તેની સેક્સ સીડી બહાર પડવાના ષડયંત્રો કરવા પડે તે હાર્દીકના નહીં ઓણ હાર્દિકના વિરોધીઓના ચરિત્ર વિશે ઘણું કહી જાય છે. માત્ર પાટીદાર સમાજ નહીં, ગુજરાતની સાડા 6 કરોડ જનતા જાણે છે કે આ પ્રકારના કાવતરાનો સીધો લાભ કોને મળી શકે.

આપણી જનતા સેક્સ જેવા વિષયના મામલે અત્યંત નાજુક વલણ ધરાવે છે. જાહેર જીવનમાં વ્યકિતના અંગત જીવનને ઘસેડવું જરીક પણ ઉચિત નથી. બે પુખ્ત વયના સ્ત્રી -પુરુષો કે યુવાન -યુવતીઓ પરસ્પરની સહમતીથી સેક્સ માણે એમાં દુનિયાના ત્રીજા કોઈ વ્યક્તિની દાખલગીરી ના હોઇ શકે આવી પાયાની સમજ વિદેશોમાં શાળા જીવન દરમિયાન જ કેળવાઈ જતી હોય છે. પરંતુ, જે દેશે કામસૂત્ર આપ્યું તે દેશ આજે સેક્સ શબ્દના પ્રયોગ માત્રથી ભડકી ઉઠે છે.

હું સ્પષ્ટપણે માનું છું કે આ તમામ સેક્સ વિડિઓમાં જે દેખાય છે તે વ્યક્તિ હાર્દિક પટેલ નથી. મારી શુદ્ધ જાણકારી અને સમજ મુજબ આ વીડિયોને એક ષડયંત્રના ભાગરૂપ તૈયાર કરવામાં આવ્યો છે. પણ દલીલ ખાતર માનવામાં આવે કે આ વીડિયોમાં જે દેખાય છે તે હાર્દિક પટેલ જ છે તો પણ આપણે શી પંચાત ?

આપણે નિસ્બત હોવી જોઈએ ગુજરાતના 50 લાખ એ નાગરીકો માટે જેની પાસે રોજગાર નથી, જે બાળકો કુપોષિત છે તે મુદ્દે, જીએસટી અને નોટબંધીની મારનો ભોગ બનેલા લોકો વિશે અને આ લોક વિરોધી વિકાસ મોડેલ વિશે. ચૂંટણી સમયે સરકારને પાસે 5 વરસનો હિસાબ માંગવાનો હોય. ચર્ચા એ મુદ્દે કરવાની હોય કે ગઇ વિધાન સભાની ચૂંટણીમાં જે 50 લાખ મકાનો બાંધવાનું જે વચન આપ્યું હતું તેનું શું થયું? શું થયું બેરોજગાર યુવાનોને દર વર્ષે 2 કરોડ રોજગાર આપવાના વચનનું. પણ આપણને હાર્દિક પટેલની કથિત સેક્સ સિડીમાં વ્યસ્ત રાખવામાં આવી રહ્યા છે.

કોઈ એક વ્યક્તિના અંગત જીવનને આ સ્વરૂપે જાહેરમાં બહાર લાવી આ દેશને શુ હાંસલ થશે? અને હાર્દિકના આ કહેવાતા વીડીઓમાં જે બહેન દેખાય છે એની ગરિમાનું શું? રાજનીતિ ખાતર આ વિડિઓમાં દેખાતા કોઈ મહિલાની આહુતિ શા માટે લેવાવી જોઈએ. કલ્પના કરો કે આપણા પરીવારની કોઈ મહિલાની અંગત પળોને આ રીતે જાહેર કરવામાં આવે તો ! શુ આજ છે ગુજરાતની અસ્મિતા અને ગુજરાતનું ગૌરવ! આ પ્રકારના વિડિઓકાંડથી હાર્દિક પટેલની નહીં ગુજરાતની બદનામી થાય છે.

હું આ લખી રહયો છું ત્યારે દિલ્હીમાં છું. અહીં લોકો આપણી પર હસી રહયા છે કે તમે લોકો ગુજરાતના સાડા 6 કરોડ લોકોના પાયાના સવાલોની ચર્ચાને બદલે કોઈ વ્યક્તિના સેક્સ વિડીઓમાં ક્યાં પડ્યા! અગાઉ કહ્યું એમ ચૂંટણી સમયે મુદ્દો હોવો જોઈએ કે ભાજપના 2012ના મેનિફેસ્ટોમાંથી કયા વચનો પાળવામાં આવ્યા,નહીં કે કોઈની સેક્સ લાઈફ.

જ્યાં સુધી કોઈપણ મહિલા દ્વારા જાતીય સતામણી કે જાતીય શોષણની ફરિયાદ ના હોય ત્યાં સુધી બે પુખ્ત વ્યક્તિઓ વચ્ચે સહમતિથી બંધાતા સંબંધમાં કોઈ ને પણ આપત્તિ ના હોવી જોઈએ. બલ્કે, ખરું જોતાં તો જે પણ લોકો એ આ વિડિઓ બનાવી તેને જાહેર કરી કોઈના રાઈટ ટુ પ્રાઇવસીનો ભંગ કરી ગંભીર પ્રકારનો ગુનો આચર્યો છે. લોકોના બેડરૂમમાં ઘૂસવાની આવી ગંદી રાજનીતિ કોઇપણ સંજોગોમાં ચલાવી લેવાય નહીં. ગુજરાત અને દેશ માટે આ શરમજનક છે. ગુજરાતની સાડા 6 કરોડ જનતા એ બરાબર એ સમજી લેવું જોઇએ કે જે લોકો રાજ્યની પોલીસ, સિનિયર આઈપીએસ અધિકારીઓ અને ગુપ્તચર વિભાગને કામે લગાડી એક ‘સાહેબ’ માટે એક મહિલાની જાસૂસી કરાવતા હોય તેજ લોકો બેડરૂમમાં કેમેરા ઘુસાડવાની ગંદી રાજનીતિ પર ઉતરી શકે. નૈતિકતાનો ઉપદેશ આપનારા આજ લોકોની નલિયાકાંડમાં અને પાટણના પીટીસીકાંડમાં આપણે ભૂમિકા જોઈ ચૂક્યા છીએ.

જો 22 વર્ષમાં ડંફાંસો મારવાને બદલે સરખું શાસન કર્યું હોત તો લોકોના બેડરૂમમાં જઈને કૅમેરા ફિટ કરવાનો વારો ના આવ્યો હોત. હાર્દિક પટેલ સાથે મારે અને મારી સાથે હાર્દિકને એકથી વધુ મુદ્દે મતભેદ હોઈ શકે છે. પણ આ પ્રમાણે કોઈને બીલો ધી બેલ્ટ મારવાની રીતનો હું સખત વિરોધી છું. અને હાર્દિકને જાહેરમાં સમર્થન આપું છું કે ફકત હું જ નહીં, હજ્જારો દલિત યુવાનો પણ આ મુદ્દે તારી સાથે છે. તારા માતા પિતાને પણ જાહેરમાં કહું છું કે તમે જરીક પણ ક્ષોભ ના અનુભવતા. બલ્કે, એક લડાકુ મિજાજના યુવાનના મા બાપ તરીકે ગૌરવ લેજો. અને ગુજરાતની જનતાને એટલું ચોક્કસપણે કહીશ કે આપણે નાગરિકો એ હવે એ બરાબર સમજી લેવાની જરૂર છે કે જે લોકો કોઈના બેડરૂમમાં કેમરા ગોઠવવાની મેલી રાજનીતિ કરી રહ્યા છે તે ગુજરાતને કોઈ દિવસ ગૌરવવંતુ નહીં બનાવી શકે. – જીગ્નેશ મેવાણી