Iran Earthquake 5.5 Intensity: પશ્ચિમ એશિયામાં વધી રહેલા સૈન્ય તણાવ અને યુદ્ધની આશંકાઓ વચ્ચે દક્ષિણ ઈરાનમાં ગુરુવારે 5.5ની તીવ્રતાનો ભૂકંપ અનુભવાયો છે. જર્મનીના ભૂ-વિજ્ઞાન સંશોધન કેન્દ્ર (GFZ) ના જણાવ્યા અનુસાર, આ ભૂકંપ જમીનથી માત્ર 10 કિલોમીટરની ઊંડાઈ પર આવ્યો હતો. જોકે, આ ભૂકંપના આંચકા બાદ સોશિયલ મીડિયા અને આંતરરાષ્ટ્રીય સ્તરે એક નવી ચર્ચા શરૂ થઈ છે કે શું આ ખરેખર કુદરતી ભૂકંપ છે કે પછી ઈરાને ગુપ્ત રીતે પરમાણુ પરીક્ષણ (Nuclear Test) કર્યું છે?

કુદરતી આપત્તિ કે ન્યૂક્લિયર ટેસ્ટ?

ઈરાન લાંબા સમયથી પરમાણુ હથિયારો વિકસાવવાના આરોપોનો સામનો કરી રહ્યું છે. જ્યારે પણ ઈરાનમાં ઓછી ઊંડાઈ પર ભૂકંપ આવે છે, ત્યારે વિશ્વભરની સુરક્ષા એજન્સીઓ સાબદી થઈ જાય છે. 10 કિમીની ઊંડાઈ ટેકનિકલ રીતે ઓછી ગણાય છે, જે ઘણીવાર ભૂગર્ભ પરમાણુ વિસ્ફોટોમાં પણ જોવા મળે છે. જોકે, ભૂસ્તરશાસ્ત્રીઓનું કહેવું છે કે 5.5ની તીવ્રતા કુદરતી ભૂકંપના દાયરામાં આવે છે અને દક્ષિણ ઈરાન પહેલેથી જ સિસ્મિકલી સક્રિય ઝોન છે.

Earthquakeથી લોકોમાં ફફડાટ અને હાઈ એલર્ટ

ભૂકંપના આંચકા એટલા જોરદાર હતા કે અસરગ્રસ્ત વિસ્તારોમાં લોકો ઘરની બહાર દોડી આવ્યા હતા. વહીવટીતંત્રે હાલમાં ઈમરજન્સી સેવાઓને હાઈ એલર્ટ પર મૂકી દીધી છે. આફ્ટરશોકની આશંકાને જોતા રાહત અને બચાવ કામગીરી માટે ટીમો તૈયાર રાખવામાં આવી છે. અત્યાર સુધી કોઈ મોટા જાનમાલના નુકસાનના અહેવાલ નથી, પરંતુ લોકોમાં ભયનો માહોલ છે.

ભૂ-રાજકીય તણાવમાં વધારો

તાજેતરના દિવસોમાં ઈરાન દ્વારા કરવામાં આવેલા રોકેટ પરીક્ષણો અને સૈન્ય ગતિવિધિઓને કારણે દરેક કુદરતી ઘટનાને શંકાની નજરે જોવામાં આવી રહી છે. ઈઝરાયેલ અને અન્ય પશ્ચિમી દેશો ઈરાનની દરેક હિલચાલ પર નજર રાખી રહ્યા છે. જોકે, હજુ સુધી કોઈ પણ આંતરરાષ્ટ્રીય એજન્સીએ પરમાણુ પરીક્ષણની સત્તાવાર પુષ્ટિ કરી નથી.

નિષ્ણાતોનો મત

ભૂસ્તરશાસ્ત્રીઓના મતે, દક્ષિણ ઈરાન ટેક્ટોનિક પ્લેટ્સની હિલચાલ માટે જાણીતું છે. ભૂતકાળમાં પણ આ વિસ્તારમાં આવા અનેક આંચકા નોંધાયા છે. અધિકારીઓએ લોકોને અપીલ કરી છે કે તેઓ અફવાઓ પર ધ્યાન ન આપે અને માત્ર સત્તાવાર માહિતી પર જ વિશ્વાસ કરે.

આ પણ વાંચો: ઈરાન પર હુમલાની તૈયારીમાં અમેરિકા? સેટેલાઇટ તસવીરોમાં સૈન્ય ગતિવિધિ તેજ

આ પણ વાંચો: ઈરાનની ટ્રમ્પને ખુલ્લી ધમકી, એક ભૂલ અને યુદ્ધ

આ પણ વાંચો: ઈરાન-અમેરિકા વચ્ચે વધતો તણાવ: ટ્રમ્પ અને ખામેની વચ્ચે શબ્દયુદ્ધ