India Weather: દેશના અનેક ભાગોમાં ચોમાસાએ ભારે તબાહી મચાવી છે. પશ્ચિમ બંગાળ, મધ્યપ્રદેશ, ઉત્તરાખંડ અને રાજસ્થાન સહિતના રાજ્યોમાં ધોધમાર વરસાદને કારણે જનજીવન પર ગંભીર અસર પડી છે. અનેક વિસ્તારોમાં પાણી ભરાવાની સાથે પૂર જેવી સ્થિતિ સર્જાઈ છે. નદીઓ અને નાળા છલકાતા નીચાણવાળા વિસ્તારોમાં રહેતા લોકોની મુશ્કેલી વધી છે.
કોલકાતામાં બે કલાકના વરસાદથી જળબંબાકાર
પશ્ચિમ બંગાળની રાજધાની કોલકાતામાં સોમવારે સાંજે પડેલા ભારે વરસાદે શહેરની વ્યવસ્થાને ખોરવી નાખી હતી. માત્ર બે કલાકના વરસાદ બાદ ઉત્તર અને દક્ષિણ કોલકાતાના અનેક વિસ્તારોમાં ઘૂંટણસમા પાણી ભરાઈ ગયા હતા. સેન્ટ્રલ એવન્યુ સહિતના મુખ્ય માર્ગો પર પાણી ભરાતા વાહનવ્યવહાર ધીમો પડી ગયો હતો અને અનેક સ્થળોએ લાંબા ટ્રાફિક જામ સર્જાયા હતા. પાણીના ભારે પ્રવાહ વચ્ચે શેરી વિક્રેતાઓના સ્ટોલ પણ તણાતા જોવા મળ્યા હતા.
મધ્યપ્રદેશમાં ઘરમાં ફસાયેલા 10 લોકોનું રેસ્ક્યૂ
મધ્યપ્રદેશના સિહોર જિલ્લાના અહમદપુર વિસ્તારમાં ભારે વરસાદ બાદ ભીલાખેરી નદીમાં પાણીનું સ્તર વધી ગયું હતું. નદીના પાણી ઘરમાં ઘૂસી જતાં એક પરિવારના 10 લોકો ફસાઈ ગયા હતા, જેમાં પાંચ નાના બાળકોનો પણ સમાવેશ થાય છે. ઘટનાની જાણ થતાં પોલીસ અને સ્થાનિક ગ્રામજનો સ્થળ પર પહોંચ્યા હતા. ભારે મુશ્કેલી વચ્ચે રેસ્ક્યૂ કરીને તમામ લોકોને સુરક્ષિત બહાર કાઢવામાં આવ્યા હતા.
ઉત્તરાખંડમાં પૂરનો પ્રવાહ બન્યો ખતરનાક
ઉત્તરાખંડના પચ્છાદૂન વિસ્તારમાં ભારે વરસાદના કારણે નદીઓ અને નાળાઓમાં પાણીનો પ્રવાહ તેજ બન્યો છે. શિમલા બાયપાસ પર અચાનક આવેલા પાણીના પ્રવાહમાં ચાર લોકોને લઈ જતી કાર ફસાઈને તણાઈ ગઈ હતી. સભાવાલા પોલીસ ટીમે સમયસર કામગીરી કરીને દોરડાની મદદથી ચારેય મુસાફરોને બચાવી લીધા હતા.
આ ઉપરાંત રામગઢ ફોર્ડ વિસ્તારમાં પણ પાણીના તેજ પ્રવાહમાં એક મહિલા સ્કૂટર સાથે અને એક બાઇક સવાર તણાઈ ગયા હતા. સ્થાનિક લોકોએ જોખમ ઉઠાવીને બંનેને સુરક્ષિત બહાર કાઢવામાં મદદ કરી હતી.
હરિદ્વારમાં કંવર યાત્રા વચ્ચે પાણી ભરાયા
હરિદ્વારમાં સતત વરસાદને કારણે ભગતસિંહ ચોક અને રાણીપુર વળાંક સહિતના વિસ્તારોમાં પાણી ભરાઈ ગયું છે. સાવન કંવર યાત્રા ચાલી રહી હોવાથી રસ્તાઓ પર પાણી ભરાવાને કારણે કાંવડિયાઓ અને અન્ય વાહનચાલકોને મુશ્કેલીનો સામનો કરવો પડી રહ્યો છે.
રાજસ્થાનમાં શાળામાં ફસાયા બાળકો-શિક્ષકો
રાજસ્થાનમાં પણ ભારે વરસાદે અનેક જિલ્લાઓને અસર કરી છે. ઝાલાવાડ જિલ્લાના રાયપુર વિસ્તારમાં સતત વરસાદને કારણે કાચરાખેડી ગામની સરકારી શાળામાં પાણી ઘૂસી ગયું હતું. અંદર 40 જેટલા બાળકો અને શિક્ષકો ફસાઈ ગયા હતા. ઘટનાની જાણ થતાં SDRF અને NDRFની ટીમોએ બચાવ કામગીરી શરૂ કરી હતી. જિલ્લા વહીવટીતંત્ર અને પોલીસ અધિકારીઓની દેખરેખ હેઠળ હાથ ધરાયેલા રેસ્ક્યૂ ઓપરેશનમાં તમામ બાળકો અને શિક્ષકોને સુરક્ષિત બહાર કાઢવામાં આવ્યા હતા.
બુંદીમાં ટૂંકા વરસાદે સર્જી પૂરની સ્થિતિ
બુંદીમાં પણ થોડા સમયના ભારે વરસાદે શહેરના અનેક વિસ્તારોમાં પાણી ભરાવાની સ્થિતિ સર્જી હતી. નાગડી બજાર અને મીરા ગેટ વિસ્તારમાં પાણીનો પ્રવાહ એટલો તેજ હતો કે રસ્તા પર પાર્ક કરાયેલી કેટલીક બાઇકો પણ પાણીમાં તણાઈ ગઈ હતી.
ભરતપુરમાં પાણી ભરાતા લોકોનો વિરોધ
ભરતપુરની અનેક વસાહતોમાં વરસાદી પાણી ભરાતા સ્થાનિકોમાં રોષ જોવા મળ્યો હતો. પાણીના નિકાલની યોગ્ય વ્યવસ્થા કરવાની માંગ સાથે રહેવાસીઓએ વિરોધ નોંધાવ્યો હતો. સ્થાનિકોએ તંત્ર પાસે ડ્રેનેજ વ્યવસ્થા સુધારવા અને લાંબા સમયથી સર્જાતી પાણી ભરાવાની સમસ્યાનો કાયમી ઉકેલ લાવવાની માંગ કરી છે.
હવામાન વિભાગે આગામી દિવસોમાં પણ કેટલાક વિસ્તારોમાં ભારે વરસાદની શક્યતા વ્યક્ત કરી છે. તંત્ર દ્વારા લોકોને નદી, નાળા અને પાણીના તેજ પ્રવાહવાળા વિસ્તારોમાં ન જવા તેમજ જરૂરી સાવચેતી રાખવાની અપીલ કરવામાં આવી છે.
આ પણ વાંચો: આસામમાં પૂર: 1.55 લાખથી વધુ લોકો અસરગ્રસ્ત, મૃત્યુઆંક 98 પર પહોંચ્યો
આ પણ વાંચો: હિમાચલ પ્રદેશના ચંબામાં ભયાનક બસ અકસ્માત, ખીણમાં ખાબકતા 7 લોકોના મોત
