કોંગ્રેસ પાર્ટીના પૂર્વ અધ્યક્ષ રાહુલ ગાંધી પાર્ટીના સ્થાપના દિવસના એક દિવસ પહેલા જ તેમની વ્યક્તિગત મુલાકાત માટે વિદેશ ગયા છે. ખેડૂત આંદોલન વચ્ચે રાહુલ ગાંધી વિદેશ જવા અંગે અનેક સવાલો ઉભા થઈ રહ્યા છે. તેમની ગેરહાજરીમાં, તેમની બહેન અને કોંગ્રેસ પાર્ટીના મહામંત્રી પ્રિયંકા ગાંધી વાડ્રાએ ચાર્જ સંભાળ્યો છે. ખેડૂત આંદોલનને લઇને પ્રિયંકા ગાંધીએ સોમવારે મોદી સરકાર પર પ્રહાર કર્યા છે. પ્રિયંકા ગાંધીએ કહ્યું, “સરકારે ખેડુતોનો અવાજ સાંભળવો જોઈએ. એમ કહેવું કે આ રાજકીય કાવતરું એકદમ ખોટું છે. તેઓ જે પ્રકારનાં શબ્દો ખેડુતો માટે વાપરી રહ્યા છે તે પાપ છે. ખેડૂતો સાથે વાત કરવી જોઈએ. અને કાયદો પાછો ખેંચવો જોઈએ.

રાહુલ ગાંધીએ વિદેશથી મોકલી શુભેચ્છાઓ

કોંગ્રેસના નેતા રાહુલ ગાંધીએ તેમની પાર્ટીના સ્થાપના દિવસ પર વિદેશથી શુભેચ્છાઓ પાઠવી છે. કોંગ્રેસ પાર્ટીનો આજે સ્થાપના દિવસ છે અને રાહુલ ગાંધી રવિવારે અંગત મુલાકાતે વિદેશ ગયા છે. રાહુલ ગાંધીએ ટ્વિટ કર્યું હતું કે, કોંગ્રેસ રાષ્ટ્રનો અવાજ વધારવા માટે શરૂઆતથી જ પ્રતિબદ્ધ છે. આજે, કોંગ્રેસના સ્થાપના દિવસે, અમે આપણી સત્યતા અને સમાનતાના સંકલ્પને પુનરાવર્તિત કરીએ છીએ. જય હિન્દ. “

રાહુલની ગેરહાજરીમાં ફરકાવ્યો ધ્વજ

રાહુલ ગાંધીની ગેરહાજરી હોવા છતાં, સોમવારે સવારે દિલ્હીમાં કોંગ્રેસ પાર્ટીના મુખ્યાલયમાં પાર્ટીનો ધ્વજ લહેરાવવામાં આવ્યો હતો. પાર્ટીના વરિષ્ઠ નેતા એકે એન્ટનીએ પાર્ટીનો ધ્વજ લહેરાવ્યો હતો અને તે સમયે રાહુલ ગાંધીની બહેન અને પાર્ટી મહામંત્રી પ્રિયંકા ગાંધી અને પાર્ટીના ઘણા વરિષ્ઠ નેતાઓ ત્યાં હાજર હતા. રાહુલ ગાંધીની માતા અને કોંગ્રેસના વચગાળાના અધ્યક્ષ સોનિયા ગાંધીએ પણ એક વીડિયો સંદેશમાં પાર્ટીના સ્થાપના દિન નિમિત્તે તમામ કાર્યકરોને અભિનંદન પાઠવ્યા છે, સોનિયા ગાંધીએ કહ્યું કે, કોંગ્રેસના સ્થાપના દિન પર કોંગ્રેસના તમામ પ્રિય કાર્યકરોને હાર્દિક અભિનંદન. સ્વતંત્રતા સંગ્રામથી આજ સુધીની આ યાત્રામાં કોંગ્રેસે દેશભક્તિ, નિર્ભયતા, નિસ્વાર્થ જનસેવા, ભાઈચારો, એકતા અને અખંડિતતાના મૂલ્યો માટે સંઘર્ષ કર્યો છે. “

મંતવ્ય ન્યૂઝ દ્વારા જાહેર અપીલ –

દેશ – દુનિયા સહિત ગુજરાતમાં પણ કોરોનાએ જ્યારે ફરી માંથુ ઉચક્યુ છે, ત્યારે અમે મંતવ્ય ન્યૂઝ તમામ નાગરીકોને અપીલ કરીએ છીએ કે, આ સમયે કોરોનાથી ડરવાની નહીં, પરંતુ સંયમ સાથે વર્તવાની જરુર છે. બને તેટલો જાહેર સંપર્ક ટાળો, કોરોના માર્ગદર્શીકા અને સરકારનાં સૂચનોનું ચુસ્તપણે પાલન કરો અને સ્વજનોને પણ કરાવો. આ કાળમાં તકેદારીએ જ સ્વસ્થ્ય હોય સંયમ સાથે નિયમોનું પાલન કરી એક જાગૃત નાગરીકની ફરજ બજાવો…