કર્ણાટકમાં શાળા-કોલેજોમાં હિજાબને લઈને ચાલી રહેલા વિવાદનો આજે અંત આવ્યો છે. કર્ણાટક હાઈકોર્ટે શૈક્ષણિક સંસ્થાઓમાં હિજાબ પહેરવા પરના પ્રતિબંધને યથાવત રાખ્યો છે. આ સાથે હિજાબ તમામ અરજીઓ ફગાવી દેવામાં આવી છે. ચીફ જસ્ટિસ રિતુ રાજ અવસ્થી, જસ્ટિસ કૃષ્ણા દીક્ષિત અને જસ્ટિસ જેએમ ખાજીની બેન્ચે આ ચુકાદો આપ્યો હતો. હાલમાં, રાજ્ય સરકારે સાવચેતીના પગલા તરીકે ઉડુપી અને દક્ષિણ કન્નડ જિલ્લામાં શાળાઓ અને કોલેજોને બંધ કરવાનો નિર્ણય લીધો છે.
કર્ણાટક હાઈકોર્ટે શૈક્ષણિક સંસ્થાઓમાં હિજાબ પરના પ્રતિબંધને પડકારતી અરજીઓ ફગાવી દીધી છે. કોર્ટે કહ્યું કે હિજાબ પહેરવું એ ઇસ્લામમાં જરૂરી ધાર્મિક પ્રથા નથી. કોર્ટે કહ્યું કે સ્કૂલ યુનિફોર્મની અરજી એ વાજબી પ્રતિબંધ છે જેની સામે વિદ્યાર્થી વાંધો ઉઠાવી શકે નહીં.
આ સાથે, બેંગલોર સિટી, મૈસૂર જેવા શહેરોમાં કેટલાક નિયંત્રણો લાદવામાં આવ્યા છે જેથી કરીને કોઈ ખલેલ ન પડે. જણાવી દઈએ કે હાઈકોર્ટની બેન્ચે લાંબી સુનાવણી બાદ 25 ફેબ્રુઆરીએ આ મામલે નિર્ણય સુરક્ષિત રાખ્યો હતો. આ પહેલા 10 ફેબ્રુઆરીએ વચગાળાનો આદેશ જારી કરીને હાઈકોર્ટે આગામી નિર્ણય સુધી શાળાઓ અને કોલેજોમાં હિજાબ પહેરવા પર પ્રતિબંધ મુકવાનો આદેશ આપ્યો હતો.
