Rajkot News: રાજકોટની સિવિલ હોસ્પિટલ વધુ એક વખત ચર્ચામાં આવી છે. હોસ્પિટલમાં સારવાર હેઠળ રહેલા એક દર્દી સાથે થયેલા કથિત અમાનવીય વર્તનને લઈને ગંભીર પ્રશ્નો ઊભા થયા છે. મળતી માહિતી અનુસાર, અર્ધબેભાન હાલતમાં રહેલા દર્દીને હોસ્પિટલના સુરક્ષા કર્મચારીઓ દ્વારા હોસ્પિટલ પરિસરમાંથી બહાર કાઢી રસ્તા પર મૂકી દેવામાં આવ્યો હોવાનો સામે આવ્યુ છે.
માહિતી મુજબ, સુરેન્દ્રનગર જિલ્લાના રાજચરાડી ગામના 30 વર્ષીય ગણેશ રામલાલ કટારાને ઝેરી દવાની અસર બાદ 2 જુલાઈના રોજ વહેલી સવારે સારવાર માટે રાજકોટ સિવિલ હોસ્પિટલમાં દાખલ કરવામાં આવ્યા હતા. તેમની સારવાર ચાલી રહી હતી.
જાણવા મળ્યુ છે કે, 3 જુલાઈની સવારે દર્દી અર્ધબેભાન હાલતમાં પોતાના વોર્ડમાંથી બહાર નીકળી ગયો હતો. ત્યારબાદ તે હોસ્પિટલના ઓપીડી વિસ્તાર નજીક પડી રહ્યો હતો. આરોપ છે કે તેને સારવાર માટે પરત વોર્ડમાં લઈ જવાને બદલે સુરક્ષા કર્મચારીઓએ તેને હોસ્પિટલની બહાર ખસેડી દીધો હતો.
જો કે, ઘટનાની જાણ થતાં હોસ્પિટલના સિવિલ સર્જને દર્દીને તાત્કાલિક ફરી સારવાર માટે દાખલ કરવાની વ્યવસ્થા કરી હતી. સાથે જ સમગ્ર મામલે તપાસના આદેશ આપ્યા હોવાનું અને જવાબદાર સામે નિયમ મુજબ કાર્યવાહી કરવામાં આવશે તેવી ખાતરી પણ વ્યક્ત કરી હતી.
આ ઘટનાએ હોસ્પિટલની સુરક્ષા વ્યવસ્થા, દર્દીઓની દેખરેખ અને જવાબદારીને લઈને અનેક સવાલો ઊભા કર્યા છે. સમગ્ર મામલે લોકો દ્વારા નિષ્પક્ષ તપાસ અને જવાબદાર સામે કડક કાર્યવાહી કરવાની માંગ ઉઠી રહી છે.
